സി എന് എ-
തിരു:
കേരള ലളിതകലാ അക്കാദമി കോവിഡ് കാലത്ത് കലാകൃത്തുക്കള്ക്ക് കൈത്താങ്ങായി സംഘടിപ്പിക്കുന്ന നിറകേരളം ദശദിന ക്യാമ്പിന്റെ രണ്ടാംഘട്ടത്തിന്റെ ഉദ്ഘടനം സാംസ്കാരിക വകുപ്പ് മന്ത്രി സജി ചെറിയാന് നിര്വഹിച്ചു. ഓണ്ലൈനായി നടന്ന ചടങ്ങില് ചിത്രകാരി ധന്യ. വി യ്ക്ക് ക്യാന്വാസും കളറും നല്കിയായിരുന്നു ഉദ്ഘാടനം. കലാകാരന്മാരെ പരമാവധി സഹായിക്കാനുള്ള ശ്രമങ്ങളാണ് സര്ക്കാര് നടത്തുന്നതെന്ന് മന്ത്രി പറഞ്ഞു. കാലത്തിന്റെ മാറ്റങ്ങള് ഉള്ക്കൊണ്ടുകൊണ്ടുള്ള പ്രവര്ത്തനങ്ങളുണ്ടാകും.
കേരളത്തിന്റെ സംസ്കാരിക നയം ഫലപ്രദമായി നടപ്പിലാക്കേണ്ടതുണ്ട്. നല്ല മാറ്റങ്ങളുണ്ടാകാന് കുട്ടികളില് നിന്നുമാണ് തുടങ്ങേണ്ടതെന്നും മന്ത്രി ചൂണ്ടിക്കാട്ടി. കേരളത്തിന്റെ ഭാവിയെ നയിക്കുന്നതിനായി സാംസ്കാരിക സ്ഥാപനങ്ങള് നടത്തുന്ന പ്രവര്ത്തനങ്ങളെ സര്ക്കാര് പിന്തുണയ്ക്കും. ലളിതകലാ അക്കാദമി നടത്തിവരുന്ന പ്രവര്ത്തനങ്ങളെ മന്തി ശ്ലാഘിച്ചു. അക്കാദമി കഴിഞ്ഞ അഞ്ചു വര്ഷത്തിനിടെ നടപ്പിലാക്കിയ പ്രവര്ത്തനങ്ങള് ഉള്പ്പെടുത്തി തയ്യാറാക്കിയ 'മുദ്ര' എന്ന പുസ്തകം ചിത്രകാരന് ബി. ഡി. ദത്തന് നല്കി മന്ത്രി പ്രകാശിപ്പിച്ചു. അക്കാദമി ചെയര്മാന് നേമം പുഷ്പരാജ് ചടങ്ങില് അധ്യക്ഷനായിരുന്നു. ചിത്രകലാകൃത്തുക്കള് ഒരേ സമയം സ്വന്തം വീടുകളിലിരുന്ന് ചിത്രരചന നടത്തുന്ന രീതിയിലാണ് ക്യാമ്പ് ഒരുക്കിയിട്ടുള്ളത്. 14 ജില്ലകളിലെ 250 ചിത്രകലാകൃത്തുക്കള് ഈ ക്യാമ്പില് പങ്കെടുക്കുന്നുണ്ട്. ആദ്യഘട്ട ക്യാമ്പില് 104 കലാകൃത്തുക്കള് ക്യാമ്പില് പങ്കെടുത്തിരുന്നു. മുഖ്യധാരാ ചിത്രകലാകൃത്തുക്കളോടൊപ്പം ഭിന്നശേഷിക്കാരായ കലാകൃത്തുക്കളും ട്രാന്സ്ജെന്ഡര് വിഭാഗത്തില്പ്പെടുന്ന കലാകൃത്തുക്കളും കോമേഴ്സ്യല് ആര്ട്ടിസ്റ്റുകളും ക്യാമ്പില് പങ്കെടുക്കുന്നുണ്ട്. ഓരോ കലാകൃത്തിനും ഇരുപതിനായിരം രൂപയും ക്യാന്വാസും നിറങ്ങളും അക്കാദമി നല്കുന്നു.
അക്കാദമി സെക്രട്ടറി പി. വി. ബാലന് സ്വാഗതവും വൈസ് ചെയര്മാന് എബി എന്. ജോസഫ് കൃതജ്ഞതയും പറഞ്ഞു.