അഞ്ജു അഷറഫ്-
തിരു:
മലയാള സിനിമയിലെ നിത്യ ഹരിത നായകന്‍ പ്രേംനസീറിന്റെ 94ാം ജന്‍മദിനത്തോടനുബന്ധിച്ചു പ്രേംനസീര്‍ ചലച്ചിത്ര ശ്രേഷ്ഠ പുരസ്‌ക്കാരം പ്രശസ്ത സംവിധായകന്‍ ടി.എസ്. സുരേഷ് ബാബുവിന് സമര്‍പ്പിക്കും.
സംവിധായകന്‍ ബാലു കിരിയത്ത് ജൂറി ചെയര്‍മാനും, വഞ്ചിയൂര്‍ പ്രവീണ്‍ കുമാര്‍, പനച്ചമൂട് ഷാജഹാന്‍ എന്നിവര്‍ മെമ്പര്‍മാരുമായ കമ്മിറ്റിയാണ് പുരസ്‌ക്കാരം പ്രഖ്യാപിച്ചത്. 10001 രൂപയും, ഫലകവും, പ്രശസ്തിപത്രവുമാണ് അവാര്‍ഡ്.
പ്രേംനസീറും അദ്ദേഹത്തിന്റെ മകന്‍ ഷാനവാസും ഷാനവാസിന്റെ മകന്‍ ഷാനും സുരേഷ് ബാബുവിന്റെ ചിത്രങ്ങളില്‍ അഭിനയിച്ചിട്ടുണ്ട്. നാലാം തലമുറക്കാരനായ ഷാന്റെ രണ്ട് വയസ്സുകാരനായ മകന്‍ സുരേഷ് ബാബുവിന്റെ ആഡ് ഫിലിമില്‍ അഭിനയിക്കുകയുണ്ടായി. മാത്രമല്ല, പ്രേംനസീറിന്റെ സഹോദരന്‍ പ്രേം നവാസ് എക്‌സിക്യൂട്ടീവ് പ്രൊഡ്യൂസറായിരുന്ന സിനിമയില്‍ അസിസ്റ്റന്റ് ഡയറക്ടറായിരുന്നു സുരേഷ് ബാബു. പ്രേംനസീര്‍ കുടുംബവുമായി അടുത്ത ബന്ധമുള്ള ചലച്ചിത്ര കാരനായ ഒരാള്‍ക്ക് തന്നെയാണ് ഇത്തവണ പ്രേംനസീര്‍ ശ്രേഷ്ഠ പുരസ്‌കാരം സമ്മാനിക്കുന്നത്.
പ്രേംനസീറിന്റെ ജന്‍മദിനമായ ഏപ്രില്‍ 7 ന് വൈകുന്നേരം 6 മണിക്ക് തിരുവനതപുരം തൈക്കാട് ഭാരത് ഭവനില്‍ നടക്കുന്ന ചടങ്ങില്‍ സൂര്യകൃഷ്ണമൂര്‍ത്തി പുരസ്‌ക്കാരം സമര്‍പ്പിക്കുമെന്ന് സെക്രട്ടറി തെക്കന്‍ സ്റ്റാര്‍ ബാദുഷ അറിയിച്ചു. അന്നേ ദിവസം 94 മണ്‍ചിരാതുകള്‍ തെളിച്ചു കൊണ്ടാണ് പുരസ്‌ക്കാര ചടങ്ങുകള്‍ ആരംഭിക്കുക. പ്രേംനസീര്‍ അഭിനയിച്ച സിനിമാഗാനങ്ങള്‍ സ്‌ക്രീനില്‍ പ്രദര്‍ശിപ്പിക്കുന്നതിനോടൊപ്പം ആലപ്പുഴ സംസ്‌കൃതിയുടെ ഒ.ജി. സുരേഷ് നയിക്കുന്ന ഹൃദയഗീതങ്ങളും വേദിയില്‍ അവതരിപ്പിക്കും.
Online PR - CNA.
