സംഗീത ജനചന്ദ്രന്
കൊച്ചി:
മമ്മൂട്ടിയും, പാര്വ്വതി തിരുവോത്തും കേന്ദ്ര കഥാപാത്രങ്ങളാവുന്ന 'പുഴു'വിന്റെ ടൈറ്റില് പോസ്റ്ററിനു വനിതാ ദിനത്തില് താരനിബിഢമായ ലോഞ്ച്.
നവാഗതയായ റത്തീന സംവിധാനം ചെയ്യുന്ന 'പുഴു'വിന്റെ നിര്മ്മാണം വേഫേറര് ഫിലിംസിന്റെ ബാനറില് ദുല്ഖര് സല്മാനും, സിന്സില് സെല്ലുല്ലോയ്ഡിന്റെ ബാനറില് എസ്. ജോര്ജ്ജും ചേര്ന്നാണ്.
വനിതാ ദിനാശംസകള് നേര്ന്നു കൊണ്ട് തന്റെ ഒഫീഷ്യല് പേജില് മമ്മൂട്ടി ടൈറ്റില് പോസ്റ്റര് പുറത്തിറക്കി ചുരുങ്ങിയ സമയത്തിനുള്ളില് തന്നെ സിനിമക്ക് അകത്തും പുറത്തുമുള്ള നിരവധി താരങ്ങളും, പ്രമുഖ വ്യക്തിത്വങ്ങളും, ചിത്രത്തിന്റെ അണിയറ പ്രവര്ത്തകര്ക്കും, അഭിനേതാക്കള്ക്കും ആശംസകള് നേര്ന്നു കൊണ്ട് തങ്ങളുടെ സാമൂഹ്യ മാധ്യമങ്ങള് വഴി പോസ്റ്റര് പങ്കുവെച്ചു.
'പുഴു'വിന്റെ കഥ ഹര്ഷാദും, തിരക്കഥ നിര്വഹിച്ചിരിക്കുന്നത് ഷര്ഫുവും, സുഹാസും, ഹര്ഷാദും ചേര്ന്നാണ്. വേഫേറെര് ആണ് പുഴുവിന്റെ വിതരണം.
ഒരു പിടി മികച്ച സംവിധായകരെ മലയാള സിനിമയ്ക്കു സമ്മാനിച്ച മമ്മൂട്ടി, സംവിധായികയെ മലയാള സിനിമക്ക് സമ്മാനിക്കുകയാണ് ഈ വനിതാ ദിനത്തില്. 'ഉയരെ' എന്ന ചിത്രത്തിന്റെ എക്സിക്യൂട്ടീവ് പ്രൊഡ്യൂസറും, രേവതി, ആശ കേളുണ്ണി ഉള്പ്പെടെയുള്ള പ്രശസ്ത സംവിധായകരോടൊപ്പം പ്രവര്ത്തിച്ചു മലയാള സിനിമയില് വര്ഷങ്ങളായുള്ള സജീവ സാന്നിധ്യം ആയ റത്തീനയുടെ സംവിധായികയായുള്ള അരങ്ങേറ്റമാണ് ഈ ചിത്രം കുറിക്കുന്നത് എന്നത് ഈ വനിതാ ദിനത്തിന്റെ മാറ്റ് കൂട്ടുന്നു. എണ്ണം പറഞ്ഞ കഴിവുറ്റ വനിതാ സംവിധായകരുടെ നിരയിലേക്ക് മികച്ച ഒരു പ്രവേശനം തന്നെ ആവും 'പുഴു' എന്നത് തീര്ച്ചപ്പെടുത്താം.
മമ്മൂട്ടി, പാര്വതി എന്നിവര്ക്കൊപ്പം നിരവധി പ്രമുഖരായ ഒരു താര നിര തന്നെ 'പുഴു'വിന്റെ ഭാഗമായി എത്തുന്നുണ്ട്. ചിത്രത്തിനു വേണ്ടി ക്യാമറ ചലിപ്പിച്ചിരിക്കുന്നത് തേനി ഈശ്വറാണ്. 'പേരന്പ്', 'കര്ണ്ണന്', 'അച്ചം യെണ്പത് മടമയാടാ', 'പാവൈ കഥൈകള്' തുടങ്ങിയ ചിത്രങ്ങളുടെ കാമറ കൈകാര്യം ചെയ്തത് തേനി ഈശ്വരാണ്.
'ബാഹുബലി', 'മിന്നല് മുരളി' തുടങ്ങിയ ചിത്രങ്ങളുടെ കലാ സംവിധായകനായ മനു ജഗദ് ആണ്, 'പുഴു'വിന്റെയും കലസംവിധാനം നിര്വ്വഹിക്കുന്നത്.
വേഫേറര് ഫിലിംസിന്റെ ബാനറില് കൂടി ഒരുങ്ങുന്ന ചിത്രമായതു കൊണ്ട് തന്നെ മമ്മൂട്ടിയും ദുല്ഖറും ഒന്നിക്കുന്ന ആദ്യ ചിത്രമാണ് 'പുഴു'. പാര്വ്വതി തിരുവോത്തും മമ്മൂട്ടിയും വെള്ളിത്തിരയില് ഒന്നിക്കുന്ന ആദ്യ ചിത്രം കൂടിയാവും 'പുഴു'. മമ്മൂട്ടിയും, പാര്വതിയും ഒന്നിക്കുന്ന ചിത്രമായതു കൊണ്ട് തന്നെ പ്രേക്ഷകര് ഇരു കൈയ്യും നീട്ടി ടൈറ്റില് പോസ്റ്ററിനെ ഇതിനോടകം തന്നെ വരവേറ്റി കഴിഞ്ഞു.
ഇങ്ങനെ നിറയെ സവിശേഷതകളുമായി ഒരുങ്ങുന്ന ഈ ചിത്രം ഏറെ പ്രതീക്ഷയോടെയാണ് ആരാധകരും പ്രേക്ഷകരും കാത്തിരിക്കുന്നത്.
റെനിഷ് അബ്ദുള്ഖാദര്, രാജേഷ് കൃഷ്ണ, ശ്യാം മോഹന് എന്നിവരാണ് പുഴുവിന്റെ എക്സിക്യൂട്ടീവ് പ്രൊഡ്യൂസേഴ്സ്. എഡിറ്റര്- ദീപു ജോസഫ്, സംഗീതം- ജെയ്കസ് ബിജോയ്, വിഷ്ണു ഗോവിന്ദും, ശ്രീശങ്കറും ചേര്ന്നാണ് സൗണ്ട് നിര്വ്വഹിച്ചിരിക്കുന്നത്, പ്രൊജക്റ്റ് ഡിസൈന്- ബാദുഷ, വസ്ത്രാലങ്കാരം- സമീറ സനീഷ്, സ്റ്റില്സ്- ശ്രീനാഥ് എന്. ഉണ്ണികൃഷ്ണന്. അമല് ചന്ദ്രനും, എസ്. ജോര്ജ്ജും ചേര്ന്നാണ് മേക്കപ്പ്, പബ്ലിസിറ്റി ഡിസൈന്സ്- ആനന്ദ് രാജേന്ദ്രന്. ഉടനടി തന്നെ ചിത്രീകരണം ആരംഭിക്കുന്ന ഈ ചിത്രം ഇപ്പോള് പ്രീ പ്രൊഡക്ഷനിലാണ്.
Online PR - CNA.