സി എന്‍ എ-
ചെന്നൈ:
സുരാജ് വെഞ്ഞാറമൂട്, നിമിഷ സജയന്‍ എന്നിവരെ കേന്ദ്ര കഥാപാത്രങ്ങളാക്കി ജിയോ ബേബി സംവിധാനം ചെയ്ത 'ദ ഗ്രേറ്റ് ഇന്ത്യന്‍ കിച്ചണ്‍' തമിഴ് തെലുങ്ക് റീമേക്ക് ഒരുങ്ങുന്നു.
സ്ത്രീകള്‍ നേരിടുന്ന അസമത്വവും അടിച്ചമര്‍ത്തലുകളും അടുക്കളയുടെ പശ്ചാത്തലത്തില്‍ ചൂണ്ടിക്കാട്ടിയ ചിത്രം വലിയ ചര്‍ച്ചകള്‍ക്ക് തുടക്കമിട്ടിരുന്നു.
'കിലോമീറ്റേഴ്‌സ് ആന്‍ഡ് കിലോമീറ്റേഴ്‌സ്' എന്ന ചിത്രത്തിനു ശേഷം ജിയോ ബേബി സംവിധാനം ചെയ്ത 'ദി ഗ്രേറ്റ് ഇന്ത്യന്‍ കിച്ചണ്‍' ജനുവരി 15നാണ് നീം സ്ട്രീ എന്ന ഒ.ടി.ടി. പ്ലാറ്റ്‌ഫോമിലൂടെ റിലീസ് ചെയ്തത്.
'ദ ഗ്രേറ്റ് ഇന്ത്യന്‍ കിച്ചണ്‍' കൈകാര്യം ചെയ്ത വിഷയത്തിന്റെ പ്രാധാന്യവും അവതരണവും കൊണ്ട് ആദ്യദിനത്തില്‍ തന്നെ വലിയ പ്രേക്ഷകശ്രദ്ധ നേടാനും ചിത്രം ബിബിസി പോലുള്ള അന്തര്‍ദേശീയ മാധ്യമങ്ങളില്‍ വരെ ഇടംപിടിച്ചിരുന്നു.
തമിഴില്‍ 'ബൂമറാംഗും', 'ബിസ്‌കോത്തു'മൊക്കെ ഒരുക്കിയ ആര്‍ കണ്ണനാണ് ചിത്രത്തിന്റെ തമിഴ് തെലുങ്ക് റീമേക്ക് അവകാശം വാങ്ങിയിരിക്കുന്നത്. തമിഴ്, തെലുങ്ക് റീമേക്കുകള്‍ സംവിധാനം ചെയ്യുന്നതും കണ്ണന്‍ തന്നെ.
'തൊണ്ടിമുതലും ദൃക്‌സാക്ഷിയും' എന്ന ചിത്രത്തിന് ശേഷം സുരാജ് വെഞ്ഞാറമൂടും നിമിഷ സജയനും ദമ്പതികളായി എത്തിയ ചിത്രമായിരുന്നു 'ദ ഗ്രേറ്റ് ഇന്ത്യന്‍ കിച്ചണ്‍'.
'ശക്തമായ തിരക്കഥയാണ് ഗ്രേറ്റ് ഇന്ത്യന്‍ കിച്ചണിന്റേത്. തമിഴ് പ്രേക്ഷകരുടെ അഭിരുചിയുമായി എളുപ്പം ചേരുന്നതുമാണ്. ഒരു വീട്ടമ്മയുടെ ദുരവസ്ഥ സിനിമയില്‍ നല്ലരീതിയില്‍ ചിത്രീകരിച്ചിട്ടുണ്ട്. ചിത്രം കണ്ടതിനുശേഷം സ്ത്രീകളോട് ഒരു ഗ്ലാസ് വെള്ളം ആവശ്യപ്പെടുമ്പോള്‍പ്പോലും നമ്മള്‍ രണ്ടുവട്ടം ആലോചിക്കും.' എന്നാണ് ആര്‍ കണ്ണന്‍ പ്രമുഖ മാധ്യമത്തിന് നല്‍കിയ അഭിമുഖത്തില്‍ പറഞ്ഞത്.
തമിഴിലും തെലുങ്കിലും പ്രശസ്തയായ ഒരു നടിയാവും മലയാളത്തില്‍ നിമിഷ അവതരിപ്പിച്ച കഥാപാത്രത്തെ അവതരിപ്പിക്കുക. തെന്നിന്ത്യയില്‍ മുഴുവന്‍ അറിയപ്പെടുന്ന ഒരു നടന്‍ സുരാജിന്റെ വേഷവും ചെയ്യും. താരനിര്‍ണ്ണയം ഏറെക്കുറെ പൂര്‍ത്തിയായെന്നും വൈകാതെ പേരുകള്‍ പ്രഖ്യാപിക്കുമെന്നും കണ്ണന്‍ പറഞ്ഞു.
ഛായാഗ്രഹണം പി ജി മുത്തയ്യയാണ് നിര്‍വ്വഹിക്കുക. സംഭാഷണം ഒരുക്കുന്നത് പട്ടുകോട്ടൈ പ്രഭാകര്‍ ആണ്.
