സി എന്‍ എ-
തിരു:
മുതിര്‍ന്ന നാടകപ്രവര്‍ത്തകനും സീരിയല്‍, സിനിമ നടനുമായ പി.സി. സോമന്‍ അന്തരിച്ചു. 81 വയസ്സായിരുന്നു.
ഇന്ന് വെളുപ്പിന് നാലു മണിക്കായിരുന്നു അന്ത്യം.
അടൂര്‍ ഗോപാലകൃഷ്ണന്റെ സിനിമകളിലും നിരവധി സീരിയലുകളിലും അഭിനയിച്ചു ജനശ്രദ്ധ നേടി.
1972ല്‍ അടൂര്‍ ഗോപാലകൃഷ്ണന്‍ സംവിധാനം ചെയ്ത 'സ്വയംവരം' ആയിരുന്നു പി.സി. സോമന്‍ അഭിനയിച്ച ആദ്യ ചിത്രം. മലയാളം ദൂരദര്‍ശന്റെ ആദ്യ കാലങ്ങളില്‍ സജീവമായിരുന്ന അദ്ദേഹം നിരവധി സീരിയലുകളിലും അഭിനയിച്ചിട്ടുണ്ട്.
ഗായത്രി, കൊടിയേറ്റം, മുത്താരംകുന്ന് പി.ഒ, അച്ചുവേട്ടന്റെ വീട്, ഇരുപതാം നൂറ്റാണ്ട്, മതിലുകള്‍, ചാണക്യന്‍, കൗരവര്‍, ധ്രുവം, ഇലയും മുള്ളും, വിധേയന്‍, അഗ്‌നിദേവന്‍, കഴകം, കഥാപുരുഷന്‍, നിഴല്‍ക്കുത്ത്, ഒരു പെണ്ണും രണ്ടാണും, ധ്രുവം, കൗരവര്‍, ഇരുപതാം നൂറ്റാണ്ട്, ഫയര്‍മാന്‍ തുടങ്ങി 65 ഓളം സിനിമകളില്‍ അഭിനയിച്ചിട്ടുണ്ട്.
തിലകനും രാജന്‍ പി ദേവിനുമൊപ്പം അതേ കാലഘട്ടത്തില്‍ നാടകവേദികളിലെ നിറസാന്നിധ്യമായിരുന്നു സോമന്‍. പത്താം വയസിലാണ് നാടക രംഗത്തേക്ക് ചുവടുവെച്ചത്. പിന്നീട് നാടകകുലപതികളോടൊപ്പം അരങ്ങ് പങ്കിടുവാനും അവസരം ലഭിച്ചിട്ടുണ്ട്.
ജഗതി എന്‍ കെ ആചാരിയുടെ കൂടെ ഒരുപാട് നാടകങ്ങളും അദ്ദേഹത്തിന്റെ മകന്‍ ജഗതി ശ്രീകുമാറിന്റെ കൂടെയും അഭിനയിക്കാനുള്ള അവസരം ലഭിച്ച കലാകാരനായിരുന്നു പിസി സോമന്‍.
അമച്വര്‍ നാടകങ്ങളുള്‍പ്പെടെ 350ഓളം നാടകങ്ങളില്‍ ചെറുതും വലുതുമായ ധാരാളം വേഷങ്ങള്‍ അഭിനയിച്ചിട്ടുള്ള വ്യക്തിയാണ് പി.സി. സോമന്‍. ട്രാന്‍വന്‍കൂര്‍ ടൈറ്റാനിയത്തിലെ ജീവനക്കാരനാണ്.
പ്രമുഖ നാടക പ്രവര്‍ത്തകനും സിനിമാനടനുമായ പി സി സോമന്റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു.
