അഞ്ജു അഷറഫ്-
തിരു:
കോവിഡ് പ്രതിസന്ധിയുടെ കാലത്ത് രാജ്യാന്തര ചലച്ചിത്ര മേള നടത്താനുള്ള സര്‍ക്കാരിന്റെ തീരുമാനം ഇച്ഛാശക്തിയുടെ തെളിവാണെന്ന് സംവിധായകന്‍ ലിജോ ജോസ് പെല്ലിശ്ശേരി.
തിരുവനന്തപുരത്ത് ഐ എഫ് എഫ് കെ രാജ്യാന്തരചലച്ചിത്രമേളയില്‍ പങ്കെടുത്തു സംസാരിക്കുകയായിരുന്നു അദ്ദേഹം.
ഓണ്‍ലൈനിലേക്ക് മാറാത്ത ചുരുക്കം മേളകളിലൊന്നാണ് നമ്മുടേത്. ചലച്ചിത്ര മേളകള്‍ പോലുള്ള കലാ കൂട്ടായ്മകള്‍ക്ക് മലയാളികള്‍ നല്‍കുന്ന പ്രാധാന്യത്തിന്റെ തെളിവ് കൂടിയാണ് രാജ്യാന്തര ചലച്ചിത്ര മേള.
കോവിഡ് നമ്മുടെ സിനിമാ ശീലങ്ങളെ അടിമുടി മാറ്റിയിരിക്കുകയാണ്. തിയേറ്ററുകളില്‍ പോയി സിനിമ കാണാന്‍ കഴിയാത്തതിനാല്‍ ഒ ടി ടി, വെര്‍ച്ച്വല്‍ റിയാലിറ്റി തുടങ്ങിയ പ്ലാറ്റ്‌ഫോമുകളെ പുതിയ അവസരമാക്കി ഉപയോഗപ്പെടുത്തേണ്ടതുണ്ട്. ചില സിനിമകള്‍ തിയേറ്ററുകളിലും മറ്റു ചില സിനിമകള്‍ മൊബൈല്‍ സ്‌ക്രീനിലും പ്രദര്‍ശിപ്പിക്കേണ്ടവയാണ്. എന്നാല്‍ സിനിമ എവിടെ കാണണമെന്ന് തീരുമാനിക്കാനുള്ള അവകാശം പ്രേക്ഷകര്‍ക്കുണ്ട്.
ഏതൊരു സിനിമയുടെയും അടിസ്ഥാനം തിരക്കഥയാണ്. തിരക്കഥ ആവശ്യപ്പെടുന്ന രീതിയിലായിരിക്കണം സാങ്കേതിക വിദ്യ ഉപയോഗപ്പെടുത്തേണ്ടത്. നിര്‍മ്മാണ ഘട്ടത്തില്‍ സംവിധായകന്റെ സ്വാതന്ത്ര്യത്തിലും നിര്‍മ്മിക്കപ്പെട്ടുകഴിഞ്ഞാല്‍ പ്രേക്ഷകന്റെ വിലയിരുത്തലിലും പരസ്പരം ഇടപെടാന്‍ അവകാശമില്ലന്നും ലിജോ ജോസ് പെല്ലിശ്ശേരി പറഞ്ഞു.
