സി എന്‍ എ-
ചെന്നൈ:
ജിയോ ബേബി സംവിധാനം ചെയ്ത, മലയാളത്തില്‍ ഏറെ വിവാദം സൃഷ്ടിച്ച് ശ്രദ്ധേയമായി നിരൂപക പ്രശംസ നേടിയ 'ദ ഗ്രേറ്റ് ഇന്ത്യന്‍ കിച്ചന്‍' തമിഴില്‍ പുനരാവിഷ്‌ക്കരിക്കപ്പെടുന്നു. 'ജയം കൊണ്ടാന്‍', 'കണ്ടേന്‍ കാതലൈ', 'സേട്ടൈ', 'ബിസ്‌കോത്', 'ഇവന്‍ തന്തിരന്‍' എന്നീ സിനിമകളിലൂടെ ശ്രദ്ധേയനായ മണിരത്‌നം ശിഷ്യന്‍ ആര്‍. കണ്ണനാണ് ഐശ്വര്യാ രാജേഷിനെ നായികയാക്കി ഇനിയും പേരിട്ടിട്ടില്ലാത്ത തമിഴ് 'ദ ഗ്രേറ്റ് ഇന്ത്യന്‍ കിച്ചന്‍' അണിയിച്ചൊരുക്കുന്നത്. ചിത്രത്തിന്റെ പൂജാ ചടങ്ങ് ഇന്ന് ചെന്നൈയില്‍ നടന്നു. കണ്ണന്‍ സംവിധാനം ചെയ്യുന്ന പത്താമത്തെ സിനിമയാണിത്. ഇതര കഥാപാത്രങ്ങളുടെ താര നിര്‍ണയം കഴിഞ്ഞയുടന്‍ ഈ മാസം തന്നെ ചിത്രീകരണം ആരംഭിക്കുമെന്ന് സംവിധായകന്‍ വെളിപ്പെടുത്തി. സംവിധായകന്‍ കണ്ണന്‍ തന്നെയാണ് മസാല പിക്‌സിന്റെ ബാനറില്‍ എം കെ ആര്‍ പി പ്രൊഡക്ഷന്സുമായി സഹകരിച്ചു കൊണ്ട് തമിഴ് 'ദ ഗ്രേറ്റ് ഇന്ത്യന്‍ കിച്ചന്‍' നിര്‍മ്മിക്കുന്നത്. ബാലസുബ്രമണ്യമാണ് ഛായാഗ്രാഹകന്‍. പി ആര്‍ ഓ- സി.കെ. അജയ്കുമാര്‍.
