സി എന്‍ എ-
കൊച്ചി:
മാര്‍ട്ടിന്‍ പ്രക്കാട്ട് സംവിധാനം ചെയ്യുന്ന നാലാമത്തെ ചിത്രമാണ് 'നായാട്ട്'. 'ബെസ്റ്റ് ആക്ടര്‍', 'എ ബി സി ഡി', 'ചാര്‍ലി' എന്നീ വിജയ ചിത്രങ്ങള്‍ക്കു ശേഷം കുഞ്ചാക്കോ ബോബന്‍, നിമിഷ സജയന്‍, ജോജുജോര്‍ജ് എന്നിവരെ കേന്ദ്ര കഥാപാത്രങ്ങളാക്കി ഒരുക്കുന്ന സിനിമയുടെ ചിത്രീകരണം പൂര്‍ത്തിയായി.
'അയ്യപ്പനും കോശിയും' എന്ന ചിത്രത്തിനുശേഷം 'ഗോള്‍ഡ് കോയിന്‍' മോഷന്‍ പിക്ചര്‍ കമ്പനിയുടെ ബാനറില്‍ സംവിധായകന്‍ രഞ്ജിത്തും പി.എം ശശിധരനും ചേര്‍ന്ന് നിര്‍മ്മിക്കുന്ന സിനിമയില്‍ മാര്‍ട്ടിന്‍ പ്രക്കാട്ട് ഫിലിംസും അസോസിയേറ്റ് ചെയ്യുന്നുണ്ട്. ഷൂട്ടിങ് പൂര്‍ത്തിയായി സിനിമയുടെ 2nd ലുക്ക് പോസ്റ്റാണ് പുറത്തുവന്നിരിക്കുന്നത്.
തണുപ്പ് വീണ് നനഞ്ഞ തമിഴ്‌നാടിന്റെ പശ്ചാത്തലത്തില്‍ ആള്‍ക്കൂട്ട മധ്യ മഫ്‌ളറും ജാക്കറ്റും ധരിച്ച് നില്‍ക്കുന്ന കുഞ്ചാക്കോ ബോബന്‍, നിമിഷ സജയന്‍, ജോജു ജോര്‍ജ്, എന്നിവര്‍ നില്‍ക്കുന്ന പോസ്റ്ററാണ് റിലീസ് ചെയ്തിരിക്കുന്നത്.
നായാട്ടിന്റെ ഛായഗ്രഹണം ഷൈജു ഖാലിദ് നിര്‍വഹിക്കുന്നു. ജോസഫിന്റെ രചയിതാവ് ഷാഹി കബീറാണ് നായാട്ടിന് തിരക്കഥ എഴുതിയിരിക്കുന്നത്. മഹേഷ് നാരായണന്‍, വിഷ്ണു വിജയ്, അഗ്‌നിവേഷ് രഞ്ജിത്ത്, ജിത്തു അഷ്‌റഫ്, അജയന്‍ അടാട്ട്, ദിലീപ് നാഥ്, റോണക്‌സ് സേവിയര്‍, സമീറ സനീഷ്, ബിനീഷ് ചന്ദ്രന്‍, അന്‍വര്‍ അലി, വേദന്‍, വിനായക് ശശികുമാര്‍, ഷബീര്‍ മലവെട്ടത്ത്, അനൂപ് ചാക്കോ എന്നിവരാണ് നായാട്ടിന്റെ അണിയറയില്‍ പ്രവര്‍ത്തിക്കുന്ന മറ്റു പ്രധാനികള്‍.
