അഞ്ജു അഷറഫ്-
കൊച്ചി:
ഇന്ത്യന് ചലച്ചിത്ര വേദിയെ അത്ഭുതപ്പെടുത്തിയ 'ബാഹുബലി' എന്ന ചിത്രത്തിന് ശേഷം എസ്.എസ്. രാജമൗലി സംവിധാനം ചെയ്യുന്ന 'RRR' എന്ന ബ്രഹ്മാണ്ഡ ചിത്രം.
'2021 ഒക്ടോബര് 13 ന് രാജ്യമെമ്പാടും റിലീസ് ചെയ്യും. 'തീക്കും വെള്ളത്തിനും തടയാനാവാത്ത ശക്തിക്ക് സാക്ഷ്യം വഹിക്കുക.' എന്ന കുറിപ്പോടെയാണ് ഫേസ്ബുക്കിലൂടെ ഈ വാര്ത്ത സംവിധായകന് എസ്.എസ്. രാജമൗലി പുറത്തു വിട്ടത്.
അടുത്തിടെ ക്ലൈമാക്സ് ചിത്രീകരണം ആരംഭിച്ച വിവരം സോഷ്യല് മീഡിയയിലൂടെ രാജമൗലി അറിയിച്ചിരുന്നു. തെലുങ്ക് സിനിമയിലെ യുവതാരങ്ങളായ
ജൂനിയര് എന്.ടി.ആറും, രാം ചരണും പ്രധാന വേഷങ്ങളില് അഭിനയിക്കുന്ന ചിത്രത്തില് ഇരുവരുടെയും കൈകള് മുറുകെ പിടിച്ച് നില്ക്കുന്ന ചിത്രവും രാജമൗലി പങ്കുവെക്കുകയുണ്ടായി.
'ക്ലൈമാക്സ് ഷൂട്ട് ആരംഭിച്ചു! എന്റെ രാമരാജുവും ഭീമും ഒത്തുചേര്ന്ന് അവര് നേടാന് ആഗ്രഹിച്ച കാര്യങ്ങള് നിറവേറ്റുന്നു...
എന്ന കുറിപ്പോടെയാണ് സംവിധായകന് ചത്രം പങ്കുവെച്ചത്.
ജൂനിയര് എന്.ടി.ആര്. കൊമരു ഭീം ആയും രാം ചരണ് അല്ലൂരി സീതാരാമ രാജുവിന്റെയും വേഷത്തിലാണ് അഭിനയിക്കുന്നത്. ബോളിവുഡ് താരം ആലിയ ഭട്ട് ആണ് നായിക. ചിത്രത്തില് സീത എന്ന കഥാപാത്രത്തെയാണ് ആലിയ അവതരിപ്പിക്കുന്നത്.
ചരിത്രവും ഫിക്ഷനും ചേര്ത്തൊരുക്കുന്നചിത്രത്തിന് 'ആര് ആര് ആര്' എന്ന പേര് കൊണ്ട് ഉദ്ദേശിക്കുന്നത് രുധിരം, രൗദ്രം, രണം എന്നാണ്.
2021 ഒക്ടോബര് 13ന് RRR റിലീസ് ചെയ്യും.
കൊമരു ഭീം, അല്ലൂരി സീതാരാമ രാജു തുടങ്ങിയ സ്വാതന്ത്ര്യ സമര സേനാനികളുടെ സാങ്കല്പ്പിക കഥയാണ് സിനിമ യില് ചിത്രീകരിക്കുന്നത്. തെന്നിന്ത്യയില് നിന്നും ബോളിവുഡില് നിന്നുമുള്ള വന് താരനിര തന്നെ ഈ ചിത്രത്തില് അണിനിരക്കുന്നുണ്ട്.
450 കോടി മുതല്മുടക്കില് ഒരുങ്ങുന്ന ചിത്രത്തില് അജയ് ദേവ്ഗണ്, ഒലിവിയ മോറിസ്, സമുദ്രക്കനി, അലിസണ് ഡൂഡി, റേ സ്റ്റീവന്സണ് എന്നിവരാണ് മറ്റ് പ്രധാനകഥാപാത്രങ്ങളെ അവതരിപ്പിക്കുന്നത്.
ഡി.വി.വി. ദാനയ്യയാണ് ചിത്രത്തിന്റെ നിര്മ്മാതാവ്. കെ.കെ. സെന്തില്കുമാര് ഛായാഗ്രഹണം നിര്വഹിക്കുന്നു. സംഗീതം- എം.എം. കീരവാണി. പി.ആര്.ഒ- ആതിര ദില്ജിത്. 10 ഭാഷകളിലാകും സിനിമ റിലീസിനെത്തുകയെന്നാണ് അറിയാന് കഴിഞ്ഞത്.