സി എന് എ-
ചെന്നൈ:
തമിഴ് സിനിമ പ്രൊഡ്യൂസേഴ്സ് കൗണ്സിലിന്റെ പുതിയ പ്രസിഡണ്ടായി മുരളി രാമസ്വാമിയെ തെരഞ്ഞെടുത്തു. ഞായറാഴ്ചയായിരുന്നു തെരഞ്ഞെടുപ്പ്. ഫലപ്രഖ്യാപനംവന്നത് തിങ്കളാഴ്ചയാണ്. മുരളി രാമസ്വാമി, ടി. രാജേന്ദ്രന്, പി.എല് തേനപ്പന് എന്നിവരാണ് പ്രസിഡണ്ട് സ്ഥാനത്തേക്ക് മത്സരിച്ചത്. വാശിയേറിയ തെരഞ്ഞെടുപ്പില് മുരളി രാമസ്വാമി 557 വോട്ട് നേടി വിജയിച്ചപ്പോള് ടി. രാജേന്ദ്രന് ലഭിച്ചത് 388 വോട്ടാണ്. തേനപ്പന് 87 വോട്ടാണ് കിട്ടിയത്. തമിഴിലെ പ്രശസ്ത നിര്മാതാവും സംവിധായകനുമായ രാമനാരായണന്റെ മകനാണ് തേനാണ്ടല് ഫിലിംസിന്റെ സാരഥി മുരളി രാമസ്വാമി. വിജയ്യുടെ 'മെര്സല്' ഉള്പ്പെടെ ഒരുപിടി സിനിമകള് അദ്ദേഹം നിര്മിച്ചിട്ടുണ്ട്. നടന്മാരും നിര്മ്മാതാക്കളുമായ ആര്.കെ. സുരേഷ്, കതിരേശന് എന്നിവര് കൗണ്സില് വൈസ് പ്രസിഡന്റുമാരായി തെരഞ്ഞെടുക്കപ്പെട്ടു. ചന്ദ്രപ്രകാശ് ജെയിന് ആണ് പുതിയ ജനറല് സെക്രട്ടറി. രാധാകൃഷ്ണന്, മന്നാന് എന്നിവരാണ് സെക്രട്ടറിമാര്. താര നിര്മ്മാതാക്കളായ കമല്ഹാസന്, എസ്.ജെ. സൂര്യ, സന്താനം, ഖുശ്ബു എന്നിവരും കൗണ്സിലിലേക്ക് തെരഞ്ഞെടുക്കപ്പെട്ടു. ചെന്നെയിലെ എം.ജി.ആര്. ജാനകി കോളേജില് വെച്ചായിരുന്നു തെരഞ്ഞെടുപ്പു നടന്നത്.