സി എന് എ-
മുംബൈ:
ബോളിവുഡിലെ കരുത്തനായ സംവിധായകന് രാംഗോപാല് വര്മ്മ ഒരുക്കുന്ന പുതിയ ചിത്രത്തിന് 'ശശികല' എന്ന് പേരിട്ടു. തമിഴ്നാട് മുന് മുഖ്യമന്ത്രി ജയലളിതയുടെ തോഴി ശശികലയുടെ ജീവിതത്തെ ആസ്പദമാക്കി നിര്മ്മിക്കുന്ന ചിത്രമാണിതെന്ന സൂചനകളും സംവിധായകന് നല്കുന്നുണ്ട്. തന്റെ പുതിയ സിനിമ അനൗണ്സ് ചെയ്തതിനൊപ്പം തന്നെയാണ് 'ശശികല' എന്ന സിനിമയുടെ പേരും വെളിപ്പെടുത്തിയത്. എസ്, എന്ന സ്ത്രീയും ഈ, എന്ന പുരുഷനും ഒരു നേതാവിനോട് ചെയ്തതെന്താണ് എന്ന അന്വേഷണമാണ് സിനിമയുടെ ഇതിവൃത്തമെന്നും രാംഗോപാല് വര്മ്മ പറയുന്നു. വ്യക്തികള്ക്കിടയില് ഉണ്ടായിരുന്ന സംശയാസ്പദമായ ബന്ധത്തെക്കുറിച്ചാണ് സിനിമ സംസാരിക്കുന്നത്. 'ഏറ്റവും അടുത്തു നില്ക്കുമ്പോഴാണ് കൊല്ലാന് എളുപ്പം' എന്ന തമിഴ് മൊഴിയും ചിത്രത്തിന്റെ പേരിനൊപ്പം സംവിധായകന് ചേര്ത്തുവയ്ക്കുന്നു.