Editor - MM Kamath
കൊച്ചി:
ജോസഫിനും, വിശാലമായ ക്യാന്‍വാസില്‍ ചിത്രീകരിച്ച മാമാങ്കത്തിനും ശേഷം എം.പത്മകുമാര്‍ സംവിധാനം ചെയ്യുന്ന പുതിയ ചിത്രമായ 'പത്താം വളവ്' നിരവധി സവിശേഷതകളോടെയാണ് ഒരുങ്ങുന്നത്.
യു.ജി.എം. എന്റര്‍ടെയിന്‍മെന്റിന്റെ ബാനറില്‍ ഡോ. സഖറിയ തോമസ്, ജിജോ കാവനാല്‍, ശ്രീജിത്ത് രാമചന്ദ്രന്‍, പ്രിന്‍സ് പോള്‍ എന്നിവരാണ് ഈ ചിത്രം നിര്‍മ്മിക്കുന്നത്.
ഈ ചിത്രത്തിന്റെ ആദ്യ ഘട്ട ചിത്രീകരണം തൊടുപുഴ, വാഗമണ്‍, എന്നിവിടങ്ങളിലായി പൂര്‍ത്തിയായിരിക്കുന്നു.
ഏതാനും വര്‍ഷങ്ങള്‍ക്ക് മുമ്പ് കേരള ജനതയുടെ മന:സാക്ഷിയെ ഞെട്ടിച്ച ഒരു യഥാര്‍ത്ഥ സംഭവത്തില്‍ നിന്നും പ്രചോദനം ഉള്‍ക്കൊണ്ടു കൊണ്ടാണ് ഈ ചിത്രത്തെ അവതരിപ്പിക്കുന്നത്.
കുടുംബ പശ്ചാത്തലത്തിലുള്ള ഒരു ത്രില്ലര്‍ സിനിമയായിരിക്കും 'പത്താം വളവ്'.
സുരാജ് വെഞ്ഞാറമൂടും ഇന്ദ്രജിത്തുമാണ് ഈ ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.
ഇരുവരുടേയും അഭിനയ ജീവിതത്തിലെ തികച്ചും വ്യത്യസ്ഥമായ കഥാപാത്രങ്ങളെയാണ് ഇരുവരും അവതരിപ്പിക്കുന്നത്.
മലയാള സിനിമയിലെ നായികാ പദവിയില്‍ ഏറെ തിളങ്ങിയിരുന്ന മുക്തയുടെ മകള്‍ അഞ്ചു വയസ്സുകാരി കണ്മണി ചിത്രത്തിലെ മുഖ്യ വേഷത്തിലെത്തുന്നുണ്ട്.
ചെറുപ്രായത്തില്‍ത്തന്നെ സംഗീതം, മോണോ ആക്ട് തുടങ്ങി നിരവധി കലാരംഗങ്ങളില്‍ മികവു പ്രകടിപ്പിക്കാന്‍ അവസരം ലഭിച്ച കുട്ടിയാണ് കണ്മണി.
യുട്യൂബ് ചാനലിലൂടെ ലക്ഷക്കണക്കിനു പ്രേക്ഷകരുടെ ഇഷ്ട കഥാപാത്രമായി മാറിയ കുട്ടിയാണ്.
റിമി ടോമിയുടെ യുടൂബ് ചാനലിലെ കുക്കറി ഷോ കണ്മണി ഏറെ പ്രശസ്തയാണ്.
റിമി ടോമിയുടെ സഹോദരനാണ് മുക്തയുടെ ഭര്‍ത്താവ്.
ഒരു പുതിയ തിരക്കഥാകൃത്തിനേക്കൂടി പത്മകുമാര്‍ മലയാള സിനിമക്കു പരിചയപ്പെടുത്തുന്നുണ്ട്.
അഭിലാഷ് പിള്ള.
അമലാ പോള്‍ നിര്‍മ്മിച്ച്, ഏറെ ശ്രദ്ധേയമായ 'കഡാവര്‍', എന്ന തമിഴ് ചിത്രത്തിന് തിരക്കഥ രചിച്ചു കൊണ്ടാണ് അഭിലാഷ് പിള്ളയുടെ സിനിമയിലേക്കുള്ള കടന്നുവരവ്.
മലയാളത്തിലെ ആദ്യ ചിത്രമാണ് 'പത്താം വളവ്'.
അദിതി രവി, സ്വാസികയുമാണ് നായികമാര്‍.
സോഹന്‍ സീനു ലാല്‍, അനീഷ് ജി. മേനോന്‍, ജാഫര്‍ ഇടുക്കി, രാജേഷ് ശര്‍മ്മ, നിസ്താര്‍ അഹമ്മദ്, ബോബന്‍ സാമുവല്‍, ഷാജു ശ്രീധര്‍, ബേബി കിയാറ, റിങ്കു ടോമി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
രഞ്ജിന്‍ രാജിന്റേതാണ് സംഗീതം.
രതീഷ് റാം ഛായാഗ്രഹണവും ഷമീര്‍ മുഹമ്മദ് എഡിറ്റിംഗും നിര്‍വ്വഹിക്കുന്നു.
കലാസംവിധാനം- രാജീവ് കോവിലകം, മേക്കപ്പ്- ജിതേഷ് പൊയ്യ, കോസ്റ്റ്യും ഡിസൈന്‍- അയിഷാ ഷഫീര്‍, സ്റ്റണ്ട് കൊറിയോഗ്രാഫി- മാഫിയ ശശി, ചീഫ് അസ്സോസ്സിയേറ്റ് ഡയറക്ടര്‍- ഉല്ലാസ് കൃഷ്ണ,
പ്രൊജക്റ്റ് ഡിസൈന്‍- നോബിള്‍ ജേക്കബ്, പ്രൊഡക്ഷന്‍ എക്‌സിക്കുട്ടീവ്- ഷിഹാബ് വെണ്ണല.
ഈ ചിത്രത്തിന്റെ രണ്ടാം ഘട്ട ചിത്രീകരണം ഉടന്‍ ആരംഭിക്കുന്നു.
- വാഴൂര്‍ ജോസ്.
Online PR - CNA.
