സി എന്‍ എ-
തലശ്ശേരി:
മലബാറിലെ ആദ്യത്തെ ചലച്ചിത്ര സംവിധായകനും ദേശീയ അവാര്‍ഡ് ജേതാവുമായ അന്തരിച്ച പി പി ഗോവിന്ദന്റെ സ്മരണ നിലനിര്‍ത്തുന്നതിനായി കാസര്‍കോട് മുതല്‍ മലപ്പുറം വരെയുള്ള ചലചിത്ര സംവിധായകരുടെ കൂട്ടായ്മയായ മലബാര്‍ ഫിലിം ഡയറക്‌റ്റെഴ്‌സ് ക്ലബ്ബ് ഏര്‍പ്പെടുത്തിയ മികച്ച സംവിധായകനുള്ള ഈ വര്‍ഷത്തെ പി പി ഗോവിന്ദന്‍ പുരസ്‌കാരം പ്രശസ്ത ചലച്ചിത്ര സംവിധായകന്‍ കെ പി കുമാരന് നല്‍കും.
വി കെ ജോസഫ് ജൂറി ചെയര്‍മാനായും, സലിം അഹമ്മദ്, നീലന്‍ എന്നവര്‍ ജൂറി അംഗങ്ങളായുള്ള സമിതിയാണ് മികച്ച സംവിധായകനെ തെരഞ്ഞെടുത്തത്.
'ഗ്രാമവൃക്ഷത്തിലെ കുയില്‍' എന്ന സിനിമയുടെ സംവിധാന മികവാണ് കെ പി കുമാരനെ അവാര്‍ഡിന് അര്‍ഹനാക്കിയത്.
പതിനായിരം രൂപയും പ്രശസ്തി പത്രവും ശില്‍പവും അടങ്ങുന്നതാണ് പുരസ്‌കാരം.
പുരസ്‌കാരം കെ പി കുമാരന്റെ തിരുവനന്തപുരത്തുള്ള വസതിയില്‍ വെച്ച് സമ്മാനിക്കുമെന്ന് മലബാര്‍ ഫിലിം ഡയറക്‌റ്റേഴ്‌സ് ക്ലബ്ബ് പ്രസിഡന്റ് പ്രദീപ് ചൊക്ലി, ഷെറി (ജനറല്‍ സെക്രട്ടറി), സന്തോഷ് മണ്ടൂര്‍ (ട്രഷറര്‍), ഷെരീഫ് ഈസ(ജോ: സെക്രട്ടറി) ഗിരീഷ് കുന്നുമ്മല്‍(പി ആര്‍ ഓ) തുടങ്ങിയവര്‍ വാര്‍ത്ത കുറിപ്പില്‍ അറിയിച്ചു.
