സി എന് എ-
ഇന്റര്നാഷണല് ഡെസ്ക്:
തൃശൂര് ആളൂര് സ്വദേശിയായ റോമിയോ കാട്ടുക്കാരന്റെ ഹോളിവുഡ് ചിത്രം 'മേരി'യുടെ ട്രെയ്ലര് പുറത്തിറങ്ങി.
കോവിഡിനെ തുടര്ന്ന് സൂം മീറ്റില് ലൈവായാണ് ട്രെയ്ലര് പുറത്തിറക്കിയത്. ഹോളിവുഡിലെ നൂറോളം പേര് പങ്കെടുത്ത സൂം മീറ്റില്മലയാളത്തില്നിന്ന് സംവിധായകന് സിദ്ധിക്ക് പങ്കെടുത്തു.
ചിക്കാഗോ മെമ്മോറിയല് ആശുപത്രിയില് ജോലിചെയ്യുന്ന ഒരു നഴ്സിന്റെ കഥയാണ് സിനിമ പറയുന്നത്. അമേരിക്കയില് കോവിഡ് കാലത്ത് ജനം പകച്ചു നില്ക്കുന്ന സമയമായിരുന്നു. വര്ദ്ധിച്ചുവരുന്ന കോവിഡ് രോഗികളുടെ എണ്ണവും, മാസ്കിന്റെ കുറവ്, ആരോഗ്യ പ്രവര്ത്തകരോട് പൊതുജനം കാണിക്കുന്ന അവഗണന തുടങ്ങിയ വിഷയങ്ങളാണ് 'മേരി'യില് ചിത്രീകരിച്ചിരിക്കുന്നത്.
ചിക്കാഗോ കെന്റ്വുഡ് ഫിലിംസ് ആണ് 'മേരി' നിര്മിച്ചിരിക്കുന്നത്. മുഖ്യകഥാപാത്രമായ മേരിയായി അഭിനയിച്ചിരിക്കുന്നത് കെയ്റ്റ് കോളമാന് ആണ്. മാര്ട്ടിന് ഡേവീസ് ആണ് നായകന്. ക്യാമറ & എഡിറ്റിങ്- നൂറി ബോസ്വെല്.
ആരോഗ്യ പ്രവര്ത്തകര്ക്കുള്ള അഭിനന്ദനമായി സമര്പ്പിക്കുന്ന 'മേരി' ഒടിടി യിലൂടെ റിലീസ് ചെയ്യാനാണ് തീരുമാനിച്ചിരിക്കുന്നതെന്ന് റോമിയോ കാട്ടുക്കാരന് പറഞ്ഞു.
റോമിയോ കഴിഞ്ഞവര്ഷം സംവിധാനം ചെയ്ത 'എ വണ്ടര്ഫുള് ഡേ' എന്ന ഷോര്ട്ട്ഫിലിം 11 രാജ്യാന്തര പുരസ്കാരങ്ങള് നേടിയിരുന്നു.
തൃശൂര് ശ്രീ കേരളവര്മ കോളജിലെ ബിരുദത്തിനുശേഷം നാട്ടില് പരസ്യചിത്രങ്ങള് ചെയ്തിരുന്ന റോമിയോ ന്യൂയോര്ക്ക് ഇന്റര്നാഷണല് ഫിലിം ഇന്സ്റ്റിറ്യൂട്ടിലേക്ക് സിനിമയെക്കുറിച്ച് കൂടുതല് പഠിക്കാന് പോകുകയും പിന്നീട് ഹോളിവുഡിലെ ജൂനിയര് ആര്ട്ടിസ്റ്റുകളെ വെച്ച് ചിത്രീകരിച്ച 'എ വണ്ടര്ഫുള് ഡേ' എന്ന ചെറുസിനിമ ഹോളിവുഡിലേക്കുള്ള ചവിട്ടുപടി ആകുകയായിരുന്നുവെന്ന് റോമിയോ പറഞ്ഞു.