സി എന്‍ എ-
മുംബൈ:
കോമഡി ചിത്രങ്ങളായ 'ഹേര ഫേരി', 'ഗരം മസാല', 'ദേ ദനാ ദന്‍', 'ഭൂല്‍ ഭുലയ്യ' തുടങ്ങിയ ചിത്രങ്ങള്‍ക്ക് ശേഷം അക്ഷയ് കുമാറിനെ നായകനാക്കി പ്രിയദര്‍ശന്‍ ഒരുക്കുന്ന കോമഡി ത്രില്ലര്‍ ചിത്രത്തിന്റെ ചിത്രീകരണം 2021 സെപ്റ്റംബറില്‍ ആരംഭിക്കുമെന്നു പ്രിയദര്‍ശന്‍ വ്യക്തമാക്കി. 2020 ഡിസംബറില്‍ ചിത്രീകരണമാരംഭിക്കാനിരുന്ന സിനിമയാണ് ഇന്നത്തെ പുതിയ സാഹചര്യത്തില്‍ സെപ്റ്റംബര്‍ലേക്ക് മാറ്റിയിരിക്കുന്നത്.
കോമഡി ചിത്രമാണ് പ്രേക്ഷകര്‍ പ്രതീക്ഷിക്കുന്നതെങ്കിലും അക്ഷയ്‌ക്കൊപ്പം ഒരു സീരിയസ് ചിത്രം ചെയ്യാനാണു ആലോചിക്കുന്നതെന്ന് പ്രിയദര്‍ശന്‍ പറയുന്നു. മോഹന്‍ലാല്‍ കഴിഞ്ഞാല്‍ അക്ഷയ്‌ക്കൊപ്പം പ്രവര്‍ത്തിക്കാനാണ് ഏറ്റവും സുഖം. കാരണം താങ്കള്‍ എന്താണ് ചെയ്യുന്നതെന്ന് അദ്ദേഹം ചോദിക്കില്ല. ഞാന്‍ എന്തൊക്കെയാണ് ചെയ്യുന്നതെന്ന് അദ്ദേഹത്തിന് അറിയണ്ട. താന്‍ എന്ത് ചെയ്താലും അത് നല്ലതാകുമെന്ന് അദ്ദേഹം വിശ്വസിക്കുന്നുവെന്നും പ്രിയ ദര്‍ശന്‍ പറഞ്ഞു. 'ഹംഗാമ 2' എന്ന ചിത്രമാണ് പ്രിയദര്‍ശന്റെതായി ഒരുങ്ങുന്ന മറ്റൊരു ബോളിവുഡ് ചിത്രം.
അക്ഷയ്‌യുടെ 'ഹേര ഫേരി' എന്ന സിനിമയുടെ ആദ്യ ഭാഗം സംവിധാനം ചെയ്തത് പ്രിയദര്‍ശനാണ്. രണ്ടാം ഭാഗം ഒരുക്കിയത് സംവിധായകന്‍ നീരജ് വോറയാണ്. മൂന്നാം ഭാഗത്തിന്റെ ചിത്രീകരണമാണ് ഇപ്പോള്‍ നടക്കുന്നത്. മൂന്നാം ഭാഗത്തിനായി നിര്‍മ്മാതാക്കള്‍ തന്നെ സമീപിച്ചിരുന്നുവെന്നും തനിക്ക് താല്‍പര്യമില്ലെന്ന് അറിയിച്ചതായും ഒരു ദേശീയ മാധ്യമത്തിനു നല്‍കിയ അഭിമുഖത്തില്‍ പ്രിയദര്‍ശന്‍ പറഞ്ഞു.
