സി എന്‍ എ-
മുംബൈ:
ലോക്ക് ഡൗണ്‍ തുടങ്ങിയശേഷം പത്തോളം സിനിമകള്‍ പുറത്തിറക്കിയ ഒരേയൊരു സംവിധായകനാണ് രാംഗോപാല്‍ വര്‍മ്മ. അതായത് ഓരോ മാസവും ഓരോ സിനിമ വീതം... 10 സിനിമകളും ഓ ടി ടി പ്ലാറ്റ്‌ഫോമിലൂടെയാണ് റിലീസ് ചെയ്തത്.
'ത്രില്ലര്‍', 'ക്ലൈമാക്‌സ്', 'നേക്കഡ്', 'പവര്‍ സ്റ്റാര്‍', 'മര്‍ഡര്‍', '12 O' ക്ലോക്ക്', 'ദിഷ എന്‍കൗണ്ടര്‍' തുടങ്ങി പത്തില്‍ ഏഴ് സിനിമകളും സംവിധാനം ചെയ്തത് രാംഗോപാല്‍ വര്‍മ്മ തന്നെയാണ്.
ദാവൂദ് ഇബ്രാഹിമിന്റെ ജീവിതം പ്രമേയമാക്കി ഒരുക്കുന്ന 'ഡി കമ്പനി'യാണ് അദ്ദേഹത്തിന്റെ ഏറ്റവും പുതിയ ചിത്രം. സിനിമയുടെ ട്രെയിലര്‍ പുറത്തിറങ്ങി. ഇതിലും മികച്ചൊരു ഗ്യാങ്ങ്സ്റ്റര്‍ സിനിമ ഉണ്ടായിട്ടില്ലെന്നാണ് ഇതേക്കുറിച്ച് രാംഗോപാല്‍ വര്‍മ്മ പറയുന്നത്.
ദാവൂദ് ഇബ്രാഹിമിന്റെ ജീവിതം മാത്രമല്ല ഡി കമ്പനിയുടെ നിഴലില്‍ ജീവിച്ചു മരിച്ച അനേകം അധോലോക നായകന്‍മാരുടെ കഥയും ചിത്രത്തില്‍ ഉണ്ടാകുമെന്ന് സംവിധായകന്‍ ട്വീറ്റില്‍ പറയുന്നു.
2002 ല്‍ രാം ഗോപാല്‍ വര്‍മ്മയുടെ സംവിധാനത്തില്‍ പുറത്തിറങ്ങിയ കമ്പനിയും ഗ്യാങ്സ്റ്റര്‍ മൂവി വിഭാഗത്തിലായിരുന്നു. ഹിന്ദി തമിഴ് തെലുങ്ക് മലയാളം കന്നഡ എന്നീ ഭാഷകളിലായിരിക്കും 'ഡി കമ്പനി' റിലീസ് ചെയ്യുന്നത്.
അതേസമയം രാംഗോപാല്‍ വര്‍മ്മയ്‌ക്കെതിരെ വിവിധ ചലച്ചിത്ര തൊഴിലാളി സംഘടനകള്‍ ഉപരോധം ഏര്‍പ്പെടുത്തി. ജോലി ചെയ്തതിനുള്ള കൂലി നല്‍കാത്തതില്‍ പ്രതിഷേധിച്ചാണ് രാംഗോപാല്‍ വര്‍മ്മയ്‌ക്കെതിരെ തൊഴിലാളി സംഘടനകള്‍ ഒന്നിച്ച് ഉപരോധം ഏര്‍പ്പെടുത്തിയത്. ഉപരോധ പ്രഖ്യാപനം നിലനില്‍ക്കുമ്പോള്‍ തന്നെയാണ് രാംഗോപാല്‍ വര്‍മ്മ പുതിയ സിനിമയിലേക്ക് കടക്കുന്നത്.
