CNA
കൊച്ചി:
കശ്മീരി പണ്ഡിറ്റുകളുടെ ജീവിതവും അവര് അനുഭവിച്ച യാതനകളും തുറന്നു കാട്ടുന്ന ചിത്രം 'ദി കശ്മീര് ഫൈല്സ്' ചരിത്രം സൃഷ്ടിക്കുന്നു.
തെണ്ണൂറുകളില് കശ്മീര് താഴ്വരയില് കശ്മീരി ഹിന്ദു പണ്ഡിറ്റുകളുടെ കൂട്ടക്കൊല അടക്കം നടന്ന സംഭവികാസങ്ങളുടെ ഹൃദയ സ്പര്ശിയായ സത്യം വിവരിക്കുന്ന 'ദി കശ്മീര് ഫൈല്സ്' എന്ന ചിത്രം ചരിത്രം സൃഷ്ടിക്കുകയാണ്. വിവേക് രഞ്ജന് അഗ്നിഹോത്രിയാണ് ചിത്രത്തിന്റെ സംവിധായകന്.
സത്യത്തോട് ഏറ്റവും അടുത്ത് നില്ക്കുന്ന സിനിമയായതിനാല് അത് നല്കുന്ന വേദന വളരെയധികമാണ്. സിനിമയിലെ മരണങ്ങളൊന്നും സാങ്കല്പ്പികമോ, ദുരന്തങ്ങളൊന്നും യാദൃശ്ചികമോ, മുറിവുകളൊന്നും അതിശയോക്തി കലര്ന്നതോ ചെറുതാക്കി ചിത്രീകരിക്കപ്പെട്ടതോ അല്ല.
'ഒന്നുകില് മതം മാറൂ, അല്ലെങ്കില് കൊല്ലപ്പെടൂ, അല്ലെങ്കില് നാട് വിടൂ' എന്ന പ്രഖ്യാപനം കാശ്മീരീല് പ്രതിധ്വനിച്ചപ്പോള് അഞ്ച് ലക്ഷത്തിലുമധികം കശ്മീരി പണ്ഡിറ്റുകള്ക്ക് എല്ലാം ഉപേക്ഷിക്കേണ്ടി വന്നു. പിന്നീട് നടന്നത് ചരിത്രമാണ്. പലരും മറന്നു തുടങ്ങിയ ആ ചരിത്രമാണ് കാശ്മീരി പണ്ഡിറ്റുകളുടെ വംശഹത്യയെ അടിസ്ഥാനമാക്കിയുള്ള 'ദി കശ്മീര് ഫൈല്സ്'.
കശ്മീരി പണ്ഡിറ്റുകള് അഭിമുഖീകരിച്ച വേദനയും, കഷ്ടപ്പാടുകള്, പോരാട്ടങ്ങള്, ആഘാതങ്ങള്, യാതനകളും ഹൃദയ സ്പര്ശിയായ സത്യമാണ് 'ദി കശ്മീര് ഫയല്സ്' വ്യക്തമാക്കുന്നത്.
ഇത് എല്ലാവരുടെയും ശ്രദ്ധയിലേയ്ക്ക് എത്തിക്കുകയാണ് ലക്ഷ്യമെന്ന് 'ദി കശ്മീര് ഫയല്സിന്റെ നിര്മ്മാതാവും ചിത്രത്തിലെ അഭിനേത്രയുമായ പല്ലവി ജോഷി പറയുന്നു.
സിനിമയില് സ്വതന്ത്ര കാശ്മീരിന് വേണ്ടിയുള്ള പ്രക്ഷോഭങ്ങളും പ്രതിഷേധങ്ങളും തുടരാന് വിദ്യാര്ത്ഥികളെ പ്രേരിപ്പിക്കുന്ന കഥാപാത്രമായാണ് പല്ലവി ഈ ചിത്രത്തില് എത്തുന്നത്.
ഈ വിഷയത്തില് ഒരു സിനിമ നിര്മ്മിക്കാന് കശ്മീരി പണ്ഡിറ്റുകള് തന്നെ സമീപിച്ചിരുന്നതായും പല്ലവി വ്യക്തമാക്കുന്നുണ്ട്.
'ദി കശ്മീര് ഫൈല്സ്', യുഎസ്എ, ജമ്മു, ഡല്ഹി എന്നിവയുള്പ്പെടെ നിരവധി സ്ഥലങ്ങളില് പ്രദര്ശിപ്പിച്ചിരുന്നു. സിനിമയ്ക്ക് ലഭിച്ച പ്രതികരണം അതിശക്തമായിരുന്നുവെന്നും പല്ലവി പറയുന്നു.
