അഞ്ജു അഷറഫ്-
കൊച്ചി:
കഥകളുടെ സുല്‍ത്താന്‍ വൈക്കം മുഹമ്മദ് ബഷീര്‍ എഴുതിയ പ്രശസ്തമായൊരു കഥയാണ് 'നീലവെളിച്ചം'.
തന്റെ ജീവിതത്തിലെ അത്ഭുത സംഭവങ്ങളിലൊന്ന് എന്ന ആമുഖത്തോടെയാണ് കഥ തുടങ്ങുന്നത്.
പ്രേതബാധയുണ്ടെന്ന് വിശ്വസിച്ചിരുന്ന ഒരു വീട്ടില്‍ താമസിക്കാനെത്തുന്ന ചെറുപ്പക്കാരനായ എഴുത്തുകാരനും ആ വീട്ടിലുണ്ടെന്ന് വിശ്വസിക്കപ്പെടുന്ന ഒരു പെണ്‍കുട്ടിയുടെ ആത്മാവും തമ്മില്‍ രൂപപ്പെടുന്ന ആര്‍ദ്രമായ ആത്മബന്ധത്തിന്റെ കഥയാണ് 'നീലവെളിച്ചം'.
1964 ല്‍ ഈ കഥ വികസിപ്പിച്ച് ബഷീര്‍ തന്നെ തിരക്കഥ എഴുതി എ. വിന്‍സന്റ് സംവിധാനം ചെയ്ത 'ഭാര്‍ഗ്ഗവി നിലയം' എന്ന സിനിമ ഏറെ ശ്രദ്ധിക്കപ്പെടുകയും വലിയ വിജയം നേടുകയും ചെയ്തു.
'ഭാര്‍ഗ്ഗവി നിലയം' റിലീസ് ചെയ്തു അര നൂറ്റാണ്ടിന് ശേഷം വൈക്കം മുഹമ്മദ് ബഷീറിന്റെ 113 ആം ജന്മദിനത്തില്‍ 'നീലവെളിച്ചം' എന്ന കഥയെ ആസ്പദമാക്കി നവ സിനിമയിലെ യുവതാരങ്ങളെ അണിനിരത്തി ആഷിക്ക് അബു സംവിധാനം ചെയ്യുന്ന പുതിയ സിനിമ അനൗണ്‍സ് ചെയ്തിരിക്കുന്നു.
പൃഥ്വിരാജ്, കുഞ്ചാക്കോ ബോബന്‍, റിമ കല്ലിങ്കല്‍ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
64 ലെ 'ഭാര്‍ഗ്ഗവിനിലയത്തില്‍ പ്രേംനസീര്‍, മധു, വിജയ നിര്‍മ്മല എന്നിവരായിരുന്നു പ്രധാന അഭിനേതാക്കള്‍.
ഇതിനുമുമ്പ് പലരും 'ഭാര്‍ഗ്ഗവിനിലയം' സിനിമയാക്കാന്‍ ശ്രമിച്ചിട്ടുണ്ട്. ഓരോരോ കാരണങ്ങളാല്‍ അതെല്ലാം ഉപേക്ഷിക്കുകയായിരുന്നു. വര്‍ഷങ്ങള്‍ക്ക് ശേഷം 'ഭാര്‍ഗ്ഗവീനിലയം' എന്ന ടൈറ്റില്‍ പോലും ഏതോ പ്രൊഡക്ഷന്‍ കമ്പനി രജിസ്റ്റര്‍ ചെയ്തതായി കേട്ടിരുന്നു.
ചലച്ചിത്ര രംഗവുമായി ബന്ധപ്പെട്ട് പ്രവര്‍ത്തിക്കുന്ന ഒരു സംഘടനയ്ക്ക് വേണ്ടിയും 'ഭാര്‍ഗ്ഗവിനിലയം' സിനിമയാക്കാനുള്ള ശ്രമം ഉണ്ടായിരുന്നു. അതിന്റെ തിരക്കഥ എഴുതി പൂര്‍ത്തിയാക്കുകയും ചെയ്തതാണ്. പിന്നീട് ആ സംരംഭവും ഉപേക്ഷിച്ചു.
മലയാള സിനിമയിലെ പ്രശസ്തനായ തിരക്കഥാകൃത്തും സംവിധായകനുമായ ഒരാള്‍, അദ്ദേഹം അന്ന് എഴുതിയ തിരക്കഥ ഒരു പക്ഷെ ഇപ്പോഴും അദ്ദേഹത്തിന്റെ കയ്യില്‍ കണ്ടേക്കാം.
'ഭാര്‍ഗ്ഗവീനിലയം' എന്ന ടൈറ്റില്‍ രണ്ടാമത് രജിസ്റ്റര്‍ ചെയ്ത പ്രൊഡക്ഷന്‍ കമ്പനിക്കാര്‍, അന്ന് ആ പേര് മാറ്റി എഴുതിതരണമെങ്കില്‍ വലിയ സംഖ്യ ആവശ്യപ്പെട്ടു എന്നാണ് കേട്ടത്. എന്നാല്‍, സിനിമ നടന്നില്ല, പൈസ കൊടുക്കേണ്ടിയും വന്നില്ല.
ആഷിക് അബു വളരെ ബുദ്ധിപരമായി തന്നെയാണ് 'നീലവെളിച്ചം' എന്ന കഥയുടെ യഥാര്‍ത്ഥ പേര് സിനിമയ്ക്ക് നല്‍കിയിരിക്കുന്നത്.
ആഷിക് അബുവിന്റെ കുറിപ്പ്:
സ്‌നേഹം നിറഞ്ഞവരേ, നിറത്തിന്മേല്‍ നിറവും വെളിച്ചത്തിന്മേല്‍ വെളിച്ചവും ഉപയോഗിച്ച്, ബഷീറിന്റെ 'നീലവെളിച്ചം' സിനിമയാക്കണമെന്നത് ഏറെ കാലമായുള്ള കൊതിയായിരുന്നു. എല്ലാം ഒത്തുവന്നത് ഇപ്പോഴാണ്. അക്ഷരസുല്‍ത്താന്റെ നൂറ്റിപതിമൂന്നാം ജന്മദിനത്തില്‍ ഈ വാര്‍ത്ത നിങ്ങളുമായി പങ്കുവെക്കാന്‍ ഏറെ അഭിമാനവും സന്തോഷവും ഉണ്ട്. ബഷീറിന്റെ കുടുംബങ്ങള്‍ക്കും
ശ്രീ ഗുഡ്‌നൈറ്റ് മോഹനും ഹൃദയത്തില്‍ നിന്നും നന്ദി. നീലവെളിച്ചം ഈ വര്‍ഷാവസാനം ചിത്രീകരണം ആരംഭിക്കും.
#VaikomMuhmmadBasheer #Neelavelicham #OPM
