അഞ്ജു അഷറഫ്-
കൊച്ചി:
പ്രശസ്ത ഡാന്സറും കൊറിയോഗ്രാഫറുമായ സജ്ന നജം ഇതുവരെ മൂവി ക്യാമറയുടെ പിന്നിലാണ് പ്രവര്ത്തിച്ചിരുന്നത്. ഇപ്പോള് മുന്നിലേക്ക് വന്നിരിക്കുന്നു. കുട്ടികളെ ഡാന്സ് പഠിപ്പിച്ചും വേദികളില് ഡാന്സ് അവതരിപ്പിച്ചും സ്റ്റേജ് ഷോകള് ഒരുക്കിയും ചാനല് പ്രോഗ്രാമുകളില് ഡാന്സ് കമ്പോസ് ചെയ്തും സിനിമയില് കൊറിയോഗ്രാഫി നിര്വഹിച്ചും രണ്ട് പതിറ്റാണ്ടുകാലമായി ഡാന്സിന്റെ വഴിയേ യാത്രചെയ്തിരുന്ന സജ്ന നജം ചലച്ചിത്രഅക്കാദമിക്ക് വേണ്ടി ബൈജു രാജ് ചേകവര് സംവിധാനം ചെയ്യുന്ന 'ലൈഫ് ഈസ് ബ്യൂട്ടിഫുള്' എന്ന ഷോര്ട്ട് ഫിലിമില് പ്രധാന കഥാപാത്രത്തെ അവതരിപ്പിച്ചുകൊണ്ടാണ് ക്യാമറയുടെ മുന്നില് എത്തിയിരിരിക്കുന്നത്.
ചലച്ചിത്ര അക്കാദമി നടത്തിയ തിരക്കഥാ രചനാ മത്സരത്തില് വിജയിച്ച ഹേമ എസ് ചന്ദ്രേടത്ത് എഴുതിയ തിരക്കഥയാണ് 'ലൈഫ് ഈസ് ബ്യൂട്ടിഫുള്'.
ഷോര്ട്ട് ഫിലിമില് രണ്ട് പ്രധാനകഥാപാത്രങ്ങളേയുള്ളൂ. അതില് ഒരാളാണ് സജന നജം. 'ക്ലാസിക്കലായി ഞാന് ഡാന്സ് പഠിച്ചിട്ടില്ല. കുട്ടിക്കാലം മുതല് ഡാന്സിനോടും പാട്ടിനോടും സിനിമയോടും വലിയ താല്പര്യമായിരുന്നു. സ്കൂള് കലാമത്സരങ്ങളില് പങ്കെടുക്കുമായിരുന്നു. മത്സരങ്ങളില് പങ്കെടുത്തില്ലെങ്കിലും ടീച്ചര്മാര് എന്നെപിടിച്ചോണ്ട് പോയി പങ്കെടുപ്പിക്കും. ധാരാളമായി സിനിമ കാണുമായിരുന്നു.' അങ്ങനെയാണ് കലാരംഗവുമായി കൂടുതല് അടുക്കുന്നതെന്ന് സജ്ന പറഞ്ഞു. 'ക്ലാസിക്കല് ഡാന്സ് പഠിച്ചില്ലെങ്കിലും സ്കൂളില് നിന്ന് പഠിക്കുന്ന പാട്ടും ഡാന്സ് സ്റ്റെപ്പുകളൊക്കെ നന്നായി പ്രാക്ടീസ് ചെയ്യുമായിരുന്നു.
എന്റെ വീട് ചിറയിന്കീഴാണ്. മുത്തശ്ശന് അവിടെ 'ഖദീജ' എന്ന സിനിമ തീയറ്റര് ഉണ്ടായിരുന്നു. അവിടെ വരുന്ന എല്ലാ സിനിമകളും മൂന്നും നാലും തവണ കാണുമായിരുന്നു.
പ്രേംനസീര് സാര് ഞങ്ങളുടെ കസിനാണ്. ആ വലിയ മനുഷ്യന്റെ വലതുകൈത്തലം എന്റെ ശിരസില് തലോടി പോയിട്ടുണ്ടാവുമെന്ന് ഞാന് വിശ്വസിക്കുന്നു. പതിനെട്ടാമത്തെ വയസ്സില് ആണ് വിവാഹം. ഭര്ത്താവ് സൗദിയില് ആയിരുന്നു. വിവാഹം കഴിഞ്ഞ് സൗദിയിലേക്ക് പോയി രണ്ടായിരത്തി ഒന്നില് നാട്ടിലേക്ക് വന്നു. പതിവുപോലെ തിരിച്ചുപോകാന് തീരുമാനിച്ചാണ് വന്നത്. പക്ഷേ എന്തുകൊണ്ടോ മടങ്ങി പോയില്ല. നാട്ടില് സെറ്റിലായി, മകളെ നാട്ടിലെ സ്കൂളില് ചേര്ത്തു. എന്റെ കയ്യിലുള്ള ഡാന്സും പാട്ടുമൊക്കെ മകളെ പഠിപ്പിച്ചു. അവള് സ്കൂള് മത്സരങ്ങളില് പങ്കെടുത്തപ്പോള് ആരാ പഠിപ്പിച്ചതെന്ന് ടീച്ചേര്സ് ചോദിച്ചു. മമ്മി ആണെന്ന് പറഞ്ഞു. അതോടെ സ്കൂളിലെ മറ്റു കുട്ടികളെയും ഡാന്സ് പഠിപ്പിക്കേണ്ടിവന്നു. അതാണ് തുടക്കം. ഇതറിഞ്ഞ് പുറമേയുള്ള കുട്ടികളും പഠിക്കാന് വന്നതോടെ 'സറീന സ്കൂള് ഓഫ് ഡാന്സ്' ആരംഭിച്ചു.
