സി എന്‍ എ-
ചെന്നൈ:
തമിഴിലെ മുന്‍നിര സംവിധായകരായ ഗൗതം വാസുദേവ് മേനോന്‍, സുധാ കൊങ്കാര, വെട്രിമാരന്‍, വിഘ്‌നേഷ് ശിവന്‍ എന്നിവര്‍ ചേര്‍ന്നൊരുക്കുന്ന ആന്തോളജി 'പാവ കഥൈകളി'ല്‍ കാളിദാസ് ജയറാമും ശന്തനുവും പ്രധാന കഥാപാത്രങ്ങളെ അവതരിപ്പിക്കുന്ന സുധ കൊങ്കാര സംവിധാനം ചെയ്ത 'തങ്കം' എന്ന ചിത്രത്തിന്റെ ടീസര്‍ റിലീസ് ചെയ്തു. തങ്കത്തില്‍ അതിമനോഹരമായ അഭിനയമാണ് കാളിദാസ് കാഴ്ചവെച്ചിരിക്കുന്നത്. കാളിദാസിന്റെ ഏറ്റവും ശ്രദ്ധേയമാകാന്‍ പോകുന്ന മുഖമായിരിക്കും സുധ കൊങ്കാരയുടെ ചിത്രത്തിലെ സത്താര്‍ എന്ന കഥാപാത്രം.
ഗൗതം വാസുദേവ് മേനോന്‍ സംവിധാനം ചെയ്യുന്ന 'വന്‍മകള്‍' എന്ന സിനിമയില്‍ ഗൗതം മേനോനും സിമ്രാനും പ്രധാന കഥാപാത്രങ്ങളെ അവതരിപ്പിക്കുന്നു. വിഘ്‌നേശ് ശിവന്റെ 'ലവ് പണ്ണ ഉട്രനും' എന്ന ചിത്രത്തില്‍ അഞ്ജലിയും കല്‍ക്കിയും ആണ് പ്രധാന അഭിനേതാക്കള്‍. വെട്രിമാരന്‍ സംവിധാനം ചെയ്യുന്ന 'ഇരവി'ല്‍ പ്രകാശ് രാജ്, സായ്പല്ലവി, ഹരി എന്നിവരാണ് പ്രധാന അഭിനേതാക്കള്‍. വ്യക്തികളുടെ സ്വാതന്ത്ര്യത്തെയും തെരഞ്ഞെടുപ്പിനെയും സമൂഹം എങ്ങനെ കാണുന്നു എന്നതാണ് ആന്തോളജിയുടെ പ്രമേയം. 'പാവകഥൈകള്‍' എന്ന അര്‍ത്ഥത്തിലാണ് ചിത്രമൊരുങ്ങുന്നത്. ബോളിവുഡിലെ മുന്‍നിര നിര്‍മാതാവായ റോണി സ്‌ക്രൂവാലയുടെ ആര്‍ എസ് വി പി മൂവീസ് ആണ് ചിത്രം നിര്‍മ്മിക്കുന്നത്. ഡിസംബര്‍ 18 മുതല്‍ നെറ്റ് ഫ്‌ലിക്‌സില്‍ ചിത്രം സ്ട്രീം ചെയ്തു തുടങ്ങുമെന്ന് പറയുന്നു.
