Editor - MM Kamath
തിരു:
ഉജ്ജ്വലവും അനിതരസാധാരണവുമായ അഭിനയ മികവിലൂടെ വൈവിധ്യമാര്ന്ന കഥാപാത്രങ്ങള്ക്കു ജീവന് പകര്ന്ന് അഭിനയത്തിളക്കത്തിന്റെ അഞ്ചു പതിറ്റാണ്ടു പൂര്ത്തിയാക്കിയ മലയാള സിനിമയുടെ രാജമാണിക്യം പത്മശ്രീ ഭരത് മമ്മൂട്ടിയെ രാമവര്മ്മ ഫൗണ്ടേഷന് ഫോര് ആര്ട്ട് ആന്ഡ് കള്ച്ചര് ചെയര്മാന് ശ്രീ രാമവര്മ്മ തമ്പുരാന് ഉപഹാരവും ആശംസാപത്രികയും നല്കി ആദരിക്കുകയും സപ്തതി ആശംസകള് നേരുകയും ചെയ്തു.
വിശ്വവിഖ്യാത ചിത്രകാരനായ രാജാ രവിവര്മ്മയുടെ ജന്മം കൊണ്ടു ധന്യമായ കിളിമാനൂര് കൊട്ടാരത്തിലെ ഇളമുറ ത്തമ്പുരാനും പ്രശസ്ത സംഗീതജ്ഞനും ഗായകനുമായ ശ്രീ രാമവര്മ്മത്തമ്പുരാന്, രവിവര്മ്മയുടെ പ്രസിദ്ധമായ 'കാദംബരി' എന്ന ക്യാന്വാസ് ചിത്രവും ആശംസാപത്രികയും തിരുവിതാംകൂര് രാജകുടുംബത്തിലെ പ്രിന്സസ്സ് അശ്വതി തിരുനാള് ഗൗരി ലക്ഷ്മീബായി രചിച്ച 'ഹിസ്റ്ററി ലിബറേറ്റഡ്' എന്ന ഗ്രന്ഥത്തിന്റെയും മാര്ക്ക്സ് പ്രൊഡക്ഷന്സിലെ ശ്രീ വി. കെ. കൃഷ്ണ കുമാറിന്റെ ബാലസാഹിത്യകൃതി മൃഗറോണയുടെയും പ്രതികളും മമ്മൂട്ടിക്കു സമ്മാനിച്ചു.
മമ്മൂട്ടിയും പാര്വ്വതി തിരുവോത്തും പ്രധാന കഥാപാത്രങ്ങളായ ഭിനയിക്കുന്ന 'പുഴു' വിന്റെ കാക്കനാട്ടുള്ള ലൊക്കേഷനില് വച്ചായിരുന്നു കൂടിക്കാഴ്ച. നായിക പാര്വ്വതി തിരുവോത്തിനും പ്രിന്സസ്സ് അശ്വതി തിരുനാളിന്റെ ഗ്രന്ഥം സമ്മാനിക്കുകയുണ്ടായി. മമ്മൂട്ടിയുടെ മാനേജര് എസ്.ജോര്ജ്, 'പുഴു'വിന്റെ സംവിധായിക റത്തീന ഷര്ഷാദ്, എക്സിക്യുട്ടീവ് പ്രൊഡ്യൂസര് ശ്യാം മോഹന്, ക്യാമറാമാന് തേനി ഈശ്വര്, സംവിധായകരായ സജി കെ. പിള്ള, ദിനേഷ് നീലകണ്ഠന്, ഛായാഗ്രാഹകന് രതീഷ് മംഗലത്ത്, നടന് ബിജു വര്ഗീസ് ചേര്ത്തല എന്നിവരും 'പുഴു' സിനിമയുടെ അണിയറ പ്രവര്ത്തകരും സന്നിഹിതരായിരുന്നു.
- അജയ് തുണ്ടത്തില്