അഞ്ജു അഷറഫ്-
കൊച്ചി:
ലോക സിനിമയുടെ ചരിത്രത്തില് ആദ്യമായിട്ടാണ് പ്രത്യേകിച്ചു മലയാളത്തില് അച്ഛനും മകനും ചേര്ന്ന് ഒരുക്കുന്ന സിനിമ പ്രദര്ശനത്തിനെത്തുന്നു. നടനും തിരക്കഥാകൃത്തും സംവിധായകനും നിര്മ്മാതാവുമായ ലാലും ലാലിന്റെ മകന് ലാല് ജൂനിയറും ചേര്ന്നാണ് സിനിമ ഒരുക്കുന്നത്.
ലാല് തിരക്കഥ എഴുതി ലാലും ലാല് ജൂനിയറും ചേര്ന്ന് സംവിധാനം ചെയ്യുന്ന 'സുനാമി' എന്ന ചിത്രം മാര്ച്ച് 11 ന് പ്രദര്ശനത്തിനെത്തും.
പാണ്ടാ ഡാഡ് പ്രൊഡക്ഷന്സിന്റെ ബാനറില് അലന് ആന്റണിയാണ് സിനിമ നിര്മ്മിക്കുന്നത്. 'സുനാമി' നൂറ് ശതമാനവും എന്റര്ടെയിനറാണ്. അതായത് ആസ്വദിച്ചു ചിരിക്കാന് മാത്രമുള്ള ഒരു സിനിമയായിരിക്കും. നര്മ്മത്തിന്റെ എല്ലാ തലങ്ങളിലൂടെയും കടന്നുപോകുന്ന രസകരമായൊരു കഥയില് നിന്നാണ് 'സുനാമി'യുടെ ചിത്രീകരണം. മലയാള സിനിമയില് ഹ്യൂമറിന്റെ പുതിയ തലങ്ങള് അടയാളപ്പെടുത്തിയ നടന് ഇന്നസെന്റ് ലാലുമായുള്ള സൗഹൃദ സംഭാഷണത്തിനിടയില് പറഞ്ഞ തമാശകളുടെ കൂട്ടത്തിലെ ഒരു തമാശയില് നിന്നാണ് സിനിമയുടെ കഥ രൂപപ്പെടുന്നത്.
വൈദികനാകണമെന്ന് ആഗ്രഹിച്ചു ഇറങ്ങിത്തിരിച്ച ഒരു ചെറുപ്പക്കാരന്റെ ജീവിതത്തില് അരങ്ങേറുന്ന സംഭവങ്ങളാണ് അത്യന്തം രസകരമായി സിനിമയില് അവതരിപ്പിക്കുന്നത്.
ബാലു വര്ഗീസ്, ആരാധിക, അജു വര്ഗീസ്, മുകേഷ്, ഇന്നസെന്റ്, സുരേഷ് കൃഷ്ണാ, വിനോദ്, അരുണ്, സിജോ വര്ഗീസ്, കിജന് രാഘവന്, സോബി, ദേവി അജിത്, നിഷാ മാത്യു, ജാസ്മിന്, മാസ്റ്റര് അശ്വഘോഷ് എന്നിവരാണ് ചിത്രത്തിലെ പ്രധാന അഭിനേതാക്കള്.
കൊവിഡ് മഹാമാരിക്കു മുന്പ് ചിത്രീകരണം ആരംഭിക്കുകയും ലോക്ഡോണ് പ്രഖ്യാപിച്ചപ്പോള് ഷൂട്ടിംഗ് നിര്ത്തി വെക്കുകയും ചെയ്ത ചിത്രമാണ് 'സുനാമി'. ലോക്ക്ഡൗണ് പിന്വലിച്ചതിനു ശേഷം ചിത്രീകരണം ആരംഭിക്കുകയും പൂര്ത്തിയാക്കുകയും ചെയ്ത സുനാമി പാണ്ട ഡാഡ് റിലീസ് മാര്ച്ച് 11ന് പ്രദര്ശനത്തിനെത്തി ക്കുകയാണ്.
ഒരു വര്ഷത്തിനുശേഷം തീയറ്ററിലേക്ക് എത്തുന്ന 'സുനാമി' പ്രേക്ഷകരുടെ പ്രതീക്ഷക്കൊത്ത് ഉയരുന്ന മികച്ച സിനിമ തന്നെയായിരിക്കും. ഇതിനുമുന്പ് ലാല് ഒരുക്കിയിട്ടുള്ള സിനിമകളും ലാല് ജൂനിയര് സംവിധാനം ചെയ്ത സിനിമകളും വലിയ വിജയങ്ങളാണ് നേടിയത്. അത് കൊണ്ട്തന്നെയാണ് അച്ഛനും മകനും എന്നതിലുപരി രണ്ട് വിജയ സംവിധായകരുടെ കൂട്ടായ്മയിലൊരുങ്ങുന്ന സിനിമ പ്രേക്ഷകരുടെ പ്രതീക്ഷ വര്ധിപ്പിക്കുന്നത്.