അഞ്ജു അഷറഫ്-
കൊച്ചി:
'ദൃശ്യം2' വിന്റെ ചിത്രീകരണം പൂര്ത്തിയാക്കിയ മോഹന്ലാല് നവംബര് 23ന് ബി. ഉണ്ണികൃഷ്ണന് സംവിധാനം ചെയ്യുന്ന സിനിമയില് ജോയിന് ചെയ്യും. ദൃശ്യം2 കഴിഞ്ഞ് ദുബായിലേക്ക് പോയ മോഹന്ലാല് നാളെയാണ് തിരിച്ചെത്തുന്നത്. കോവിഡ് പ്രോട്ടോകോള് നിയമങ്ങള് പാലിച്ചുകൊണ്ടാണ് പുതിയ സിനിമയുടെ ലൊക്കേഷനില് മോഹന്ലാല് എത്തുക. 22ന് പാലക്കാട് എത്തുന്ന മോഹന്ലാല് 23 മുതല് ഉണ്ണികൃഷ്ണന് സംവിധാനം ചെയ്യുന്ന സിനിമയുടെ ലൊക്കേഷനില് ഉണ്ടാവും. 23ന് കൊല്ലങ്കോടാണ് ഷൂട്ടിംഗ് ആരംഭിക്കുന്നത്. 'മിസ്റ്റര് ഫ്രോഡ്', 'വില്ലന്', 'ഗ്രാന്ഡ്മാസ്റ്റര്', 'മാടമ്പി' എന്നീ ചിത്രങ്ങള്ക്ക് ശേഷം മോഹന്ലാലിനെ നായകനാക്കി ബി. ഉണ്ണികൃഷ്ണന് ഒരുക്കുന്ന മാസ്സ് എന്റര്ടൈനറില് മലയാളത്തിലെ ഒരുപിടി താരങ്ങള് അണിനിരക്കും. വമ്പന് സിനിമകളുടെ തിരക്കഥാകൃത്തായ ഉദയകൃഷ്ണയാണ് ഇക്കുറി ബി. ഉണ്ണികൃഷ്ണനു വേണ്ടി തിരക്കഥ എഴുതുന്നത്. സായ്കുമാര്, സിദ്ദിഖ്, നെടുമുടി വേണു, വിജയരാഘവന്, ഗണേഷ് കുമാര്, ഇന്ദ്രന്സ്, നന്ദു, റിയാസ്ഖാന്, സന്തോഷ് കീഴാറ്റൂര്, ശ്രീജിത്ത് രവി, ശിവജി ഗുരുവായൂര്, റോണി, ബിജു പപ്പന്, രചന നാരായണന്കുട്ടി, സ്വാസിക, നേഹ സക്സേന എന്നിവര് പ്രധാന കഥാപാത്രങ്ങളെ അവതരിപ്പിക്കുന്നു. ദക്ഷിണേന്ത്യന് ചലച്ചിത്ര താരം ശ്രദ്ധാ ശ്രീനാഥ് ആണ് നായിക. കന്നട തമിഴ് തെലുങ്ക് ചിത്രങ്ങളിലെ നായികയും മോഡലുമായ ശ്രദ്ധ ശ്രീനാഥ് ആദ്യമായി അഭിനയിച്ചത് 'കോഹിന്നൂര്' എന്ന മലയാള പടത്തിലാണ്. പിന്നീട് ദക്ഷിണേന്ത്യന് ചലച്ചിത്ര വേദിയിലേക്ക് കടന്ന് മുന്നിര നായകന്മാര്ക്കൊപ്പം ഇടംപിടിച്ച ശ്രദ്ധ ശ്രീനാഥ് 'മാര' എന്ന തമിഴ് ചിത്രം പൂര്ത്തിയാക്കിയാണ് ഇപ്പോള് മോഹന്ലാല് സിനിമയില് അഭിനയിക്കാന് എത്തുന്നത്. കൊല്ലംകോട്, ഒറ്റപ്പാലം, പാലക്കാട്, ഹൈദരാബാദ് എന്നിവിടങ്ങളിലായി ചിത്രീകരിക്കുന്ന സിനിമയുടെ ഛായാഗ്രഹണം റോബിന് നിര്വഹിക്കുന്നു. കലാ- സംവിധാനം ജോസഫ് നെല്ലിക്കല്, അരോമ മോഹനാണ് പ്രൊഡക്ഷന് കണ്ട്രോളര്. കോവിഡ് പ്രോട്ടോകോള് നിയമങ്ങള് കര്ശനമായി പാലിച്ചുകൊണ്ടായിരിക്കും സിനിമയുടെ ചിത്രീകരണം നടക്കുക.