അഞ്ജു അഷറഫ്-
കൊല്ലങ്കോട് :
നെരിപ്പോടിന്റെ ഷൂട്ടിംഗ് കൊല്ലങ്കോട് നടന്നു കൊണ്ടിരിക്കുമ്പോള് ലൊക്കേഷനില് കണ്ട ഒരു കാഴ്ച്ച മനസിന് വല്ലാത്ത വിഷമവും അതുപോലെ തന്നെ സന്തോഷവും നല്കിയെന്ന് ഫൈറ്റ് മാസ്റ്റര് അഷ്റഫ് ഗുരുക്കള് പറഞ്ഞു.
ഐ എം വിജയന് എന്ന കറുത്ത് ഉയരമുള്ള പച്ചയായ ആ മനുഷ്യന്റെ സ്നേഹം നിറഞ്ഞ വലിയ മനസ്സാണ് ഞാന് കണ്ടത്.
രാവിലെ ഫൈറ്റ് എടുക്കാന് തുടങ്ങുന്ന സമയത്ത് ഒരമ്മ ശാരീരിക വൈകല്ല്യമുള്ള ഒരു കുട്ടിയേയും എടുത്ത് ഷൂട്ടിങ് കാണാന് വന്നവരുടെ കൂട്ടത്തില് ഇരിക്കുന്നത് കണ്ടു.
വളരെ റിസ്കായിട്ടുള്ള ആക്ഷന് സീന് ഡ്യൂപ്പില്ലാതെയാണ് വിജയേട്ടന് ചെയ്യുന്നത്. അതിനിടയില്... ഇക്കാ ഒരു മിനിറ്റ് എന്ന് എന്നോട് പറഞ്ഞിട്ട് വിജയേട്ടന് ആ കുട്ടിയുടെ അടുത്തേക്ക് ചെന്ന് അതിനെ വാരിപ്പുണര്ന്നു.
ആ നിമിഷം വിജയേട്ടന്റെ കണ്ണുകള് നിറയുന്നത് ഞാന് കണ്ടു. സെറ്റിലുള്ള മുഴുവന് പേരുടെയും കണ്ണ് നനയിച്ച കാഴ്ചയായിരുന്നു അത്. പിന്നീട് അര മണിക്കൂര് കഴിഞ്ഞാണ് ഫൈറ്റ് സീന് പുനരാരംഭിച്ചതെന്നു അഷ്റഫ് ഗുരുക്കള് പറയുന്നു.
പമ്പാവാസന് നാരായണന് കഥ എഴുതി സംവിധാനം ചെയ്യുന്ന 'നെരിപ്പോട്' എന്ന സിനിമയുടെ ചിത്രീകരണം കൊല്ലങ്കോട്, തൃശൂര് എന്നിവിടങ്ങളിലായി പൂര്ത്തിയായി.
ഇന്ത്യന് ഫുട്ബോളറായ ഐ എം വിജയന്, VBK മേനോന്, Dr. ബിനുബാലന്, ജയന്തി ശിവദാസ് എന്നിവര് പ്രധാന കഥാപാത്രങ്ങളെ അവതരിപ്പിക്കുന്നു.
ആടിയുലയുന്ന മനുഷ്യമനസിന്റെ തീവ്ര വിചാരങ്ങളുടെയും വികാരങ്ങളുടെയും പരിച്ഛേദമാണ് 'നെരിപ്പോട്' എന്ന സിനിമയുടെ പ്രമേയം.
ഛായാഗ്രഹണം ശ്യാം നിര്വഹിക്കുന്നു. അസോസിയേറ്റ് ഡയറക്ടര്- ലിഗോഷ്, ആക്ഷന് ഡയറക്ടര്- അഷ്റഫ് ഗുരുക്കള്, വസ്ത്രാലങ്കാരം- ഡേവിസ് കൂള, സ്റ്റില്സ്- അയ്യപ്പദാസ്. മേക്കപ്പ്- റോയ് പല്ലിശ്ശേരി, ആര്ട്ട് ഡയറക്ടര്- TK രമേശ് & അയ്യപ്പന്.