സി എന് എ-
ചെന്നൈ:
തമിഴ് സിനിമയ്ക്ക് നിരവധി മികച്ച സിനിമകള് സമ്മാനിച്ചിട്ടുള്ള പ്രഗത്ഭനായ സംവിധായകന് സെല്വരാഘവന് കേന്ദ്ര കഥാപാത്രത്തെ അവതരിപ്പിക്കുന്ന 'സാനി കായിധം' എന്ന സിനിമയുടെ ചിത്രീകരണം ആരംഭിച്ചു. കീര്ത്തി സുരേഷാണ് ചിത്രത്തിലെ നായിക.
അരുണ് മാതേഷ്വരന് ആണ് ചിത്രം സംവിധാനം ചെയ്യുന്നത്.
ഇതിന് മുന്പിറങ്ങിയ 'സാനി കായിധമിന്റെ പ്രമോഷണല് പോസ്റ്ററില് കത്തിയും പിസ്റ്റളും കൈവശം വച്ചിരിക്കുന്ന സെല്വരഘവനും കീര്ത്തി സുരേഷുമായിരുന്നു പോസ്റ്ററില് നിറഞ്ഞു നിന്നിരുന്നത്.
ഈ പോസ്റ്ററില് നന്നും ലഭിക്കുന്ന സൂചനയനുസരിച്ച് ഇത് എണ്പതുകളിലെ ഒരു ആക്ഷന് ഡ്രാമയാകാം ചിത്രം പറയാന് ഉദ്ദേശിക്കുന്നത് എന്നാണ്.
'എന്നെപ്പോലെ നിങ്ങളുടെ അഭിനയമികവിനും ലോകം സാക്ഷ്യം വഹിക്കട്ടെ.' എന്നാണ് സഹോദരന്റെ അഭിനയരംഗത്തേക്കുള്ള കാല്വെപ്പില് സന്തോഷം പങ്കുവെച്ചുകൊണ്ട് നടന് ധനുഷ് ട്വീറ്റ് ചെയ്തത്. മറുപടിയായി 'ഒരു പുതിയ സാഹസികത ആരംഭിക്കുന്നു!' എന്ന് സെല്വരഘവനും എഴുതി.
23 വര്ഷത്തെ സംവിധായക ജീവിതത്തിനൊടുവില് സെല്വരാഘവന് ഇപ്പോഴിതാ ആദ്യമായി അഭിനയിക്കുവാന് ഒരുങ്ങുകയാണ്.
പിതാവ് കസ്തുരി രാജയുടെ സംവിധായക സംരംഭമായ 'തുള്ളുവാദോ ഇളമൈ' എന്ന ചിത്രത്തിന് വേണ്ടി തിരക്കഥ എഴുതിക്കൊണ്ടായിരുന്നു സെല്വരാഘവന്റെ സിനിമയിലേക്കുള്ള കടന്നുവരവ്. ഇതെ ചിത്രത്തിലൂടെ തന്നെയായിരുന്നു അദ്ദേഹത്തിന്റെ സഹോദരന് ധനുഷും സിനിമയിലേക്ക് എത്തിയത്.
'സാനി കായിധത്തിന്റെ സംഗീതസംവിധാനം നര്വ്വഹിക്കുന്നത് യുവന് ശങ്കര് രാജയാണ്. ഛായാഗ്രഹണം യാമിനി യഗ്നമുര്ത്തി. കലാസംവിധാനം- രാമു തങ്കരാജ്, സ്ക്രീന് സീന് മീഡിയയാണ് ചിത്രം നിര്മ്മിക്കുന്നത്.