സി എന് എ-
വൈക്കം:
പ്രശസ്ത നടനും തിരക്കഥാകൃത്തും നാടകകൃത്തും സംവിധായകനുമായ പി. ബാലചന്ദ്രന് അന്തരിച്ചു.
ഇന്ന് പുലര്ച്ചെ 5 മണിയോടെ വൈക്കത്തെ വീട്ടിലായിരുന്നു അന്ത്യം.
69 വയസ്സായിരുന്നു.
കഴിഞ്ഞ എട്ടു മാസമായി മസ്തിഷ്കജ്വരത്തെത്തുടര്ന്ന് ചികിത്സയിലായിരുന്നു അദ്ദേഹം.
മമ്മൂട്ടിയയെ നായകനാക്കി സന്തോഷ് വിശ്വനാഥ് സംവിധാനം ചെയ്ത 'വണ്' ആയിരുന്നു അദ്ദേഹം അഭിനയിച്ച് അവസാനമായി റിലീസ് ചെയ്ത ചിത്രം.
ടോവനോ തോമസിനെ നായകനാക്കി ബേസില് ജോസഫ് സംവിധാനം ചെയ്യുന്ന 'മിന്നല് മുരളി'യാണ് ഇനി റിലീസ് ചെയ്യാനിരിക്കുന്ന ചിത്രം.
കൊല്ലം ജില്ലയിലെ ശാസ്താം കോട്ടയില് പദ്മനാഭപിള്ളയുടെയും സരസ്വതിഭായിയുടെയും മകനായി ജനനം.
അന്പതോളം സിനിമകളില് ശ്രദ്ധേയമായ വേഷങ്ങള് ചെയ്തു.
നടന്, എഴുത്തുകാരന്, തിരകഥാകൃത്ത്, സംവിധായകന്, നാടക പ്രവര്ത്തകന്, അധ്യാപകന് എന്നീ നിലകളില് ശ്രദ്ധേയനായിരുന്നു അദ്ദേഹം.
2012ല് പി കുഞ്ഞിരാമന് നായരുടെ ജീവിതത്തെ ആസ്പദമാക്കി 'ഇവന് മേഘരൂപന്' എന്ന സിനിമയിലൂടെ അദ്ദേഹം ചലച്ചിത്ര സംവിധായകനായി. 'ഉള്ളടക്കം', 'അങ്കിള് ബണ്', 'പവിത്രം', 'തച്ചോളി വര്ഗ്ഗീസ് ചേകവര്', 'മാനസം', 'അഗ്നിദേവന്' (വേണുനാഗവള്ളിയും ചേര്ന്ന്), 'പുനരധിവാസം', 'പോലീസ്', 'കമ്മട്ടിപ്പാടം', 'എടക്കാട് ബറ്റാലിയന്' തുടങ്ങിയ ചിത്രങ്ങള്ക്ക് തിരക്കഥയും സംഭാഷണവുമെഴുതി.
തൃശൂര് സ്കൂള് ഓഫ് ഡ്രാമയിലെ ആദ്യ ബാച്ച് വിദ്യാര്ഥിയായി അഭിനയ പരിചയം നേടുകയും 'വക്കാലത്ത് നാരായണന് കുട്ടി', 'ശേഷം', 'പുനരധിവാസം', 'ശിവം', 'ജലമര്മ്മരം', 'ട്രിവാന്ഡ്രം ലോഡ്ജ്', 'ഇവര്', 'ബ്യൂട്ടിഫുള്', 'ഇമ്മാനുവല്', 'അന്നയും റസൂലും', 'കടല് കടന്നൊരു മാത്തുക്കുട്ടി', 'സൈലന്റ്', 'ചാര്ലി', 'കമ്മട്ടിപ്പാടം' തുടങ്ങിയ ചിത്രങ്ങളില് ശ്രദ്ധേയമായ കഥാപാത്രങ്ങളെ അദ്ദേഹം അവതരിപ്പിച്ചു.
1989ലെ മികച്ച നാടകരചനക്കുള്ള കേരള സാഹിത്യ അക്കാദമി അവാര്ഡ് പി ബാലചന്ദ്രന് 'പാവം ഉസ്മാന്' നേടിക്കൊടുത്തു. കേരളസംസ്ഥാന പ്രൊഫഷണല് നാടക അവാര്ഡ് 1989ല് നേടി. 'പ്രതിരൂപങ്ങള്' എന്ന നാടകരചനക്കായിരുന്നു അത്.
'പുനരധിവാസം' എന്ന ചിത്രത്തിന്റെ തിരക്കഥക്ക് 1999ലെ കേരള ചലച്ചിത്ര അക്കാദമി അവാര്ഡ് നേടി. മികച്ച നാടക രചനക്കുള്ള 2009ലെ കേരള സംഗീതനാടക അക്കാദമി അവാര്ഡും പി ബാലചന്ദ്രനായിരുന്നു.
ഭാര്യ ശ്രീലത. രണ്ട് മക്കള് പാര്വ്വതി, ശ്രീകാന്ത്. സംസ്കാരം വൈകീട്ട് മൂന്നുമണിക്ക് സ്വവസതിയില്.