'അവര് എന്നെയും വിവേകിനെയും കെട്ടിപ്പിടിച്ചു. ഞങ്ങളുടെ തോളില് കിടന്നു കരഞ്ഞു. ആ വികാരത്തെ തടഞ്ഞു നിര്ത്താന് വളരെ പ്രയാസമാണെങ്കിലും, അവരുടെ കഥകള് ഞങ്ങള് സത്യസന്ധമായി ഈ സിനിമയിലൂടെ പറഞ്ഞു എന്നത് അവര്ക്ക് ഒരു അംഗീകാരം ലഭിച്ചത് പോലെയായിരുന്നു. ഈ സിനിമയ്ക്ക് ശേഷം കശ്മീര് പണ്ഡിറ്റുകളില് നിന്ന് ലഭിച്ച ആലിംഗനമാണ് ഞങ്ങള്ക്ക് ലഭിച്ച ഏറ്റവും വലിയ പുരസ്കാരമെന്നും' പല്ലവി ജോഷി വ്യക്തമാക്കി.
രണ്ട് മണിക്കൂറും 50 മിനിറ്റ് ദൈര്ഘ്യമുള്ള ഈ ചിത്രം വെള്ളിയാഴ്ചയാണ് തിയറ്ററുകളില് റിലീസ് ചെയ്തത്. റിലീസ് ദിനം തന്നെ ചിത്രം 3.25 കോടി രൂപയുടെ കളക്ഷനാണ് നേടിയത്.
ചിത്രത്തിന് ഇതിനോടകം തന്നെ വലിയ പ്രേക്ഷക പ്രീതിയാണ് ലഭിച്ചിട്ടുള്ളത്. കൂടാതെ ചിത്രം കണ്ടവര് സോഷ്യല് മീഡിയയില് ചിത്രത്തെ കുറിച്ച് മികച്ച അഭിപ്രായമാണ് പറയുന്നത്.
#Righttojustice എന്ന ഹാഷ് ടാഗോടു കൂടിയാണ് എല്ലാവരും പ്രതികരിക്കുന്നത്.
ചിത്രം റിലീസ് ചെയ്ത് ഇതിനോടകം 60.20 കോടി രൂപയുടെ കളക്ഷനാണ് നേടിക്കഴിഞ്ഞു.
യഥാര്ഥ സംഭവങ്ങളില് നിന്ന് പ്രചോദനം ഉള്ക്കൊണ്ടാണ് ചിത്രം ഒരുക്കിയിരിക്കുന്നത്.
അനുപം ഖേറും മിഥുന് ചക്രവര്ത്തിയുമാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
ചിത്രത്തില് അനുപം ഖേര് അവതരിപ്പിക്കുന്ന കഥാപാത്രമായ പുഷ്കര് നാഥ് പണ്ഡിറ്റിന്റെയും അദ്ദേഹത്തിന്റെ കുടുംബത്തിന്റെയും കഥയാണ് 'ദി കശ്മീര് ഫൈല്സ്' പറയുന്നത്. തകര്ന്നടിഞ്ഞ പ്രതീക്ഷയുടെയും നിരാശാജനകമായ വ്യവസ്ഥിതിയുടെയും അന്തസ്സിനു വേണ്ടിയുള്ള പോരാട്ടത്തിന്റെയും അതേസമയം വഞ്ചനയുടെയും കഥ.
അനുപം ഖേര് എന്ന നടന് ഇന്ത്യന് സിനിമയ്ക്ക് ഇതുവരെ നല്കിയതില് ഏറ്റവും മികച്ച സംഭാവനയായിരിക്കും ഈ ചിത്രം.
മിഥുന് ചക്രവര്ത്തി, അനുപം ഖേര്, പല്ലവി ജോഷി, എന്നിവരെ കൂടാതെ ദര്ശന് കുമാര്, ചിന്മയി മാണ്ട്ലേകര്, പുനീത് ഇസ്സര്, പ്രകാശ് ബെലവാഡി, അതുല് ശ്രീവാസ്തവ, മൃണാല് കുല്ക്കര്ണി, ഭാഷാ സംബ്ലി, സൗരവ് വര്മ്മ, അമന് ഇഖ്ബാല് എന്നിവരടങ്ങുന്ന ഒരു നീണ്ട താരനിരതന്നെ ചിത്രത്തില് പ്രധാന വേഷങ്ങളില് അഭിനയിച്ചിട്ടുണ്ട്.
പ്രശസ്ത ഇന്ത്യന് ക്രിക്കറ്റ് താരം സുരേഷ് റയ്നയും ചിത്രത്തെക്കുറിച്ച് വീഡിയോ ട്വിറ്ററില് പങ്കുവച്ചിട്ടുണ്ട്.
