എഎസ് ദിനേശ്-
കൊച്ചി :
പത്രപ്രവര്‍ത്തകനും ചലച്ചിത്ര തിരക്കഥാകൃത്തുമായ ശ്രീകുമാര്‍ അരൂക്കുറ്റി ഒരുക്കുന്ന വെബ്‌സീരീസ് ആണ് ശ്രീ 4 എലിഫന്റ്‌സ്. നേരത്തെ ടെലിവിഷന്‍ ചാനലിന് വേണ്ടി 'ഈ ഫോര്‍ എലിഫന്റ്' എന്ന ആനക്കഥകളുടെ നീണ്ട പരമ്പര ഒരുക്കി ശ്രദ്ധേയനായ ശ്രീകുമാര്‍ അരൂക്കുറ്റി രചനയും സംവിധാനവും നിര്‍വഹിക്കുന്ന ശ്രീ 4എലിഫന്റ്‌സിന്റെ അവതാരകന്‍ മാടമ്പ് കുഞ്ഞുകുട്ടന്‍ആണ്. പ്രൊഫ: അലിയാരാണ് ശബ്ദം നല്‍കുന്നത്. കണ്ണന്‍ മുഹമ്മ, ജയച്ചന്ദ്രന്‍ പാണാവള്ളി തുടങ്ങിയവര്‍ ഛായാഗ്രഹണം നിര്‍വഹിക്കുന്നു. ചിത്രസംയോജനം കപില്‍ കൃഷ്ണ. വിജയദശമി നാളില്‍ ഗുരുവായൂര്‍ പത്മനാഭന്റെ എപ്പിസോഡുമായി തുടക്കം കുറിച്ച ഈ സീരീസ് ഇതിനോടകം റേറ്റിങ്ങിലും സബ്‌സ്‌ക്രിബ്ഷനിലും പുതിയ തരംഗങ്ങള്‍ സൃഷ്ടിച്ച് ശ്രദ്ധേയമായിക്കഴിഞ്ഞു. കേരളത്തിലങ്ങോളമിങ്ങോളം ഉള്ള ഗജകേസരികളേയും ഗജസുന്ദരികളേയും അവരുടെ അത്യപൂര്‍വ്വ കഥകളെയും പ്രേക്ഷകസമക്ഷം എത്തിക്കുന്ന പരമ്പര, ഇക്കുറി മൈസൂര്‍ ദസറ, രാജസ്ഥാന്‍ സഫാരി ആനകള്‍, തമിഴ് നാട്ടിലെ ആനയിരട്ടകള്‍, ഏഷ്യയിലെ ഏറ്റവും വലിയ താപ്പാനയായ ടോപ്പ്സ്ലിപ്പ് കലീം, കാട്ടാനയായിരുന്നപ്പോള്‍ ഇരുപതിലേറെ പേരെ കൊല ചെയ്ത് കുപ്രസിദ്ധനായ മുതുമല മൂര്‍ത്തി, തുടങ്ങിയ അദ്ധ്യായങ്ങളുമായി വൈവിധ്യപൂര്‍ണമായ വിഭവങ്ങളാണ് ഒരുക്കിയിട്ടുള്ളത്. ആനകള്‍ക്കും ആനവിശേഷങ്ങള്‍ക്കും ഏറെ പ്രാധാന്യമുള്ള ശ്രീലങ്ക, തായ്‌ലന്റ് എന്നിവിടങ്ങളിലെ പേരു കേട്ട ആനകള്‍ക്കും ആനപാപ്പാന്‍മാരിലേക്കും ശ്രീ 4 എലിഫന്റ്‌സ് ടീം ക്യാമറ തിരിക്കുന്നുണ്ട്.
