സി എന് എ-
കൊച്ചി:
ലോക നിലവാരത്തിലുള്ള നൂതന സാങ്കേതിക സംവിധാനങ്ങളുടെ പിന്ബലത്തില് പുതിയൊരു ചലച്ചിത്ര സംരംഭത്തിന് തുടക്കം കുറിക്കുകയാണ് നടന് പ്രിത്വിരാജ്. പൂര്ണമായും വെര്ച്വല് പ്രൊഡക്ഷനില് ചിത്രീകരിക്കുന്ന ബ്രഹ്മാണ്ഡ സിനിമയാണ് പൃഥ്വിരാജിന്റെ ലക്ഷ്യം. കലാ രംഗത്ത് മാത്രമല്ല സാങ്കേതിക രംഗത്തും വിപ്ലവം സൃഷ്ടിക്കുന്ന ആവേശകരമായ പുതിയൊരു ചലച്ചിത്ര ചരിത്രമായിരിക്കും പൃഥ്വിരാജ് നിര്മ്മിക്കുന്ന ഈ സിനിമ.
മലയാള ചലച്ചിത്ര വേദി വളരെ പ്രതീക്ഷയോടെയാണ് വെര്ച്വല് പ്രൊഡക്ഷനെ വീക്ഷിക്കുന്നത്. ഗോകുല് രാജ് ഭാസ്കര് സംവിധാനം ചെയ്യുന്ന സിനിമയില് പൃഥ്വിരാജ് കേന്ദ്ര കഥാപാത്രത്തെ അവതരിപ്പിക്കും. കാലഘട്ടം മാറുകയാണ്. സമയം മാറുന്നു. പുതിയ വെല്ലുവിളികള്, പുതിയ രീതികള്, പറയാന് ഇതിഹാസ കഥയും... വെര്ച്വല് സിനിമയെക്കുറിച്ച് പൃഥ്വിരാജ് കുറിച്ചത് ഇങ്ങനെയാണ്.
വെര്ച്വല് പ്രൊഡക്ഷന് ഉപയോഗിച്ച് ഇന്ത്യയില് ചിത്രീകരിക്കുന്ന ആദ്യസിനിമയാണിത്. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളില് ഒരേ സമയം ചിത്രീകരിക്കുന്ന സിനിമയാണിത്. 'ബാഹുബലി' പോലെ ബ്രഹ്മാണ്ഡമായൊരു ഇതിഹാസ കഥാചിത്രമായിരിക്കും ഒരുക്കുക. വിവിധ ഭാഷാ ചിത്രങ്ങളില് നിന്നുള്ള അഭിനേതാക്കളും ടെക്നീഷ്യന്മാരും സിനിമയുടെ ഭാഗമാകും.
എന്താണ് വെര്ച്വല് സിനിമ? അതിന്റെ പ്രൊഡക്ഷന് എങ്ങനെയാണ്? സാധ്യതകള് എന്തൊക്കെയാണ്?
വെര്ച്വല് പ്രൊഡക്ഷന്സ് എന്നുപറഞ്ഞാല് കമ്പ്യൂട്ടര് ഗ്രാഫിക്സ് ഉപയോഗിച്ച് നിര്മ്മിക്കുന്ന സാങ്കല്പ്പിക ലോകത്ത്, യഥാര്ത്ഥമായ വസ്തുക്കളെയും മനുഷ്യരെയും മറ്റും അനുയോജ്യമായ രീതിയില് മോഷന് ക്യാപ്ച്ചര് എന്ന നൂതന സാങ്കേതിക വിദ്യ ഉപയോഗിച്ച് ചിത്രീകരിക്കുന്ന രീതിയാണ് വെര്ച്വല് പ്രൊഡക്ഷന്സ്. സാങ്കേതിക വിദ്യയുടെ സഹായത്തോടെ തയ്യാറാക്കിയ മോഷന് ക്യാപ്ച്ചര് സ്റ്റേജുകളിലാണ് യഥാര്ത്ഥ കഥാപാത്രങ്ങള് അഭിനയിക്കുക. ഗ്രീന് സ്ക്രീന് ഉപയോഗിച്ച് ചിത്രീകരിക്കുന്ന അത്തരം രംഗങ്ങളെ ഡിജിറ്റല് ലോകത്തേക്ക് പറിച്ചുനടുകയാണ് ചെയ്യുന്നത്. ആ ഒരു സാങ്കേതിക സങ്കലനം ശ്രമകരമായ വലിയ ദൗത്യം തന്നെയാണ് നിര്വഹിക്കുന്നത്.
ഹോളിവുഡ് സിനിമകളില് ധാരാളമായി ഇത്തരം സംവിധാനങ്ങള് ഉപയോഗപ്പെടുത്താറുണ്ട്. ടെക്നോളജിയുടെ ഏറ്റവും മികച്ച ഉദാഹരണമാണ് ലോകം ശ്രദ്ധിച്ച 'അവതാര്' എന്ന ചിത്രം. ആ സിനിമയില് കാണുന്ന ലോകം പൂര്ണമായും കമ്പ്യൂട്ടര് സാങ്കേതിക വിദ്യ ഉപയോഗിച്ച് നിര്മിച്ചതാണ്. വെര്ച്വല് പ്രൊഡക്ഷന്സിന്റെ ഏറ്റവും സമ്പന്നമായ ഉദാഹരണമാണ് അത്തരം ചിത്രങ്ങള്.
പൃഥ്വിരാജ് സിനിമയുടെ പ്രൊഡക്ഷന് വര്ക്കുകള് ഫൈനല് ഘട്ടത്തിലാണ്.
2020 ഡിസംബറില് സിനിമ പ്ലാന് ചെയ്തെങ്കിലും ലോക്ക്ഡൗണിന്റെ പശ്ചാത്തലത്തില് നീട്ടിവെക്കുകയായിരുന്നു. ധാരാളം ടെക്നിക്കല് സംവിധാനങ്ങള് ഒരുക്കാനുള്ളതും ഒരു കാരണമായിരുന്നു. സംവിധായകന് ഉള്പ്പെടെയുള്ള ടെക്നിക്കല് ക്രൂ അതിന്റെ പ്രവര്ത്തനങ്ങളിലാണ്. അതെ സമയം ഏറ്റെടുത്ത മറ്റു ചിത്രങ്ങള് പൂര്ത്തിയാക്കാനുള്ള ശ്രമത്തിലാണ് പൃഥ്വിരാജ്.