ചിത്രത്തിന്റെ ജോലികള് ആരംഭിച്ചത് മുതല് സംവിധായകന്റെ കുടുംബത്തിനടക്കം രൂക്ഷമായ ഭീഷണിയാണ് നേരിടേണ്ടി വന്നത്. ഇതിനെതിരെയെല്ലാം ശബ്ദം ഉയര്ത്തി കൊണ്ടാണ് ചിത്രത്തിന്റെ സംവിധായകന് വിവേക് രഞ്ജന് അഗ്നിഹോത്രി മുന്നോട്ടു പോയത്.
'ഞാന് എല്ലായ്പ്പോഴും ഇന്ത്യയുടെ ശത്രുക്കള്ക്കെതിരെയാണ് സംസാരിച്ചത്. ഇന്ത്യന് സംസ്കാരം പുണ്യമായി കാണുന്ന ശിവനെയും സരസ്വതിയെയും നശിപ്പിച്ച മനുഷ്യത്വരഹിതമായ ഭീകരതയെ തുറന്നുകാട്ടാനുള്ള ശ്രമമാണ് 'ദി കശ്മീര് ഫൈല്സ്'.
ഇപ്പോള് മതഭീകരത ഇന്ത്യയുടെ ഭൂപ്രദേശത്ത് കടന്നുകയറുകയാണ്. അതുകൊണ്ടാണ് എന്നെപ്പോലുള്ളവരെ നിശബ്ദരാക്കാനാണ് അവര് ആഗ്രഹിക്കുന്നത്, കേള്ക്കാന് കഴിയാത്തവര്ക്ക് വേണ്ടിയാണ് ഞാന് എപ്പോഴും സംസാരിക്കുന്നത്, ഇന്ത്യ വിരുദ്ധ അര്ബന് നക്സലുകളുടെ നിരവധി അസത്യങ്ങളും വ്യാജ വിവരണങ്ങളും ഞാന് തുറന്നുകാട്ടുന്നു, അവര് എന്നെ നിശബ്ദരാക്കാന് ആഗ്രഹിക്കുന്നെങ്കിലും അവര് അതില് വിജയിക്കില്ല അത് വ്യക്തമാണ്' എന്നും വിവേക് രഞ്ജന് അഗ്നിഹോത്രി പറഞ്ഞു.
ഹാരിയാന, ഗുജറാത്ത്, മധ്യപ്രദേശ്, കര്ണാടക, ഗോവ, ത്രിപുര, ഉത്തരാഖണ്ഡ് എന്നീ സംസ്ഥാനങ്ങള് 'ദി കശ്മീര് ഫൈല്സ്' എന്ന സിനിമക്ക് വിനോദ നികുതി ഒഴിവാക്കി പിന്തുണ പ്രഖ്യാപിച്ചുകഴിഞ്ഞു.
സീ സ്റ്റുഡിയോസിന്റെയും അഭിഷേക് അഗര്വാള് ആര്ട്സിന്റെയും ബാനറില് അഭിഷേക് അഗര്വാള്, തേജ് നാരായണ് അഗര്വാള്, വിവേക് അഗ്നിഹോത്രി, പര്വ് ബാലി എന്നിവര് ചേര്ന്നാണ് ചിത്രത്തിന്റെ നിര്മ്മാണം. ലൈന് പ്രൊഡ്യൂസര്- ഗൗരവ് ഗൗതം, പല്ലവി ജോഷി.
രചന- വിവേക് അഗ്നിഹോത്രി, സൗരഭ് എം.പാണ്ഡെ. സംഗീത സംവിധാനം- സ്വപ്നില് ബന്ദോദ്കര്, രോഹിത് ശര്മ്മ. ബിജിഎം സ്കോര്- രോഹിത് ശര്മ്മ, ഗാനങ്ങള്- സ്വപ്നില് ബന്ദോദ്കര്, എഡിറ്റിംഗ്- ശംഖ് രാജധ്യക്ഷ, ഛായാഗ്രഹണം- ഉദയ്സിംഗ് മൊഹിതെ, പ്രൊഡക്ഷന് ഡിസൈന്- ഉദയ് പ്രകാശ് സിംഗ്, കൃഷ്ണ താക്കൂര്.
മേക്കപ്പ്- മുഹമ്മദ് അല്താഫ്, പ്രൊഡക്ഷന് മാനേജര്- ദിവ്യം അഗര്വാള്, ശ്രാവണ് ജക്കുള, വസ്ത്രാലങ്കാരം- ഖത്രി ഇര്ഫാന്, വിഎഫ്എക്സ്- അഗ്നി ദാസ്, ഭാരത് വാസ്കര്, ആനിമേഷന്- അര്മാത്യ രുദ്ര, പ്രൊഡക്ഷന് കണ്ട്രോളര്- രാജന് തിവാരി, വിതരണം- ചെയ്തത് സീ സ്റ്റുഡിയോസ്.
വാര്ത്ത പ്രചരണം- എം.എം. കമ്മത്ത്
Online PR - CinemaNewsAgency.Com