അഞ്ജു അഷറഫ്-
കൊച്ചി:
കേരളത്തിലെ ഏറ്റവും ശ്രദ്ധാകേന്ദ്രമാകാന് പോകുന്ന തിയേറ്റര് സമുച്ചയങ്ങളില് ഒന്നായിരിക്കും എറണാകുളം 'ഷേണായിസ്'. നാലുവര്ഷമായി അടഞ്ഞു കിടന്നിരുന്ന 'ഷേണായീസ്', 'ലിറ്റില് ഷേണായീസ്' എന്നീ തീയേറ്ററുകള് സംയോജിപ്പിച്ച് പുതിയ സംവിധാനങ്ങളോടെ തുറക്കുന്നത് അഞ്ചു സ്ക്രീനുകളായിട്ടാണ്.
നേരത്തെ രണ്ട് തിയേറ്ററുകള് ഉണ്ടായിരുന്നിടത്താണ് ഇപ്പോള് അഞ്ചു സ്ക്രീനുകള് ഉള്ള മള്ട്ടിപ്ലെക്സ് തിയേറ്റര് ആയി ഉയരുന്നത്.
ആധുനിക ഡിജിറ്റല് പ്രോജക്ടറുകളാണ് തീയേറ്ററില് ഒരുക്കിയിരിക്കുന്നത്.
4K പ്രൊജക്ഷന്, ഡോള്ബി അറ്റ്മോസ്, അവന്യൂ റീജന്റിന്റെ കോഫി ഷോപ്പ്, ഫോര്ട്ടി പ്ലസ് കവര് തുടങ്ങിയ പുത്തന് സജ്ജീകരണങ്ങളോടെ പ്രവര്ത്തനം ആരംഭിക്കുന്ന തീയറ്റര് സമുച്ചയത്തില് 250, 230, 120, 75, 65 എന്നിങ്ങനെയാണ് ഇരിപ്പിടങ്ങളുടെ എണ്ണം.
ഒരു ദിവസം രണ്ട് സിനിമകള് വീതം റിലീസ് ചെയ്യുമെന്നുള്ളതാണ് മറ്റൊരു അഡ്വാന്റെജ്.
1969 ല് ഏഷ്യയിലെ ആദ്യത്തെ വിസ്താരമ പ്രൊജക്ഷന് എന്ന ലേബലോടെയാണ് എറണാകുളത്ത് എംജി റോഡില് 'ഷേണായീസ്' തീയറ്റര് പ്രവര്ത്തിച്ചു തുടങ്ങുന്നത്. നിരവധി വമ്പന് സിനിമകള് പ്രദര്ശിപ്പിക്കുകയും പ്രേക്ഷകരെ ഹരം കൊള്ളിക്കുകയും ചെയ്തിട്ടുള്ള 'ഷേണായിസ്' 46 വര്ഷത്തിനുശേഷം നവീകരണത്തിന്റെ ഭാഗമായി അടച്ചുപൂട്ടുകയും നാലുവര്ഷം കഴിഞ്ഞ് ആധുനിക സംവിധാനങ്ങളോടെ വീണ്ടും പ്രവര്ത്തനം ആരംഭിക്കുകയാണ്.
ഫെബ്രുവരി നാലിന് തിയേറ്റര് തുറക്കുമെന്നും ഉദ്ഘാടന ചിത്രം മമ്മൂട്ടിയുടെ 'ദി പ്രീസ്റ്റ്' ആയിരിക്കുമെന്നും പ്രചരണമുണ്ടായിരുന്നു. പുതിയ സാഹചര്യത്തില് പ്രീസ്റ്റിന്റെ റിലീസ് മാറ്റിവെച്ചു.
തീയറ്ററിന്റെ ഉദ്ഘാടന തീയതി ഔദ്യോഗികമായി ഇനിയും പ്രഖ്യാപിച്ചിട്ടില്ല. ഷെണായിസ് ഉടനെ തന്നെ തുറന്നു പ്രവര്ത്തനമാരംഭിക്കുമെന്ന് തിയേറ്റര് ഗ്രൂപ്പ് മാനേജിങ് പാര്ട്ണറായ സുരേഷ് ഷേണായി സിനിമ ന്യൂസ് ഏജന്സിയോട് പറഞ്ഞു.