Editor- MM Kamath
കൊച്ചി:
മോഹന്ലാലിനെ കേന്ദ്ര കഥാപാത്രമാക്കി പ്രിയദര്ശന് സംവിധാനം ചെയ്യുന്ന ബ്രഹ്മാണ്ഡ ചിത്രം 'മരയ്ക്കാര് അറബിക്കടലിന്റെ സിംഹം' ഡയറക്റ്റ് ഒടിടി റിലീസ് ഒഴിവാക്കി ഡിസംബര് 2ന് തിയറ്ററുകളിലെത്തും.
സിനിമ സാംസ്കാരിക വകുപ്പ് മന്ത്രി സജി ചെറിയാന്റെ മധ്യസ്ഥതയില് നടന്ന ചര്ച്ചയിലാണ് തീരുമാനം. ഉപാധികള് ഇല്ലാതെയാണ് സിനിമ തിയേറ്ററുകളില് പ്രദര്ശിപ്പിക്കുക.
മരയ്ക്കാറിന്റെ തിയറ്റര് റിലീസിന്റെ കാര്യത്തില് നിര്മ്മാതാവ് ആന്റണി പെരുമ്പാവൂരിന്റെ ഭാഗത്തുനിന്ന് വലിയ വിട്ടുവീഴ്ചയാണ് ഉണ്ടായതെന്ന് മന്ത്രി ഫേസ്ബുക്ക് പോസ്റ്റിലൂടെ അറിയിച്ചു.
തിയേറ്റര് റിലീസിനു ശേഷമാകും ചിത്രം ഒ.ടി.ടിയില് പുറത്തിറങ്ങുക. സാധാരണ തിയറ്റര് റിലീസ് ചെയ്യുന്ന സിനിമകള് 42 ദിവസത്തിനു ശേഷമാണ് ഒ.ടി.ടിക്കു നല്കുന്നത്.
90 കോടിയോളം മുതല്മുടക്കിലാണ് ചിത്രം നിര്മിച്ചിരിക്കുന്നത്. മലയാളത്തിലെ ഏറ്റവും ഉയര്ന്ന ബജറ്റാണിത്. തന്റെ ജീവിതത്തിലെ ഏറ്റവും ചിലവേറിയ സിനിമയാണിതെന്ന് സംവിധായകന് പ്രിയദര്ശന് പറഞ്ഞിരുന്നു.
ആമസോണ് പ്രൈം വീഡിയോ നല്കിയത് 90 കോടി രൂപക്ക് മുകളിലെന്ന് റിപ്പോര്ട്ട് കഴിഞ്ഞ ദിവസം പുറത്തു വന്നിരുന്നു.
മലയാളത്തിന് പുറമെ ഹിന്ദി, തമിഴ് തെലുങ്ക്, കന്നട എന്നീ ഭാഷകളിലും ചിത്രം റിലീസ് ചെയ്യും.
സുപ്രധാന നായിക വേഷങ്ങളില് മഞ്ജു വാര്യര്, കീര്ത്തി സുരേഷ്, കല്യാണി പ്രിയദര്ശന് തുടങ്ങിയവരാണ് എത്തുന്നത്.
സുനില് ഷെട്ടി, പ്രഭു, ഫാസില്, സിദ്ദിഖ്, നെടുമുടി വേണു, ഇന്നസെന്റ്, അശോക് സെല്വന് എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങള്.
സാമൂതിരി രാജവംശത്തിന്റെ നാവികമേധാവിയായിരുന്ന കുഞ്ഞാലി മരക്കാറുടെ കഥ പറയുന്ന ചിത്രമാണ് 'മരക്കാര് അറബിക്കടലിന്റെ സിംഹം'.
ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂര് നിര്മ്മിക്കുന്ന ഈ എപ്പിക് ഹിസ്റ്റോറിക്കല് വാര് ചിത്രത്തിന്റെ തിരക്കഥ അനി ശശിയും പ്രിയദര്ശനും ചേര്ന്നെഴുതുന്നു.
കോപ്രൊഡ്യുസര്- ഡോ: സിജെ റോയി, സന്തോഷ് ടി കുരുവിള, ഛായാഗ്രഹണം- തിരു, ഗാനരചന- ബികെ ഹരിനാരായണന്, ഷാഫി കൊല്ലം, പ്രിയദര്ശന്, സംഗീതം- റോണി റാഫേല്, കലാസംവിധാനം- സാബു സിറിള്, എഡിറ്റിംങ്- അയ്യപ്പന് നായര്.
തിയേറ്ററില് എത്തുന്നതിനും മുന്പ് തന്നെ മൂന്നു ദേശീയ പുരസ്കാരങ്ങളാണ് ഈ പ്രിയദര്ശന് ചിത്രം നേടിയത്.
മികച്ച ഫീച്ചര് ഫിലിമിനുള്ള പുരസ്കാരത്തിന് പിറകെ, മികച്ച കോസ്റ്റ്യൂം ഡിസൈനിനുള്ള അവാര്ഡ് സുജിത് സുധാകരന്, വി. സായ് എന്നിവര് നേടി.
സിദ്ധാര്ഥ് പ്രിയദര്ശന് മികച്ച സ്പെഷ്യല് എഫക്ടിനുള്ള പുരസ്കാരത്തിനും അര്ഹനായി.
PLAY VIDEO