സി എന്‍ എ-
കൊച്ചി:
സിസ്റ്റര്‍ അഭയ കേസുമായി ബന്ധപ്പെട്ട് സാമൂഹ്യപ്രവര്‍ത്തകന്‍ ജോമോന്‍ പുത്തന്‍പുരയ്ക്കല്‍ നടത്തിയ നിയമ പോരാട്ടവും ആക്ഷന്‍ കൗണ്‍സിലിന്റെ പ്രവര്‍ത്തനങ്ങളും ഉള്‍പ്പെടുത്തി സമഗ്രമായൊരു ചലച്ചിത്രമൊരുക്കുകയാണ് സംവിധായകന്‍ രാജസേനന്‍.
വര്‍ഷങ്ങള്‍ നീണ്ട മൗനത്തിനു ശേഷമാണ് രാജസേനന്‍ ഒരു സിനിമയുടെ പിന്നില്‍ നിലയുറപ്പിക്കുന്നത്.
അഭയ കേസില്‍ മൂന്ന് പതിറ്റാണ്ട് കാലം സമാനതകളില്ലാത്ത നിയമ പോരാട്ടം നടത്തിയ ജോമോന്‍ പുത്തന്‍പുരയ്ക്കലിന്റെ ജീവിതം തന്നെയാണ് സിനിമയ്ക്ക് ആധാരം. ജോമോന്‍ പുത്തന്‍പുരയ്ക്കലിന്റെ ജീവചരിത്രവും അഭയാകേസില്‍ നിരന്തരം നടത്തിയ നിയമ പോരാട്ടത്തിന്റ നാള്‍ വഴികളും ആസ്പദമാക്കിയാണ് സിനിമയുടെ തിരക്കഥ ഒരുങ്ങുന്നത്.
നാല് മാസത്തിനുള്ളില്‍ സിനിമയുടെ ചിത്രീകരണം ആരംഭിക്കണമെന്നാണ് ജോമോനും സംവിധായകന്‍ രാജസേനനും തമ്മിലുള്ള സമ്മത കരാര്‍. ജീവിച്ചിരിക്കുന്ന ഒരു വ്യക്തിയുടെ പേരില്‍ സിനിമ നിര്‍മ്മിക്കുന്നത് വളരെ അപൂര്‍വമായി സംഭവിക്കുന്ന ഒരു കാര്യമാണ്.
അഭയ കേസ് ആധാരമാക്കി നേരത്തെ സിനിമകള്‍ ഇറങ്ങിയിട്ടുണ്ട്. ഇതുമായി ബന്ധപ്പെട്ട് സുരേഷ് ഗോപിയെ നായകനാക്കി നിര്‍മ്മിച്ച 'ക്രൈം ഫയല്‍' എന്ന ചിത്രം അന്നേ സംസാര വിഷയമായിരുന്നു. എ കെ സാജന്‍, എ കെ സന്തോഷ് എന്നിവരുടെ തിരക്കഥയില്‍ കെ. മധുവാണ് ചിത്രം സംവിധാനം ചെയ്തത്. തിരക്കഥാകൃത്തുക്കള്‍ക്ക് നേരെ ഭീഷണി വരെ ഉണ്ടായിരുന്നു. എന്നിട്ടും സിനിമ യാഥാര്‍ഥ്യമായി. അന്ന് സിസ്റ്ററുടെ വേഷം ചെയ്തത് തെന്നിന്ത്യന്‍ നടി സംഗീതയാണ്.
ജോമോന്‍ പുത്തന്‍ പുരയ്ക്കലിന്റെ നിരന്തര പോരാട്ടവും ആക്ഷന്‍ കൗണ്‍സില്‍ എന്ന പേരും അതിന്റെ പ്രവര്‍ത്തനങ്ങളും എന്താണെന്ന് മലയാളികള്‍ക്ക് സുപരിചിതമാണ്.
ആത്മഹത്യയാണെന്ന് പോലീസും ക്രൈം ബ്രാഞ്ചും വിധിയെഴുതിയ അഭയയുടെ മരണം കൊലപാതകമാണെന്ന് കണ്ടെത്തുന്നതിലേക്ക് വഴിതുറന്നത് ജോമോന്‍ നേതൃത്വം കൊടുത്ത ആക്ഷന്‍ കൗണ്‍സിലിന്റെ പ്രവര്‍ത്തനങ്ങളായിരുന്നു. 28 വര്‍ഷങ്ങള്‍ക്കിപ്പുറം അഭയ കൊലക്കേസിലുണ്ടായ കോടതി വിധി ജോമോന്‍ പുത്തന്‍പുരയ്ക്കലിന്റെ നിയമപോരാട്ടങ്ങളുടെ കൂടി വിജയമാണ്.
