സി എന്‍ എ
കൊച്ചി:
ഒരേ സമയം നാല് ഒടിടി ഫ്‌ലാറ്റ്‌ഫോമുകളില്‍ റിലീസായ 'പാപ്പന്റേം സൈമന്റേം പിള്ളേര്‍' എന്ന സിനിമയ്ക്ക് മികച്ച അഭിപ്രായം നേടുമ്പോള്‍, ഈ ചിത്രത്തിലൂടെ, ഗായകനായും, അഭിനേതാവായും കടന്ന് വന്ന പ്രവാസി മലയാളിയായ കാരുര്‍ ഫാസില്‍ ശ്രദ്ധേയനാവുന്നു.
അബുദാബിയിലെ ഒരു സ്വകാര്യ കമ്പനിയില്‍ അക്കൗണ്ടന്റായി ജോലി ചെയ്യുന്ന കാരൂര്‍ ഫാസില്‍, 'പാപ്പന്റേം സൈമന്റേം പിള്ളേര്‍' എന്ന ചിത്രത്തില്‍ രണ്ട് ഗാനങ്ങള്‍ പാടുകയും, മികച്ചൊരു കഥാപാത്രത്തെ അവതരിപ്പിക്കുകയും ചെയ്ത്, ശ്രദ്ധേയനായിരിക്കുകയാണ്.
രണ്ട് ഗാനങ്ങളും ഇതിനോടകം തന്നെ സോഷ്യല്‍ മീഡിയകളില്‍ ശ്രദ്ധനേടി.
നിരവധി സ്‌റ്റേജ് ഷോകളിലും, കാസറ്റുകളിലും പാടിയിട്ടുള്ള ഫാസില്‍, പാപ്പന്റേം സൈമന്റേം പിള്ളേര്‍ എന്ന സിനിമയിലൂടെ പിന്നണി ഗാന രംഗത്തേക്ക് കടന്ന് വന്നിരിക്കുകയാണ്. കാരൂര്‍ കൊമ്പൊടിഞ്ഞാമക്കല്‍ സ്വദേശിയായകാരൂര്‍ ഫാസിലിനെ, നിരവധി പേരാണ് ആദ്യ ദിവസം സിനിമ കണ്ട് അനുമോദിച്ചത്.
ഒരു കാലിക പ്രസക്തമായ വിഷയമാണ് ഈ സിനിമ അവതരിപ്പിക്കുന്നത്. നിരവധി ഹ്രസ്വ സിനിമകള്‍ കൈകാര്യം ചെയ്ത ഷിജോ വര്‍ഗീസ് തിരക്കഥ എഴുതി സംവിധാനം ചെയ്ത 'പാപ്പന്റേം സൈമന്റേം പിള്ളേര്‍', സ്വിസ് ടെലി മീഡിയയുടെ ബാനറില്‍ ആണ് ഒരുക്കിയിരിക്കുന്നത്.
യുവതലമുറക്കുള്ള സന്ദേശത്തോടൊപ്പം, രക്ഷിതാക്കള്‍ക്ക് ഒരു മുന്നറിയിപ്പ് കൂടി നല്‍കുകയാണ് ഈ ചിത്രം.
ജെയിംസ് പാറക്ക, കോട്ടയം പ്രദീപ്, കണ്ണൂര്‍ വാസൂട്ടി, ബിനു അടിമാലി, നാരായണന്‍കുട്ടി, ശിവാനന്തന്‍, ശാന്തകുമാരി എന്നിവരാണ് മറ്റ് അഭിനേതാക്കള്‍.
- അയ്മനം സാജന്‍.
