അഞ്ജു അഷറഫ്-
കൊച്ചി:
തിയേറ്ററുകള് തുറന്ന് ആളനക്കം ഉണ്ടായതോടെ സിനിമകള് ധാരാളമായി വന്നു തുടങ്ങി. ജനുവരി, ഫെബ്രുവരി, മാര്ച്ച് മാസങ്ങളില് സൂപ്പര് താര ചിത്രങ്ങള് ഉള്പ്പെടെ 21 സിനിമകള് റിലീസ് ചെയ്തേക്കും.
ചലച്ചിത്ര മേഖലയെ സംബന്ധിച്ചിടത്തോളം തികച്ചും സന്തോഷകരമായകാര്യമാണിത്. ലോക്ഡൗണിന് ശേഷം ആദ്യമെത്തിയ വിജയ്യുടെ 'മാസ്റ്റര്' 125 കോടി നേടി മുന്നേറ്റം തുടരുകയാണ്.
നിലവില് കേരളത്തിലെ ഒട്ടു മിക്ക തിയേറ്ററുകളിലും ഇപ്പോഴും കളിച്ചുകൊണ്ടിരിക്കുന്നത് മാസ്റ്ററാണ്. പുതിയ സാഹചര്യത്തില് മലയാളത്തില് നിന്ന് ആദ്യം എത്തുന്ന ചിത്രം പ്രിജേഷ്സെന് സംവിധാനം ചെയ്ത ജയസൂര്യ നായകനായ 'വെള്ളം' എന്ന സിനിമയാണ്. ജനുവരി 22നാണ് 'വെള്ളം' റിലീസ് ചെയ്യുന്നത്. ജനുവരി 29ന് 'വാങ്ക്', 'ലവ്', 'ഇവള് ഗോപിക' എന്നീ മൂന്ന് ചിത്രങ്ങള് കൂടി പ്രദര്ശനത്തിനെത്തും.
മലയാളത്തിലെ ആദ്യ സൂപ്പര്താര ചിത്രം എത്തുന്നത് ഫെബ്രുവരി നാലിനാണ്. മമ്മൂട്ടി പുരോഹിത വേഷത്തില് അഭിനയിക്കുന്ന 'ദി പ്രീസ്റ്റ്' ഏറെ പ്രതീക്ഷ ഉണര്ത്തുന്നുവെന്ന് മാത്രമല്ല സിനിമാലോകം ഉറ്റുനോക്കുന്ന ചിത്രവും കൂടിയാണ്. ജോഫിന് ചാക്കോ സംവിധാനം ചെയ്യുന്ന സിനിമ ആന്റോ ജോസഫ്, ബി. ഉണ്ണികൃഷ്ണന്, വി. എന്. ബാബു എന്നിവര് ചേര്ന്നാണ് നിര്മ്മിക്കുന്നത്. മഞ്ജു വാര്യര് ആദ്യമായി മമ്മൂട്ടിക്കൊപ്പം അഭിനയിക്കുന്നു എന്ന പ്രത്യേകതയും ചിത്രത്തിനുണ്ട്. ആദ്യ ദിവസം നാനൂറോളം സ്ക്രീനില് സിനിമ പ്രദര്ശിപ്പിക്കുമെന്നാണ് അനൗദ്യോഗിക വിവരം.
മമ്മൂട്ടി മുഖ്യമന്ത്രിയായി അഭിനയിക്കുന്ന 'വണ്' ഏപ്രില് അവസാനം റിലീസ് ചെയ്തേക്കും. സിനിമയുടെ കുറച്ചു ഭാഗങ്ങള് ഇനിയും ചിത്രീകരിക്കാനുണ്ടെന്നും ഈ മാസം തന്നെ അത് പൂര്ത്തിയാക്കുമെന്നും സംവിധായകന് സന്തോഷ് വിശ്വനാഥന് പറയുന്നു.
'വണ്' കഴിഞ്ഞാല് അമല് നീരദ് സംവിധാനം ചെയ്യുന്ന ചിത്രത്തില് മമ്മൂട്ടി ജോയിന് ചെയ്യും. സൂപ്പര്ഹിറ്റ് വിജയം നേടിയ 'ബിഗ്-ബി'യുടെ സെക്കന്ഡ് പാര്ട്ട് 'ബിലാല്' എന്ന ചിത്രമാണ് മമ്മൂട്ടിയും അമല് നീരദും ചേര്ന്ന് ഒരുക്കുന്നതെന്ന പ്രചരണം നേരത്തെ ഉണ്ടായിരുന്നെങ്കിലും മറ്റൊരു കഥാന്തരീക്ഷത്തിലുള്ള സിനിമയാണ് ഇപ്പോള് ചിത്രീകരിക്കുന്നത്. താടിയും തലമുടിയും നീട്ടി വളര്ത്തിയ മമ്മൂട്ടിയുടെ ഇപ്പോഴത്തെ രൂപഭംഗി അമല് നീരദ് ഒരുക്കുന്ന പുതിയ സിനിമയുടെ ഭാഗമാകും. മമ്മൂട്ടിയോടൊപ്പം മറ്റ് ഒരുപിടി താരങ്ങള് ഈ സിനിമയില് വിവിധ കഥാപാത്രങ്ങളെ അവതരിപ്പിക്കുന്നുണ്ട്.
അമല് നീരദ് ചിത്രത്തില് ജോയിന് ചെയ്യുന്നതിനുമുമ്പ് മമ്മൂട്ടിക്ക് വണ്ണിലെ കടക്കല് ചന്ദ്രന് എന്ന മുഖ്യമന്ത്രിയുടെ കുപ്പായം ഊരി വെക്കേണ്ടതുണ്ട്.
മമ്മൂട്ടിയുടെ 'ദി പ്രീസ്റ്റ്', 'വണ്' എന്നീ ചിത്രങ്ങള്ക്കിടയില് മോഹന്ലാല് അഭിനയിക്കുന്ന 'മരക്കാര് അറബിക്കടലിന്റെ സിംഹം' മാര്ച്ച് അവസാനം പ്രദര്ശനത്തിനെത്തിയേക്കും.
ആശിര്വാദ് സിനിമാസ് നേരത്തെ പ്രഖ്യാപിച്ച തിയതിയാണ് മാര്ച്ച് അവസാനവാരം. പുതിയ സാഹചര്യത്തില് റിലീസ് ദിവസത്തില് മാറ്റം വരാത്തതുകൊണ്ട് 'മരക്കാര്' മാര്ച്ചില് തന്നെ പ്രദര്ശനത്തിനെത്തുമെന്ന് പ്രതീക്ഷിക്കാം.