ന്യൂസ് ഡെസ്‌ക്-
കൊച്ചി :
ലോക്ക്ഡൗണില്‍ അടച്ചുപൂട്ടിയ സിനിമ ഇന്‍ഡസ്ട്രിക്ക് ഉണര്‍വേകികൊണ്ട് പുതിയ 11 സിനിമകളുടെ ചിത്രീകരണം കേരളത്തിന്റെ വിവിധ ഭാഗങ്ങളില്‍ ആരംഭിച്ചു. കൊവിഡ് മഹാമാരിയെ തുടര്‍ന്നുണ്ടായ പ്രത്യേക സാഹചര്യങ്ങളെ മുന്‍നിര്‍ത്തി സര്‍ക്കാര്‍ പ്രഖ്യാപിച്ച മാര്‍ഗ്ഗനിര്‍ദ്ദേശങ്ങള്‍ പൂര്‍ണമായും പാലിച്ചുകൊണ്ടാണ് ഷൂട്ടിങ് നടക്കുന്നത്. 'നിഴല്‍', 'അണ്‍ലോക്ക്', 'ഫോര്‍', 'കാണെക്കാണേ', 'വേലുകാക്ക', 'ജനഗണമന', 'കടല്‍കുതിര', 'മേപ്പടിയാന്‍', 'ബൗ..വൗ', 'നിയോഗം' എന്നീ 11 സിനിമകളുടെ ചിത്രീകരണം ഒക്ടോബറില്‍ ആരംഭിച്ചു. അതേ സമയം സെപ്റ്റംബറില്‍ തുടങ്ങിയ 'റോയ്', 'ഹോം', 'എരിഡ' എന്നീചിത്രങ്ങളുടെ ഷൂട്ടിംഗ് ഒക്ടോബറില്‍ പൂര്‍ത്തിയാക്കുകയും ചെയ്തു.
KSFDC നിര്‍മിക്കുന്ന ഡിവോഴ്‌സ് എന്ന സിനിമയുടെ ചിത്രീകരണവും തിരുവനന്തപുരത്തു പൂര്‍ത്തിയായി. മിനി ഐ. ജി. സംവിധാനം ചെയ്യുന്ന ഡിവോഴ്‌സ് നാല് വ്യത്യസ്ത കുടുംബങ്ങളുടെ കഥ പറയുന്ന സിനിമയാണ്.
കുഞ്ചാക്കോബോബനും നയന്‍താരയും അഭിനയിക്കുന്ന 'നിഴല്‍' എറണാകുളത്താണ്. ആന്റോജോസഫ് ഫിലിം കമ്പനി മിലങ് ഫിലിം ഹൗസ് എന്നീ ബാനറില്‍ നിര്‍മ്മിക്കുന്ന നിഴല്‍ അപ്പു ഭട്ടതിരി സംവിധാനം ചെയ്യുന്നു. തിരക്കഥ സഞ്ജീവ്, ചായാഗ്രഹണം ദീപക് ഡി മേനോന്‍, പ്രൊഡക്ഷന്‍ കണ്‍ട്രോളര്‍ ഡിക്‌സണ്‍ പൊടുത്താസ്.
സോഹന്‍ സീനുലാല്‍ തിരക്കഥയെഴുതി സംവിധാനം ചെയ്യുന്ന അണ്‍ലോക്ക് എന്ന സിനിമയുടെചിത്രീകരണം എറണാകുളത്ത് തൃപ്പൂണിത്തുറയിലാണ്. മമ്തമോഹന്‍ദാസ് ചെമ്പന്‍ വിനോദ് ശ്രീനാഥ് ഭാസി പാഷാണം ഷാജി എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. നിര്‍മ്മാണം സജീഷ് മഞ്ചേരി, പ്രൊഡക്ഷന്‍ കണ്‍ട്രോളര്‍ ജോളി.
