സി എന്‍ എ-
ഹൈദരാബാദ്:
അല്ലു അര്‍ജുന്‍ നായകനായി എത്തുന്ന 'പുഷ്പ' എന്ന ബിഗ് ബജറ്റ് ആക്ഷന്‍ ത്രില്ലര്‍ ചിത്രത്തില്‍ ഫഹദ് ഫാസില്‍ വില്ലനായി തെലുങ്കിലേക്ക് അരങ്ങേറ്റം കുറിക്കുന്നു.
'മോളിവുഡ് പവര്‍ഹൗസ് ഫഹദ് ഫാസിലിനെ വില്ലനായി ക്ഷണിക്കുന്നു'വെന്നാണ് നിര്‍മ്മാതാക്കളായ മൈത്രി മുവി മേക്കേഴ്‌സ് ടീസറിലൂടെ അറിയിച്ചത്.
'ആര്യ', 'ആര്യ2' എന്നീ സൂപ്പര്‍ഹിറ്റ് ചിത്രങ്ങള്‍ക്ക് ശേഷം സുകുമാറും അല്ലു അര്‍ജ്ജുനും ഒന്നിക്കുന്ന ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി എന്നീ അഞ്ച് ഭാഷകളിലാണ് ഒരുങ്ങുന്നത്.
പുഷ്പരാജ് എന്ന കള്ളകടത്തുകാരന്റെ റോളിലാണ് അല്ലു അര്‍ജ്ജുന്‍ ചിത്രത്തിലെത്തുന്നത്. കാടുകള്‍ കേന്ദ്രീകരിച്ചാണ് ചിത്രീകരണം, രശ്മിക മന്ദാനയാണ് ചിത്രത്തില്‍ അല്ലുവിന്റെ നായികയായി എത്തുന്നത്. കൂടാതെ ജഗപതി ബാബു, പ്രകാശ് രാജ്, ഹരീഷ് ഉത്തമന്‍ എന്നിവരാണ് മറ്റു താരങ്ങള്‍.
കോവിഡ് പ്രതിസന്ധിയെ തുടര്‍ന്ന് ചിത്രീകരണം മുടങ്ങിയ സിനിമയാണ് 'പുഷ്പ'. 2020 നവംബറില്‍ ചിത്രീകരണം പുനരാരംഭിക്കുകയായിരുന്നു.
2021 ആഗസ്റ്റ് 13 ന് ചിത്രം റിലീസ് ചെയ്യും.
Online PR - CNA.
