MM Kamath
കൊച്ചി:
കേരള സംസ്ഥാന ചലച്ചിത്ര അക്കാദമി ഏപ്രില് ഒന്നു മുതല് അഞ്ചുവരെ കൊച്ചിയില് സംഘടിപ്പിക്കുന്ന പ്രാദേശിക രാജ്യാന്തര ചലച്ചിത്രമേള (ആര്.ഐ.എഫ്.എഫ്.കെ) നടന് മോഹന്ലാല് ഉദ്ഘാടനം ചെയ്തു.
എറണാകുളം സരിത തിയറ്ററില് നടന്ന ഉദ്ഘാടന ചടങ്ങില് സാംസ്കാരിക വകുപ്പ് മന്ത്രി സജി ചെറിയാന് അധ്യക്ഷത വഹിച്ചു.
സാഹിത്യകാരന് എന് എസ് മാധവന് മുഖ്യാതിഥിയായി.
ടി ജെ വിനോദ് എംഎല്എ, കൊച്ചി മേയര് എം അനില് കുമാര്, സംഘാടക സമിതി ചെയര്മാന് സംവിധായകന് ജോഷി, ചലച്ചിത്ര അക്കാദമി ചെയര്മാന് രഞ്ജിത്, സെക്രട്ടറി സി അജോയ്, വൈസ് ചെയര്മാന് പ്രേംകുമാര്, ആര്ട്ടിസ്റ്റിക് ഡയറക്ടര് ബീനാപോള് തുടങ്ങിയവര് വേദിയില് സന്നിഹിതരായിരുന്നു.
അഞ്ച് തിയറ്ററുകളിലായാണ് പ്രദര്ശനം.
173 ചിത്രങ്ങളാണ് തിരുവനന്തപുരം ചലച്ചിത്രമേളയില് ഉണ്ടായിരുന്നതെങ്കില് അവയില് നിന്നു തെരഞ്ഞെടുക്കപ്പെട്ട ഏറ്റവും മികച്ച 73 ചിത്രങ്ങളാണ് കൊച്ചി മേളയില് പ്രദര്ശിപ്പിക്കുക.
ബംഗ്ലദേശ്, സിംഗപ്പൂര്, ഖത്തര് എന്നീ രാജ്യങ്ങളുടെ സംയുക്ത സംരംഭമായ 'രെഹാന'യാണ് കൊച്ചി മേളയിലെ ഉദ്ഘാടന ചിത്രം.
ഒരു അപ്രതീക്ഷിത സംഭവത്തിന് സാക്ഷിയായ രഹന, ആറുവയസ്സുകാരിയായ മകള്ക്കും കോളേജിലെ വിദ്യാര്ഥിനിക്കും വേണ്ടി നീതിക്കായി നടത്തുന്ന പോരാട്ടമാണ് സിനിമയുടെ പ്രമേയം.
സുവര്ണചകോരം ലഭിച്ച 'ക്ലാരാ സോള', പ്രേക്ഷകപ്രീതി ഉള്പ്പെടെ മൂന്ന് പുരസ്കാരങ്ങള് ലഭിച്ച 'കൂഴങ്കല്', മികച്ച സംവിധായകനുള്ള രജത ചകോരം നേടിയ 'കമീല കംസ് ഔട്ട് റ്റുനൈറ്റ്, 'ഫിപ്രസ്കി', നെറ്റ്പാക് പുരസ്കാരങ്ങള് നേടിയ 'ആവാസവ്യൂഹം', 'നിഷിദ്ധോ', ജി അരവിന്ദന്റെ ക്ലാസിക് ചിത്രം 'കുമ്മാട്ടി'യുടെ റെസ്റ്റൊറേഷന് ചെയ്ത പതിപ്പ് തുടങ്ങി 26-ാമത് ഐ.എഫ്.എഫ്.കെയിലെ പ്രധാനപ്പെട്ട എല്ലാ ചിത്രങ്ങളും മേളയില് ഉള്പ്പെടുത്തിയിട്ടുണ്ട്.
മേളയുടെ ഭാഗമായി, ആദ്യകാല പ്രസ് ഫോട്ടോഗ്രാഫറും 'ചെമ്മീനി'ന്റെ നിശ്ചല ഛായാഗ്രാഹകനുമായ ശിവന്റെ ചലച്ചിത്രസംബന്ധിയായ ഫോട്ടോകളുടെ പ്രദര്ശനം, മലയാള സിനിമയുടെ ടൈറ്റില് ഡിസൈനിന്റെ ചരിത്രം പറയുന്ന അനൂപ് രാമകൃഷ്ണന്റെ ഫെലോഷിപ്പ് പ്രബന്ധത്തിലെ പേജുകളുടെ ഡിജിറ്റല് പ്രദര്ശനം എന്നീ എക്സിബിഷനുകളും ഒരുക്കിയിട്ടുണ്ട്. കൂടാതെ മേളയോടനുബന്ധിച്ച് ഓപണ് ഫോറം, സെമിനാറുകള്, സിംപോസിയം എന്നിവ ഉണ്ടായിരിക്കുന്നതാണ്.
ചലച്ചിത്ര മേളയിലെ ഇന്ന് പ്രദര്ശിപ്പിക്കുന്ന ചിത്രങ്ങള്
സരിത
1. രഹ്ന മറിയം നൂര് - 09.00
2. ബ്രതേഴ്സ് കീപ്പര് - 03.00
3. യൂനി - 06.00
4. സുഗ്ര ആന്ഡ് ഹെര് സണ്സ് - 08.30
സവിത
1. അടിയു ഗൊദാര്ഡ് - 02.45
2. ദി ബ്രിട്ടല് ത്രെഡ് - 05.00
3. ഇന്ടു ദി മിസ്റ്റ് - 07.30
കവിത
1. നീം അന്നപൂര്ണ - 03.15
2. കോപൈലറ്റ് - 06.15
3. 19 - 08.45
Online PR - CinemaNewsAgency.Com
Video Courtesy: U2 Media Hub