സി എന്‍ എ-
കൊച്ചി:
കോവിഡ് നിയന്ത്രണങ്ങള്‍ പാലിച്ച് ഷൂട്ടിംഗ് പൂര്‍ത്തിയാക്കിയ ചിത്രം 'റൂട്ട് മാപ്പ്' റിലീസിന് ഒരുങ്ങി. ലോക്ക്ഡൗണ്‍ പശ്ചാത്തലമാക്കി നവാഗതനായ സൂരജ് സുകുമാര്‍ നായര്‍ സംവിധാനം ചെയ്ത 'റൂട്ട് മാപ്പിന്റെ ചിത്രീകരണം തിരുവനന്തപുരത്തും ചെന്നൈയിലുമായി പൂര്‍ത്തിയാക്കി. ചിത്രത്തിലെ ഒരു പോസ്റ്റര്‍ പോസ്റ്റ് ചെയ്തു കൊണ്ട് സംവിധായകന്‍ തന്നെയാണ് റിലീസ് വിവരം പങ്കുവെച്ചത്.
'സംഭവം ലോക്ക്ഡൗണില്‍ ചിത്രീകരിച്ച സിനിമയാണ്. ഭൂരിഭാഗവും.. ചെന്നൈയില്‍ ട്രിപിള്‍ ലോക്ക്‌ഡൌണ്‍ നടക്കുന്ന സമയത്താണ് അവിടെ റോഡില്‍ സീന്‍ ഷൂട്ട് ചെയ്തത്.. ഇപ്പോ ഡബ്ബിങ് അവസാനഘട്ടത്തിലാണ്.. മ്യൂസിക്കും കളറിങ്ങും ചെയ്തുടനെ നിങ്ങളുടെ മുന്നിലെത്തിക്കാനുള്ള ശ്രമത്തിലാണ്. എല്ലാവരും പ്രാര്‍ത്ഥിക്കുക..
നന്ദി ഒപ്പമുണ്ടായിരുന്നവര്‍ക്കും, ഒപ്പം നിന്ന് ചതിച്ചവര്‍ക്കും.' എന്ന വരികളിലൂടെയാണ് പോസ്റ്റ് ഷെയര്‍ ചെയ്തിരിക്കുന്നത്.
ആരാണ് ചതിച്ചതെന്നു വ്യക്തമാക്കിയിട്ടില്ലെങ്കിലും നേരത്തെ മലയാളത്തിലെ ഒരു പ്രമുഖനടനെ നായകനാക്കി പ്ലാന്‍ ചെയ്ത സിനിമ എന്നാല്‍ സംവിധായകനുമായുണ്ടായ ചില ഇഗോ പ്രശ്‌നങ്ങള്‍ കാരണം അയാളെ ഒഴിവാക്കിയെന്നുമാണ് സ്ഥിരീകരിക്കാത്ത റിപ്പോര്‍ട്ടുകള്‍.
പദ്മശ്രീ മീഡിയ ഹൗസിന്റെ ബാനറില്‍ ശബരി നാഥാണ് ചിത്രം നിര്‍മ്മിച്ചിരിക്കുന്നത്. ആനന്ദ് മന്മഥന്‍, ഷാജു ശ്രീധര്‍, നോബി, സിന്‍സീര്‍, ശ്രുതി റോഷന്‍, നാരായണന്‍ കുട്ടി, ജോസ്, സജീര്‍ സുബൈര്‍, ലിന്‍ഡ, അപര്‍ണ, ഭദ്ര എന്നിവര്‍ പ്രധാനവേഷങ്ങളില്‍ അഭിനയിച്ച 'റൂട്ട്മാപ്പ്' കോവിഡ് കാലത്ത് രണ്ടു ഫ്‌ളാറ്റുകളിലായി നടക്കുന്ന ചില സംഭവങ്ങളാണ് പ്രമേയമാക്കിയിട്ടുള്ളത്.
അരുണ്‍ കായംകുളമാണ് ചിത്രത്തിന്റെ തിരക്കഥ എഴുതിയിരിക്കുന്നത്. ആഷിഖ് ബാബു ഛായാഗ്രഹണവും, കൈലാഷ് എസ് ഭവന്‍ എഡിറ്റിംഗും നിര്‍വ്വഹിക്കുന്ന ചിത്രത്തിന് സംഗീതമൊരുക്കുന്നത് പ്രശാന്ത് കര്‍മയും, അശ്വിന്‍ വര്‍മയും ചേര്‍ന്നാണ്. സുനിത സുനിലാണ് പി.ആര്‍.ഓ. ചിത്രം തീയറ്ററില്‍ തന്നെ റിലീസ് ചെയ്യാനാണ് തീരുമാനം എന്ന് സംവിധായകന്‍ സൂരജ് സുകുമാര്‍ അറിയിച്ചു.
