Editor- MM Kamath
ബംഗളൂരു:
ബംഗളൂരു കേന്ദ്രീകരിച്ച് പ്രവര്ത്തിക്കുന്ന ചലച്ചിത്ര നിര്മ്മാണ കമ്പനിയായ ഡെക്കാന് കിംഗ് മൂവി പ്രൊഡക്ഷന്സ് മലയാളത്തില് ഒരുക്കുന്ന പ്രഥമ ചിത്രമായ 'സ്തംഭം 2' ന്റെ ചിത്രീകരണം ഡിസംബര് മൂന്നാംവാരം പാലയില് ആരംഭിക്കും.
30 വര്ഷമായി ബംഗളൂരുവില് പ്രവര്ത്തിക്കുന്ന വ്യവസായ പ്രമുഖനും മലയാളിയുമായ ബിജു ശിവാനന്ദ്, സതീഷ് പോള് വി. രാജ് എന്നിവര് ചേര്ന്ന് നിര്മ്മിക്കുന്ന സിനിമയില് ഗരുഡ റാം നായക കഥാപാത്രത്തെ അവതരിപ്പിക്കുന്നു.
സൂപ്പര്ഹിറ്റ് വിജയം നേടിയ 'കെ ജി എഫ്' എന്ന സിനിമയില് വില്ലന് കഥാപാത്രത്തെ അവതരിപ്പിച്ചു ജനശ്രദ്ധ നേടിയ ഗരുഡ റാം ആദ്യമായി നായക വേഷമണിയുന്ന ചിത്രമാണിത്.
നായക പ്രാധാന്യമുള്ള മറ്റൊരു കഥാപാത്രത്തെ അവതരിപ്പിക്കുന്നത് തമിഴ്, കന്നട നടന് സന്ദീപ് ഷെരാവത്ത് ആണ്.
മിസ് ഇന്ത്യ റണ്ണറപ്പ് ആലിയ, ബേബി അന്ന എലിസബത്ത് എന്നിവരാണ് മറ്റ് പ്രധാന അഭിനേതാക്കള്.
മുഴുനീള ആക്ഷന് ചിത്രമായ 'സ്തംഭം 2' സതീഷ് പോള് സംവിധാനം ചെയ്യുന്നു. തിരക്കഥ എഴുതിയിരിക്കുന്നത് പോള് ബ്രദേഴ്സ് ആണ്. ചായാഗ്രഹണം- കെ.സി. ദിവാകര്, എഡിറ്റിംഗ്- ശ്രീകര് പ്രസാദ്, സംഘട്ടനം- ഹരിമുരുകന്, കലാസംവിധാനം- അനില്, സംഗീതം- ഡോ: സുരേന്ദ്രന് എന്നിവരാണ് അണിയറയിലെ പ്രധാനികള്.
ശക്തരായ രണ്ടു മല്ലന്മാരുടെ കഥ പറയുന്ന ചിത്രമായതുകൊണ്ടാണ് സിനിമയ്ക്ക് 'സ്തംഭം 2' എന്ന് പേരിട്ടതെന്ന് സംവിധായകന് സതീഷ് പോള് പറയുന്നു.
പാല, എറണാകുളം സിനിമാ വില്ലേജ് എന്നിവിടങ്ങളിലായി ചിത്രീകരണം പൂര്ത്തിയാകുന്ന 'സ്തംഭം 2'ന്റെ പൂജ ചടങ്ങ് ബംഗളൂരുവിലെ ഡോക്ടര് അംബരീഷ് ഓഡിറ്റോറിയത്തില് നടന്നു. വിവിധ ഭാഷാചിത്രങ്ങളില് നിന്നുള്ള പ്രമുഖര് ചടങ്ങില് പങ്കെടുക്കുകയുണ്ടായി.
വാര്ത്ത- അഞ്ജു അഷറഫ്.