സി എന്‍ എ
ചെന്നൈ:
തമിഴ്‌നാട് മുന്‍ മുഖ്യമന്ത്രി ജയലളിതയായി കങ്കണ റണാവത്ത് എത്തുന്ന 'തലൈവി' സെപ്റ്റംബര്‍ പത്തിന് തിയറ്ററുകളിലെത്തും.
ലോക്ഡൗണ്‍ ഇളവുകള്‍ ഏര്‍പ്പെടുത്തി 50 ശതമാനം പ്രവേശനോപാധിയോടെ തിയറ്ററുകള്‍ തുറക്കാന്‍ തമിഴ്‌നാട് സര്‍ക്കാര്‍ അനുമതി നല്‍കിയതിനു പിന്നാലെയാണ് സിനിമയുടെ റിലീസ് തിയതി പ്രഖ്യാപിച്ചിരിക്കുന്നത്. തമിഴിലും തെലുങ്കിലും ഹിന്ദിയിലുമാണ് ചിത്രം റിലീസിനെത്തുന്നത്.
'വാച്ച്മാന്‍', 'ദേവി 2'എന്നീ ചിത്രങ്ങളിലൂടെ ശ്രദ്ധേയനായ എ.എല്‍ വിജയ് ആണ് 'തലൈവി' സംവിധാനം ചെയ്യുന്നത്.
ജയലളിതയും സിനിമ ജീവിതവും പിന്നീട് രാഷ്ട്രീയപ്രവേശനവുമെല്ലാമാണ് ചിത്രത്തില്‍ കാണിക്കുന്നത്.
കങ്കണയ്‌ക്കൊപ്പം 90കളിലെ റൊമാന്റിക് ഹീറോ അരവിന്ദ് സ്വാമിയാണ് പുരട്ചി തലൈവര്‍ എംജിആറായി വേഷമിടുന്നത്. കരുണാനിധിയുടെ റോളില്‍ നാസറും എത്തുന്നു.
ഭാഗ്യശ്രീ, സമുദ്രക്കനി, രാജ് അര്‍ജുന്‍, മധുബാല, തമ്പി രാമയ്യ, പൂര്‍ണ്ണ, ഭരത് റെഡ്ഡി തുടങ്ങി വലിയ താരനിരയും അണിനിരക്കുന്നുണ്ട് ചിത്രത്തില്‍.
വിബ്രി മീഡിയയുടെ ബാനറില്‍ വിഷ്ണു വരദന്‍ ഇന്ധുരി, ഷായിലേഷ് ആര്‍ സിംഗ് എന്നിവര്‍ ചേര്‍ന്നാണ് നിര്‍മ്മാണം.
Online PR - CNA.
