സി എന് എ-
കൊച്ചി:
ഏയ്ഞ്ചല് മരിയാ സിനിമാസിന്റെ ബാനറില് എസ്. കെ. ലോറന്സ് നിര്മ്മിക്കുന്ന പുതിയ ചിത്രമാണ് 'തിരിമാലി'.
സൂപ്പര് ഹിറ്റായ 'ശിക്കാരി ശംഭു'വിനു ശേഷം ഏയ്ഞ്ചല് മരിയാ സിനിമാസ് നിര്മ്മിക്കുന്ന പുതിയ ചിത്രമാണിത്.
റാഫി മെക്കാര്ട്ടിന്, ഷാഫി എന്നിവരുടെ സഹസംവിധായകനായി നിരവധി ചിത്രങ്ങളില് സഹസംവിധായകനായിരുന്ന രാജീവ് ഷെട്ടിയാണ് ഈ ചിത്രം സംവിധാനം ചെയ്യുന്നത്.
ഈ ചിത്രത്തിന്റെ നല്ലൊരു ഭാഗം രംഗങ്ങളും ചിത്രീകരിക്കുന്നത് നേപ്പാളിലാണ്.
ഈ ചിത്രത്തിന്റെ ലൊക്കേഷന് തേടി ഒരു സംഘം അണിയറ പ്രവര്ത്തകര് നേപ്പാളിലെത്തുകയുണ്ടായി.
നേപ്പാളില് അധികം മലയാള സിനിമകള് ചിത്രീകരിച്ചിട്ടില്ല.
ഏറെ വിജയം നേടിയ മോഹന്ലാലിന്റെ 'യോദ്ധ'യാണ് നേപ്പാളില് ആദ്യം ചിത്രീകരിച്ച മലയാള ചിത്രം.
പിന്നീട് സുനില് സംവിധാനം ചെയ്ത ''ലക്കി ജോക്കേഴ്സ്' എന്ന ചിത്രം ഇവിടെ കുറച്ചു ഭാഗങ്ങള് ചിത്രീകരിച്ചിരുന്നു.
ഈ രണ്ടു ചിത്രങ്ങള്ക്കു ശേഷം വലിയൊരു ഇടവേളക്കുശേഷമാണ് ഇപ്പോള് ഒരു മലയാള ചിത്രം നേപ്പാളിന്റെ പശ്ചാത്തലത്തിലൂടെ ഒരുങ്ങുന്നത്.
ഏറെ ഇടവേളക്കുശേഷമാണ് കഴിഞ്ഞ ഏപ്രില് മാസത്തില് ചിത്രീകരണത്തിനുള്ള ഒരുക്കങ്ങളൊക്കെ നടന്നുവരുന്നതിനിടയിലാണ് കൊറോണ വൈറസിന്റെ കടന്നുവരവും അതിനേത്തുടര്ന്നുണ്ടാകുന്ന പ്രശ്നങ്ങളും അരങ്ങേറുന്നത്. അതോടെ എല്ലാ പ്രവര്ത്തനങ്ങളും നിലച്ചുപോയ സാഹചര്യത്തില് നിന്നും സാവധാനം മോചനം നേടി വീണ്ടും കര്മ്മരംഗങ്ങള് സജീവമായ സാഹചര്യത്തിലാണ് ചിത്രീകരണം ആരംഭിക്കുവാന് പോകുന്നതെന്ന് നിര്മ്മാതാവ് എസ്. കെ. ലോറന്സ് പറഞ്ഞു.
കേരളത്തിലും ഈ ചിത്രത്തിന്റെ ചിത്രീകരണമുണ്ട്. പകുതിയോളം ഭാഗങ്ങള് കേരളത്തിലും പകുതിഭാഗങ്ങള് നേപ്പാളിലുമായിട്ടാണ് ഈ ചിത്രത്തിന്റെ കഥ നടക്കുന്നത്.
നേപ്പാള് പോര്ഷന് ചിത്രീകരിച്ചതിനു ശേഷമേ കേരളത്തിലെ ഭാഗങ്ങള് ചിത്രീകരിക്കുകയുള്ളൂവെന്ന് നിര്മ്മാതാവ് ലോറന്സ് പറഞ്ഞു.
സുഗീതിന്റെ സംവിധാനത്തില് കുഞ്ചാക്കോ ബോബന് നായകനായ 'ശിക്കാരി ശംഭു' എന്ന ചിത്രം നിര്മ്മിച്ചു കൊണ്ടാണ് ലോറന്സിന്റെ ചലച്ചിത്രനിര്മ്മാണ രംഗത്തേക്കുള്ള തുടക്കം.
'ശിക്കാരി ശംഭു' എല്ലാ അര്ത്ഥത്തിലും ഒരു വിജയമായിരുന്നു. ആ ചിത്രത്തിന്റെ വിജയമാണ് വീണ്ടും നിര്മ്മാണ രംഗത്തു തുടരാനുള്ള പ്രചോദനം നല്കിയതെന്ന് ലോറന്സ് അറിയിച്ചു.
എനിക്ക് നേപ്പാളുമായി വളരെ നേരത്തേ ബന്ധമുണ്ട്. മിഡില് ഈസ്റ്റിലെ തന്റെ ബിസിനസ്സുമായി ബന്ധപ്പെട്ട് പലപ്പോഴും കാഠ്മണ്ഡുവില് വരേണ്ടിയിരുന്നു ആ പരിചയം നേപ്പാളിലെ ലൊക്കേഷന് തേടിയുള്ള യാത്രയില് ഏറെ സഹായകരമായി. ലോറന്സ് പറഞ്ഞു.
കഴിഞ്ഞ ജനുവരി അവസാന വാരത്തില് നിര്മ്മാതാവ് ലോറന്സും എക്സിക്കുട്ടീവ് പ്രൊഡ്യൂസര് നിഷാദുമാണ് ആദ്യം പുറപ്പെട്ടത്.
അവര് അവിടെയെത്തി, അവിടുത്തെ ലോക്കല് മാനേജേഴ്സുമായി ബന്ധപ്പെട്ട് കാര്യങ്ങള് ഒന്ന് സുഗമമാക്കിയതിനു ശേഷമാണ് ഇക്കഴിഞ്ഞ ഫെബ്രുവരി മൂന്നിന് ബാക്കിയുള്ള നാലംഗ സംഘം കൊച്ചിയില് നിന്നും പുറപ്പെടുന്നത്.
സംവിധായകന് രാജീവ് ഷെട്ടി, ഛായാഗ്രാഹകന് വിനോദ് ഇല്ലമ്പള്ളി, അസ്റ്റോസ്സിയേറ്റ് ