മഞ്ജു ഗോപിനാഥ്-
പാലാ:
മലയാളത്തിന്റെ പ്രിയ നടന്‍ സുരേഷ് ഗോപി MP, പാലാ അമലോത്ഭവ കുരിശുപള്ളി മാതാവിന്റെ തിരുസന്നിധിയില്‍ എത്തി തിരികത്തിച്ചു. പാലാകുരിശുപള്ളി മാതാവിനോടുള്ള വിശ്വാസത്തിന്റെ ഭാഗമായാണ് സുരേഷ് ഗോപി ഇവിടെ എത്തിയത്. വര്‍ഷങ്ങള്‍ക്ക് മുമ്പ് സൂപ്പര്‍ ഹിറ്റ് വിജയം നേടിയ 'ലേലം' എന്ന സിനിമയുടെ ചിത്രീകരണ സമയത്താണ് സുരേഷ് ഗോപി ആദ്യമായി കുരിശുപള്ളി മാതാവിനടുത്തെത്തിയത്. അതിനു ശേഷം പാലായില്‍ വരുമ്പോഴൊക്കെ മാതാവിന്റെ അടുത്തെത്തി പ്രാര്‍ത്ഥിച്ച് മെഴുകുതിരി കത്തിച്ചേ മടങ്ങാറുള്ളൂ.
പുതിയചിത്രമായ 'കാവല്‍ ' എന്ന സിനിമയുടെഷൂട്ടിംഗ് പൂര്‍ത്തിയാക്കി തിരുവനന്തപുരത്തേക്കുള്ള മടക്കയാത്രയിലാണ് പാലായിലെത്തിയത്. സുരേഷ് ഗോപിയുടെ അടുത്ത ചിത്രമായ 'ഒറ്റക്കൊമ്പന്‍' പാലായിലും പരിസരങ്ങളിലുമായാണ് ചിത്രീകരണം നടക്കുന്നത്.
കുരിശുപള്ളിയിലെ പ്രാര്‍ത്ഥനക്കു ശേഷം പാലാ കിഴതടിയൂര്‍ പള്ളിയിലും എത്തി പ്രാര്‍ത്ഥിച്ച ശേഷമാണ് സുരേഷ് ഗോപി മടങ്ങിയത്. 'ഒറ്റക്കൊമ്പന്‍' സിനിമയുടെ സംവിധായകന്‍ മാത്യൂസ് തോമസ്, സുരേഷ് ഗോപിയുടെ കുടുംബ സുഹൃത്തും പൊതു പ്രവര്‍ത്തകനുമായ ബിജു പുളിക്കകണ്ടം എന്നിവരും അദ്ദേഹത്തിനൊപ്പമുണ്ടായിരുന്നു.
