സി എന് എ-
കൊച്ചി:
കേരളത്തിലെ ആദിവാസി വിഭാഗത്തില് നിന്നും ചലച്ചിത്ര സംവിധാന രംഗത്ത് ചുവടുറപ്പിച്ച ആദ്യത്തെ മലയാളി വനിതാ സംവിധായികയാണ് ലീല സന്തോഷ്. വയനാട്ടിലെ പ്രമുഖ ആദിവാസി വിഭാഗമായ പണിയരുടെ ജീവിതവും പൈതൃക നഷ്ടവും പ്രമേയമാക്കി ലീല സംവിധാനം ചെയ്ത 'നിഴലുകള് നഷ്ടപ്പെട്ട ഗോത്രഭൂമി' എന്ന ഡോക്കുമെന്ററിയിലൂടെയാണ് ലീല ഈ രംഗത്ത് ശ്രദ്ധിയ്ക്കപ്പെടുന്നത്. പ്രശസ്ത സാമൂഹ്യ പ്രവര്ത്തകനും എഴുത്തുകാരനുമായ കെ.ജെ. ബേബി സ്ഥാപിച്ച നടവയലിലെ 'കനവ്' എന്ന ബദല്സ്ക്കൂളിലൂടെ പഠിച്ചു വന്ന ലീല അവിടത്തെ ഗുരുകുല പഠന സംമ്പ്രദായങ്ങളില് നിന്നും കണ്ടെടുത്ത കളരിയും കൃഷിയും നൃത്തവും സാഹിത്യവും നാടകവുമെല്ലാം സിനിമയെന്ന മാധ്യമത്തിലൂടെ സാര്ത്ഥകമാക്കുവാന് ശ്രമിക്കുന്നു.
ഗുരുവായ കെ.ജെ. ബേബി നിര്മ്മിച്ച 'ഗുഡ'(2004) എന്ന ഗോത്രഭാഷയിലുള്ള സിനിമയില് സഹസംവിധാനം ചെയ്ത അനുഭവമാണ് ലീലയ്ക്ക് ഈ രംഗത്ത് ഉറച്ചുനില്ക്കാനുള്ള പ്രചോദനം നല്കിയത്. തുടര്ന്ന് തിരുവനന്തപുരത്തും രാജസ്ഥാനിലും നടന്ന സിനിമാ വര്ക്ക്ഷോപ്പുകളില് പങ്കെടുക്കാന് കഴിഞ്ഞതും ലീലയെ സിനിമയെന്ത് ? സ്ക്രിപ്റ്റെന്ത് ? മറ്റ് സിനിമാസാങ്കേതികവിദ്യകളെന്ത് ? എന്നുള്ള കാര്യങ്ങള് പഠിപ്പിച്ചു.
കാടിന്റെ കാഴ്ചകള് സത്യസന്ധമായി കാണാന് കാടിന്നകത്തു തന്നെ ക്യാമറ വെക്കണമെന്ന് ഉറച്ചു വിശ്വസിക്കുന്ന ലീല വിനായകനെ നായകനാക്കി കരിന്തണ്ടന്റെ കഥയുമായാണ് എത്തുന്നത്.