CNA
കൊച്ചി:
ചുരുങ്ങിയ കാലം കൊണ്ട് നടനെന്ന നിലയില്‍ പ്രേക്ഷകരുടെ അംഗീകാരം നേടിയെടുത്ത നടനാണ് ജോണി ആന്റണി.
സംവിധായകനായി സൂപ്പര്‍ ഹിറ്റുകള്‍ സൃഷ്ടിച്ചതുപോലെ നടനായപ്പോഴും ചെയ്ത കഥാപാത്രങ്ങളെല്ലാം ഹിറ്റ്!
ഇപ്പോഴിതാ പാട്ടുകാരനായും ജോണി ആന്റണി വരുന്നു. 'തിരിമാലി' എന്ന ചിത്രത്തിനു വേണ്ടിയാണ് താരം ഗായകനായത്.
'ഭാഗ്യം
നെറും തലയ്ക്കുമേലുദിക്കുവേ
നാട് നടുനിവര്‍ത്തണ്
കാലം
മെല്ലെ ചിരിച്ചുകൊണ്ടിരിക്കവേ....'
റെക്കോര്‍ഡിങ് സ്റ്റുഡിയോയില്‍ പാടി തകര്‍ക്കുകയാണ് ജോണി ആന്റണി. കൂടെ പാടുന്നത് ബിബിന്‍ ജോര്‍ജും ധര്‍മ്മജനും.
താരങ്ങള്‍ക്ക് വേണ്ട നിര്‍ദേശങ്ങള്‍ കൊടുത്ത് അരികെ സംഗീത സംവിധായകന്‍ ശ്രീജിത്ത് ഇടവന.
ബിബിനും ധര്‍മ്മജനും മുമ്പ് പാടിയിട്ടുണ്ടെങ്കിലും ജോണി ആന്റണിക്കിത് കന്നി പാട്ടാണ്. അതിന്റെ ആവേശം പാട്ടിലുണ്ട്.
'സംവിധായകന്‍ രാജീവ് ഷെട്ടിയും നിര്‍മാതാവ് എസ്. കെ. ലോറന്‍സും അടുത്ത സുഹൃത്തുക്കളാണ്. അവരുടെ നിര്‍ബന്ധമാണ് എന്നെ പാട്ടുകാരനാക്കിയത്.
ശ്രീജിത്ത് ഒപ്പം നിന്ന് പ്രോത്സാഹനം തന്നതോടെ പാടാന്‍ തീരുമാനിക്കുകയായിരുന്നു. സുഹൃത്തും മാധ്യമ പ്രവര്‍ത്തകനുമായ വിവേക് മുഴക്കുന്ന് ആണ് വരികള്‍ എഴുതിയത്.' ജോണി ആന്റണി പറഞ്ഞു.
എന്തുവന്നാലും തന്നെ ബാധിക്കില്ല എന്ന മനുഷ്യന്റെ അഹങ്കാരത്തെ കളിയാക്കുന്നതാണ് ഗാനം. കോവിഡ് കാലത്ത് നാട് നടുനിവര്‍ത്തുമ്പോള്‍ നിസാരകാരണങ്ങളാല്‍ തമ്മില്‍ കലഹിക്കുന്നതിനെയും ഗാനം വിമര്‍ശനവിധേയമാക്കുന്നു.
പ്രമുഖതാരങ്ങള്‍ അണിനിരക്കുന്ന 'തിരിമാലി' എസ്.കെ. ലോറന്‍സ് ആണ് നിര്‍മ്മിച്ചത്.
ജോണി ആന്റണി ആദ്യമായി അഭിനയിച്ച 'ശിക്കാരി ശംഭു'വിന്റെ നിര്‍മ്മാതാവും ലോറന്‍സ് ആയിരുന്നു.
സേവ്യര്‍ അലക്‌സിന്റേതാണ് തിരക്കഥ. വന്‍താരനിരയുമായി 'തിരിമാലി' ജനുവരി 27 ന് റിലീസ് ചെയ്യും.
Online PR - CinemaNewsAgency.Com
