സി എന്‍ എ-
പത്തനാപുരം:
ചലച്ചിത്രനാടക നടിയും ഡബ്ബിങ് ആര്‍ട്ടിസ്റ്റും ഗായികയുമായിരുന്ന പാലാ തങ്കം(84) അന്തരിച്ചു. ഇന്നലെ രാത്രി 7.35 ഓടെയായിരുന്നു അന്ത്യം.
2013 മുതല്‍ പത്തനാപുരം ഗാന്ധിഭവന്‍ അന്തേവാസിയാണ്. വാര്‍ധക്യസഹജമായ അസുഖങ്ങളെ തുടര്‍ന്ന് ഗാന്ധിഭവന്‍ പാലിയേറ്റീവ് കെയറില്‍ ചികിത്സയിലിരിക്കെയാണ് അന്ത്യം.
കോട്ടയം വേളൂര്‍ തിരുവാതുക്കല്‍ ശരത്ചന്ദ്രഭവനില്‍ കുഞ്ഞുക്കുട്ടന്റെ മകളായി ജനിച്ച രാധാമണി കലാരംഗത്ത് എത്തിയതോടെ പാലാ തങ്കം എന്ന പേരു സ്വീകരിക്കുകയായിരുന്നു. പതിനഞ്ചാം വയസ്സില്‍ ആലുവ അജന്ത സ്റ്റുഡിയോ ഉടമ ആലപ്പി വിന്‍സന്റിന്റെ 'കെടാവിളക്ക്' എന്ന ചിത്രത്തില്‍ 'താരക മലരുകള്‍ വാടി, താഴത്തു നിഴലുകള്‍ മൂടി' എന്ന ഗാനം പാടിയാണ് സിനിമാരംഗത്തേക്ക് എത്തിയത്.
നൂറോളം സിനിമകളില്‍ അഭിനയിക്കുകയും അഞ്ഞൂറോളം സിനിമകളില്‍ കഥാപാത്രങ്ങള്‍ക്കു ശബ്ദം നല്‍കുകയും ചെയ്തു.
2018ല്‍ സംഗീത നാടക അക്കാദമി ഗുരുപൂജ പുരസ്‌കാരം നല്‍കി ആദരിച്ചു. 'കിണര്‍' എന്ന സിനിമയിലാണ് ഒടുവില്‍ അഭിനയിച്ചത്.
എസ് ഐആയിരുന്ന ഭര്‍ത്താവ് ശ്രീധരന്‍ തമ്പി 25 വര്‍ഷം മുന്‍പു മരിച്ചു.
പരേതയായ ഡബ്ബിങ് ആര്‍ട്ടിസ്റ്റ് അമ്പിളി, സോമശേഖരന്‍ തമ്പി, ബാഹുലേയന്‍ തമ്പി എന്നിവരാണു മക്കള്‍.
സംസ്‌കാരം പിന്നീട്.