ഉയരെ എന്ന ചിത്രത്തിന് ശേഷം മനു അശോക് സംവിധാനം ചെയ്യുന്ന കാണേ കാണേഎന്ന സിനിമയില്‍ ടോവിനോ ഐശ്വര്യ ലക്ഷ്മി സുരാജ് എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. ബോബി സഞ്ജയ് തിരക്കഥ എഴുതുന്നു. ഉയരെ ക്ക് ശേഷം മനു അശോക് ബോബിസഞ്ജയ് ടീം ഒരുക്കുന്ന സിനിമയാണിത്. ഡ്രീം കാച്ചര്‍ പ്രൊഡക്ഷന്‍സാണ് നിര്‍മ്മാണം. ചായാഗ്രഹണം ആല്‍ബി ആന്റണി നിര്‍വഹിക്കുന്നു. പ്രൊഡക്ഷന്‍ കണ്‍ട്രോളര്‍ സബീര്‍ മലവെട്ടത്ത്. എറണാകുളത്താണ് ഷൂട്ടിംഗ്.
ഇന്ദ്രന്‍സ് ടൈറ്റില്‍ കഥാപാത്രത്തെ അവതരിപ്പിക്കുന്ന വേലുകാക്കയുടെ ചിത്രീകരണം പാലക്കാട്. പി ജെ വി ക്രിയേഷന്‍സിന്റെ ബാനറില്‍ സിബി വര്‍ഗീസ് പുല്ലൂരുത്തിക്കരി നിര്‍മ്മിക്കുന്ന സിനിമ അശോക് ആര്‍ കലീത്ത സംവിധാനം ചെയ്യുന്നു. ചായാഗ്രഹണം ഷാജി ജേക്കബ്, തിരക്കഥ സത്യന്‍ എം എ, പ്രൊഡക്ഷന്‍ കണ്‍ട്രോളര്‍ ചെന്താമരാക്ഷന്‍.
ഷാജി അസീസ് സംവിധാനം ചെയ്യുന്ന വൂള്‍ഫ് എന്ന സിനിമ പെരുമ്പാവൂരില്‍ പുരോഗമിക്കുന്നു. രചന ജി ആര്‍ ഇന്ദുഗോപന്‍. ദാമര്‍ സിനിമയുടെ ബാനറില്‍ സന്തോഷ് ദാമോദരന്‍ നിര്‍മിക്കുന്ന ചിത്രത്തില്‍ അര്‍ജുന്‍ അശോകന്‍, സംയുക്തമേനോന്‍, ഷൈന്‍ ടോം ചാക്കോ, ജാഫര്‍ ഇടുക്കി, എന്നിവര്‍ അഭിനയിക്കുന്നു. ചയാഗ്രഹണം ഫായിസ് സിദ്ദിഖ് നിര്‍വഹിക്കുന്നു. പ്രൊഡക്ഷന്‍ കണ്‍ട്രോളര്‍ പികെ ജിനു.
പൃഥ്വിരാജ് പ്രൊഡക്ഷന്‍സും മാജിക് ഫ്രെയിംസ് ചേര്‍ന്ന് നിര്‍മ്മിക്കുന്ന ജനഗണമന ഡിജോ ജോസ് ആന്റണി സംവിധാനം ചെയ്യുന്നു. എറണാകുളത്താണ് ഷൂട്ടിംഗ്. പൃഥ്വിരാജ്, സുരാജ് വെഞ്ഞാറമ്മൂട്, ഷമ്മി തിലകന്‍, ധ്രുവന്‍, മമ്ത മോഹന്‍ദാസ് ശാരി, ചിത്രഅയ്യര്‍, എന്നിവര്‍ അഭിനയിക്കുന്നു. തിരക്കഥ സരീഷ് മുഹമ്മദ്, ചായാഗ്രഹണം സുധീഷ് ഇളവന്‍, ലൈന്‍ പ്രൊഡ്യൂസര്‍ ഹാരിസ് ദേശം, പ്രൊഡക്ഷന്‍ കണ്‍ട്രോളര്‍ റിനി ദിവാകര്‍.