ഡാന്സ് സ്കൂളിന്റെ ആദ്യത്തെ പ്രോഗ്രാം ആറ്റുകാല് ക്ഷേത്രത്തിലായിരുന്നു. പിന്നീട് പലസ്ഥലത്തും പ്രോഗ്രാമുകള് അവതരിപ്പിച്ചു. ടെലിവിഷന്ചാനലുകള്ക്ക് വേണ്ടി ഒരുപാട് പ്രോഗ്രാം ചെയ്തു. എല്ലാ ചാനലുകളിലും പ്രോഗ്രാം ചെയ്തിട്ടുണ്ട്. അമൃത ടിവി യില് ചെയ്ത 'സൂപ്പര് സ്റ്റാര്' ആണ് കൂടുതല് ശ്രദ്ധിക്കപ്പെട്ടത്. റിയാലിറ്റി ഷോകള് ഒരുക്കുമ്പോള് തന്നെ സ്റ്റേജ് ഷോകള്ക്ക് വേണ്ടിയും വര്ക്ക് ചെയ്യുന്നുണ്ടായിരുന്നു. അങ്ങനെ വലിയൊരു സൗഹൃദം ഉണ്ടായി. രണ്ടായിരത്തി മൂന്നില് 'ബാല്യം' എന്ന സിനിമയില് കൊറിയോഗ്രാഫി ചെയ്തു. അതൊരു പുതിയ തുടക്കാമായിരുന്നു. പിന്നെയും മൂന്നാല് സിനിമകള് ചെയ്തു. ഇതിനിടക്ക് ക്യാമറാമാന് ജോമോന് ടി ജോണ് ചെയ്ത ഒരു ആഡ് ഫിലിമില്വര്ക്ക് ചെയ്യാന് അവസരം ലഭിച്ചു. അവിടെ വെച്ച് ആന് ആഗസ്റ്റിനെകണ്ടു. സിനിമയില് വര്ക്ക് ചെയ്യാന് താല്പര്യമുണ്ടോ എന്ന് ചോദിച്ചു. നല്ല വര്ക്ക് കിട്ടിയാല് ചെയ്യാമെന്ന് പറഞ്ഞു. ജോമോന് പറഞ്ഞിട്ട്, എന്ന് 'നിന്റെ മൊയ്തീന്' എന്ന സിനിമയിലെ ഡയറക്ടറെ പോയി കണ്ടു, ആ സംഭവം നടന്നില്ല. പിന്നീട് ജോമോന്റെ തന്നെ റെക്കമെന്റെഷനില് ലാല്ജോസ് സാറിന്റെ കമ്പനിയില് നിന്ന് വിളിച്ചു. ലാല്ജോസ് സാറിനോട് സംസാരിച്ചു 'വിക്രമാദിത്യന്' എന്ന സിനിമയില് കൊറിയോഗ്രാഫറായി വര്ക്ക് ചെയ്തു. ആ സിനിമ വലിയ വിജയമായിരുന്നു. ജോമോന് ടി ജോണ് ആയിരുന്നു ക്യാമറാമാന്, അതുകൊണ്ട് എനിക്ക് നല്ല ധൈര്യമായിരുന്നു. 'വിക്രമാദിത്യന്' എന്ന സിനിമയില് മികച്ച കൊറിയോഗ്രാഫിക്കുള്ള സ്റ്റേറ്റ് അവാര്ഡ് ലഭിച്ചു. അതിന്റെ തുടര്ച്ചയായി കുറെ പടങ്ങള് ചെയ്തു. 'അയാള്', 'മംഗ്ലീഷ്', 'ചന്ദ്രേട്ടന് എവിടെയാ?', 'തിങ്കള് മുതല് വെള്ളിവരെ', 'സോളോ', 'സഖാവ്', 'കാറ്റ്', 'പരോള്', 'അള്ള് രാമേന്ദ്രന്', 'അര്ജന്റീന ഫാന്സ് കാട്ടൂര്ക്കടവ്', 'അല് മല്ലു' അങ്ങനെ ഇരുപത്തിആറോളം പടങ്ങള് ചെയ്തിട്ടുണ്ടാവും. തമിഴില് ചേരന്, വിജയ് സേതുപതി എന്നിവരുടെ പടങ്ങള് ചെയ്തു ഡാന്സിന്റെ വഴിയേ പൊയ്ക്കൊണ്ടിരിക്കുമ്പോഴാണ് ഡയറക്ടര് ബൈജു രാജ് ചേകവര് വിളിക്കുന്നത്. സംസാരിച്ചു തുടങ്ങിയപ്പോള് ഞാന് വിചാരിച്ചു കൊറിയോഗ്രാഫി ചെയ്യനായിരിക്കുമെന്ന്. ഞാന് സംസാരിച്ചതും കൊറിയോഗ്രാഫിയെ കുറിച്ചാണ്. അപ്പോള് അദ്ദേഹം പറഞ്ഞു 'കൊറിയോഗ്രാഫി ചെയ്യാനല്ല... മാഡത്തെവിളിച്ചത് അഭിനയിക്കാനാണ്.' ആദ്യമൊന്നു ഞെട്ടിയെങ്കിലും അതും ഒരു എക്സ്പീരിയന്സാണല്ലോ. എല്ലാ ഇമോഷന്സ്മുള്ള ക്യാരക്ടറാണ്. നല്ലൊരു ഫിലിമായിരിക്കും 'ലൈഫ് ഈസ് ബ്യൂട്ടിഫുള്'' എന്ന് സജ്ന നജം പറയുന്നു.