സി എന്‍ എ-
കൊച്ചി:
റോട്ടര്‍ഡാം രാജ്യാന്തര ചലച്ചിത്ര മേളയിലെ മെയിന്‍ കോമ്പറ്റീഷന്‍ വിഭാഗത്തില്‍ തമിഴ് ചിത്രമായ 'കൂഴാങ്കല്‍' 'ടൈഗര്‍ പുരസ്‌കാരം' നേടി. പി എസ് വിനോദ് രാജ് സംവിധാനം ചെയ്ത ചിത്രമാണ് 'കൂഴാങ്കല്‍' (Pebbles). ലേഡി സൂപ്പര്‍ സ്റ്റാര്‍ നയന്‍താരയും ജീവിതപങ്കാളി വിഘ്‌നേഷും ചേര്‍ന്നാണ് സിനിമ നിര്‍മ്മിച്ചിരിക്കുന്നത്.
മദ്യപാനിയായ ഭര്‍ത്താവിന്റെ നിരന്തരമായ ഉപദ്രവം സഹിക്കാനാവാതെ ചെറിയ കുഞ്ഞിനെയുമെടുത്ത് വീട് വിട്ടിറങ്ങിപ്പോയ ഭാര്യയെ തിരികെ കൊണ്ടു വരാന്‍ ഭര്‍ത്താവും മകനും ചേര്‍ന്ന് നടത്തുന്ന യാത്രയാണ് സിനിമയുടെ പ്രമേയം. അച്ഛന്റെയും മകന്റെയും വ്യത്യസ്തമായ കാഴ്ചകളിലൂടെയാണ് സിനിമ വികസിക്കുന്നത്. 'പൊട്ടല്‍ വെളി' എന്ന് തമിഴില്‍ പറയുന്ന തരിശ്ഭൂമി ചിത്രത്തില്‍ വലിയൊരു കഥാപാത്രമായി നില്‍ക്കുന്നു. യുവന്‍ശങ്കര്‍ രാജയുടേതാണ് പശ്ചാത്തല സംഗീതം.
നടിയും സംവിധായികയുമായ ഗീതു മോഹന്‍ദാസാണ് പുരസ്‌കാര വിവരം പുറത്തുവിട്ടത്. 'പെബിള്‍സ്' മികച്ച ചിത്രമാണെന്നും എല്ലാവരും പോയി കാണണമെന്നും ഗീതു മോഹന്‍ദാസ് ഫേയ്‌സ്ബുക്ക് പോസ്റ്റില്‍ കുറിച്ചു. മേളയില്‍ പുരസ്‌കാരം നേടുന്ന രണ്ടാമത്തെ ഇന്ത്യന്‍ ചിത്രമാണിത്. സനല്‍ കുമാര്‍ ശശിധരന്റെ 'ദുര്‍ഗ'യായിരുന്നു ആദ്യ ചിത്രം.