സുനില്‍ ഹനീഫ സംവിധാനം ചെയ്യുന്ന ഫോര്‍ എന്ന സിനിമയുടെചിത്രീകരണം എറണാകുളത്ത് പുരോഗമിക്കുന്നു. Bloom ഇന്റര്‍നാഷണലിന്റെ ബാനറില്‍ വേണുഗോപാലകൃഷ്ണന്‍ നിര്‍മ്മിക്കുന്ന സിനിമയില്‍ അമല്‍ഷാ, ഗോവിന്ദപൈ, മിനോന്‍, സിദ്ദിഖ്, ജോണി ആന്റണി, സുരേഷ് കൃഷ്ണ, അലന്‍സിയര്‍, സ്വാതിക എന്നിവര്‍ അഭിനയിക്കുന്നു. വിധു ശങ്കര്‍ വൈശാഖ് എന്നിവര്‍ തിരക്കഥയെഴുതുന്നു. ചായാഗ്രഹണം പ്രകാശ് വേലായുധന്‍. പ്രൊഡക്ഷന്‍ കണ്‍ട്രോളര്‍ ജാവേദ് ചെമ്പ്.
ഉണ്ണി മുകുന്ദന്‍ ഫിലിംസ് എന്ന ബാനറില്‍ നടന്‍ ഉണ്ണി മുകുന്ദന്‍ നിര്‍മ്മിക്കുന്ന സിനിമ മേപ്പടിയാന്‍ വിഷ്ണു മോഹന്‍ സംവിധാനം ചെയ്യുന്നു. ഉണ്ണിമുകുന്ദന്‍ നൂറിന്‍, ലെന, ശ്രീനിവാസന്‍, സൈജു കുറുപ്പ്, കലാഭവന്‍ ഷാജോണ്‍, ജോണി, ഹരീഷ് കണാരന്‍, അലന്‍സിയര്‍, എന്നിവരാണ് പ്രധാന അഭിനേതാക്കള്‍. ചായാഗ്രഹണം നീല്‍ ഡി കുഞ്ഞ. മേപ്പടിയാന്റെചിത്രീകരണം ഈരാറ്റുപേട്ടയില്‍ ആണ്.
സെന്നന്‍ പള്ളാശ്ശേരി സംവിധാനം ചെയ്യുന്ന കടല്‍ കുതിരയില്‍ കിരണ്‍ രാജ്, ശിവജി ഗുരുവായൂര്‍, നിമിഷ നമ്പ്യാര്‍, കോട്ടയം പ്രദീപ്, സീമ ജി നായര്‍, കുളപ്പുള്ളി ലീലഎന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. സെന്നന്‍ സിനിമ സ്റ്റുഡിയോ, ബോസ് കുമാര്‍ കിഴക്കതില്‍ എന്ന ബാനറില്‍ നിര്‍മ്മിക്കുന്ന കടല്‍കുതിരയുടെ ചിത്രീകരണം വര്‍ക്കലയില്‍ ആണ്. ഛായഗ്രഹണം ശിവകുമാര്‍ ആര്‍ട്ട് ആന്‍ഡ് ഷൂട്ട്, പ്രൊഡക്ഷന്‍ കണ്‍ട്രോളര്‍ പ്രമോദ് ദേവനന്ദ.
തെന്നിന്ത്യന്‍ നടി നമിത നിര്‍മ്മിക്കുന്ന 'ബൗ..വൗ' എന്ന സിനിമയുടെ ചിത്രീകരണം തിരുവനന്തപുരത്ത് ആരംഭിച്ചു. എല്‍ നാഥ് ഫിലിംസ് നമിത പ്രൊഡക്ഷന്‍സ് എന്നീ ബാനറില്‍ നിര്‍മ്മിക്കുന്ന സിനിമ ആര്‍ എല്‍ രവി മാത്യു സ്‌ക്കറിയ എന്നിവര്‍ ചേര്‍ന്ന് സംവിധാനം ചെയ്യുന്നു. നമിത കേന്ദ്രകഥാപാത്രത്തെ അവതരിപ്പിക്കുന്ന സിനിമയുടെ ഛായാഗ്രഹണം പി എസ് കൃഷ്ണനിര്‍വഹിക്കുന്നു.
അനീഷ് വര്‍മ്മ സംവിധാനം ചെയ്യുന്ന നിയോഗം എന്ന സിനിമയില്‍ മാമുക്കോയ കേന്ദ്രകഥാപാത്രത്തെ അവതരിപ്പിക്കുന്നു. പാലക്കാട് ചിത്രീകരണം തുടരുന്ന നിയോഗത്തിന്റെ ഛായാഗ്രഹണം പ്രസാദ് കാവില്‍പ്പാട് നിര്‍വഹിക്കുന്നു.
