CNA
കൊച്ചി:
രാജ്യത്തിന്റെ വാനമ്പാടി ലതാ മങ്കേഷ്‌ക്കര്‍(92) അന്തരിച്ചു. ബ്രീച്ച് കാന്‍ഡി ആശുപത്രിയില്‍ ചികിത്സയിലിരിക്കെയാണ് ലതാ മങ്കേഷ്‌ക്കറുടെ അന്ത്യം.
കോവിഡിനെ തുടര്‍ന്ന് ആരോഗ്യനില മോശമായതിനാല്‍ ജനുവരി 8ന് മുംബൈയിലെ ബ്രീച് കാന്‍ഡി ആശുപത്രിയില്‍ പ്രവേശിപ്പിച്ച ലതാ മങ്കേഷ്‌ക്കറുടെ നില കഴിഞ്ഞ ദിവസം വഷളായി. ജനുവരി 27ന് ആരോഗ്യനിലയില്‍ നേരിയ പുരോഗതി ഉണ്ടായെങ്കിലും കഴിഞ്ഞ ദിവസം വീണ്ടും പഴയ അവസ്ഥയിലേക്ക് പോയി.
തുടര്‍ന്ന് വെന്റിലേറ്ററുടെ സഹായത്തോടെയാണ് ജീവന്‍ നിലനിറുത്തിയത്.
ഇന്ത്യയിലെ തന്നെ ഏറ്റവും മികച്ച ഗായകരിലൊരാളായ ലതാ മങ്കേഷ്‌കറെ രാജ്യത്തിന്റെ വാനമ്പാടിയെന്നും മെലഡികളുടെ രാജകുമാരിയെന്നും നൂറ്റാണ്ടിന്റെ ശബ്ദമെന്നും പലരും വാഴ്ത്തി പാടിയിട്ടുണ്ട്.
ആയിരത്തിലധികം ബോളിവുഡ് സിനിമകളില്‍ പിന്നണി ഗായികയായി. വിദേശഭാഷകളടക്കം മുപ്പത്തിയാറില്‍പരം ഭാഷകളില്‍ ഗാനങ്ങള്‍ ആലപിച്ചു. മുപ്പതിനായിരത്തിലധികം ഗാനങ്ങള്‍ ആലപിച്ച ലതയ്ക്ക് ഉന്നത പൗരത്വ ബഹുമതിയായ ഭാരതരത്‌നം 2001 ല്‍ നല്‍കിരാജ്യം ആദരിച്ചു.
1929 സെപ്റ്റംബര്‍ 28ന് സംഗീത കുടുംബത്തിലാണ് ലതാ മങ്കേഷ്‌ക്കറിന്റെ ജനനം. ഹേമ എന്നായിരുന്നു ലതയുടെ ആദ്യനാമം. പണ്ഡിറ്റ് ദീനനാഥ് മങ്കേഷ്‌കര്‍, ഷേവന്തി മങ്കേഷ്‌കര്‍ എന്നിവരാണ് മാതാപിതാക്കള്‍.
മറാത്തി നാടകരംഗത്ത് അറിയപ്പെടുന്ന കലാകാരനായിരുന്നു ദീനനാഥ് മങ്കേഷ്‌കര്‍. അച്ഛനാണ് ലതാ മങ്കേഷ്‌ക്കറിന്റേയും സഹോദരി ആശാ ഭോസ്ലയുടേയും സംഗീതാഭിരുചി പ്രോത്സാഹിപ്പിച്ചത്.
അങ്ങനെ അച്ഛനില്‍ നിന്ന് സംഗീതത്തിന്റെ ബാലപാഠങ്ങള്‍ അഭ്യസിച്ച് അഞ്ചാം വയസ്സില്‍ അച്ഛന്റ സംഗീതനാടകങ്ങളില്‍ ബാലതാരമായി ലത അരങ്ങിലെത്തി.
ലതയ്ക്ക് പതിമൂന്ന്് വയസ് പ്രായമുള്ളപ്പോള്‍ ഹൃദയാഘാതത്തെ തുടര്‍ന്ന് ദീനനാഥ് മങ്കേഷ്‌കര്‍ അന്തരിച്ചു. നവ് യുഗ് ചിത്രപഥ് മൂവി കമ്പനി ഉടമയും മങ്കേഷ്‌കര്‍ കുടുംബത്തിന്റെ അടുത്ത സുഹൃത്തുമായ വിനായക് ദാമോദര്‍ കര്‍ണാടകി ലതയുടെ കുടുംബത്തിന്റെ ഉത്തരവാദിത്വം ഏറ്റെടുത്തു.
വിനായക് ദാമോദര്‍ കര്‍ണാടകിയാണ് ലതയ്ക്ക് ഗായികയായും അഭിനേത്രിയായും വളര്‍ന്നു വരാനുള്ള അവസരം ഒരുക്കിയത്. അങ്ങനെ 1942ല്‍ പതിമൂന്നാം വയസില്‍ നസന്ത് ജോഗ്‌ലേക്കറിന്റെ 'കിതി ഹസാല്‍' എന്ന മറാത്തി സിനിമയ്ക്ക് വേണ്ടിയാണ് ലതയുടെ ആദ്യഗാനം റെക്കാഡ് ചെയ്തത്. സദാശിവ് റാവു നിവ്രേക്കറായിരുന്നു സംഗീത സംവിധായകന്‍. എന്നാല്‍ ഒടുവില്‍ ഗാനം സിനിമയില്‍ നിന്ന് ഒഴിവാക്കപ്പെട്ടു.
അച്ഛന്റെ അപ്രതീക്ഷിത മരണത്തോടെ ദുരിതത്തിലായ കുടുംബത്തെ പോറ്റാന്‍ ചെറിയ പ്രായത്തില്‍ തന്നെ ലതയ്ക്ക് ഏറെ കഷ്ടതകള്‍ അനുഭവിക്കേണ്ടി വന്നു.
നവ് യുഗ് ചിത്രപഥിന്റെ ഒരു സിനിമയില്‍ വിനായക് ലതയ്ക്ക് ഒരു ചെറിയ വേഷം നല്‍കി. ആ സിനിമയില്‍ ലതയ്ക്ക് ഒരു ഗാനം പാടാനുള്ള അവസരവും ലഭിച്ചു. 'മാതാ ഏക സപൂത് കി ദുനിയാ ബാദല്‍ ദെ തൂ' എന്നാരംഭിക്കുന്ന ഹിന്ദിഗാനമായിരുന്നു ലത പാടിയ, റിലീസായ ആദ്യ സിനമാ ഗാനം.
ഭാരത് രത്‌നയ്ക്ക് പുറമേ പദ്മഭൂഷണ്‍, പദ്മവിഭൂഷണ്‍, ദാദാ സാഹിബ് ഭാല്‍ക്കേ പുരസ്‌ക്കാരങ്ങളും പല കാലഘട്ടങ്ങളില്‍ ലതാ മങ്കേഷ്‌ക്കറെ തേടിയെത്തി.
രാജ്യത്തിന്റെ വാനമ്പാടിക്ക് ആദരാഞ്ജലികള്‍.
