സി. കെ. അജയകുമാര്-
ഹൈദരാബാദ്:
ദുബായിലെ റാസല് ഖൈമയില് ജനിച്ച്, യൂ കെ യിലെ ലിവര്പൂളില് പഠിച്ചു വളര്ന്ന പ്രവാസി മലയാളിയായ പ്രിയാലാലിന് നൃത്തവും അഭിനയവും പാഷനാണ്. സിനിമയില് അഭിനയിക്കാനുള്ള ആഗ്രഹം കൊണ്ട് കൊച്ചിയില് താമസമാക്കിയിരിക്കുന്ന പ്രിയാലാല് മലയാളം, തമിഴ്, തെലുങ്ക് എന്നീ ഭാഷാ ചിത്രങ്ങളില് അഭിനയിച്ചു കഴിഞ്ഞു.
ചെറുപ്പം മുതല് ഭരതനാട്യം, മോഹിനിയാട്ടം, പാശ്ചാത്യ നൃത്തം എന്നിവയില് പ്രാവീണ്യം നേടിയിട്ടുള്ള ക്ലാസിക്കല് നര്ത്താകിയായ പ്രിയ രണ്ടു വര്ഷം 'ലിവര്പൂള് കലാതിലക'മായിരുന്നു. സിനിമയോട് താല്പര്യമുണ്ടായിരുന്നെങ്കിലും വിദേശത്തായത് കൊണ്ടും സിനിമാ ബന്ധങ്ങള് ഇല്ലാത്തതിനാലും കാര്യമായ പരിശ്രമൊന്നും നടത്താനായില്ല. തികച്ചും അവിചാരിതമായിട്ടാണ് തന്റെ പതിമൂന്നാം വയസ്സില്, അവധികാലത്ത് നാട്ടിലെത്തിയപ്പോള് ആദ്യമായി ക്യാമറയുടെ മുന്നിലെത്തിയത്.
ഒരു കുടുംബ സുഹൃത്ത് മുഖേന 'ജനകന്' എന്ന സിനിമയില് സുരേഷ് ഗോപിയുടെ മകളുടെ വേഷം ചെയ്തു. ഷൂട്ടിംഗ് കഴിഞ്ഞപ്പോഴേക്കും അവധി തീര്ന്നു... ലിവര് പൂളിലേക്ക് മടങ്ങിപോയി. പഠിത്തവും ഉപരിപഠനവുമൊക്കെ കഴിഞ്ഞു നാട്ടില് തിരിച്ചെത്തി കൊച്ചിയില് താമസമാക്കിയ ശേഷം തമിഴില് പ്രശസ്ത സംവിധായകന് സുശീന്ദ്രന്റെ 'ജീനിയസ്' എന്ന സിനിമയില് നായികയവേഷം ചെയ്തു. മലയാളത്തില് ശരത്ചന്ദ്രന് വയനാട് സംവിധാനം ചെയുന്ന 'മയില്' എന്ന സിനിമയില് അഭിനയിക്കുന്നു.
തെലുങ്കില് രാംഗോപാല് വര്മ്മയുടെ സഹസംവിധായകന് മോഹന് ബൊമ്മിഡി സംവിധാനം ചെയ്ത 'ഗുവ ഗോരിങ്ക' (Love Birds)യില് നായികയായാണ്. തെലുങ്ക് യുവതാരം സത്യദേവാണ് നായകന്. സമ്മറില് റിലീസാകേണ്ടിയിരുന്ന ഈ തെലുങ്കു സിനിമ കോവിഡ് ലോക്ക് ഡൗണ് കാരണം വൈകി. ഡിസംബര് 17ന് ആമസോണ് പ്രൈമിലൂടെ 'ഗുവ ഗോരിങ്ക' റിലീസാവുകയാണ്. ഒരു പ്രണയ കഥയെ അവലംബമാക്കിയുള്ള ചിത്രത്തിന്റെ ട്രെയിലറിനും ഗാനങ്ങള്ക്കും ആരാധകര്ക്കിടയില് വലിയ സ്വീകരണമാണ് ലഭിക്കുന്നത്.
'തമിഴ്, തെലുങ്ക് സിനിമയില് നിന്നും ഒട്ടനവധി ഓഫറുകള് വരുന്നുണ്ടെങ്കിലും എണ്ണത്തില് കുറച്ചു സിനിമകള് ചെയ്താലും പ്രേക്ഷക മനസ്സില് തങ്ങി നില്ക്കുന്ന നല്ല കഥയും, കഥാപാത്രങ്ങളും തിരഞ്ഞെടുത്തു ചെയ്യണമെന്നാണ് ആഗ്രഹിക്കുന്നതെന്ന്' പ്രിയ ലാല് പറയുന്നു.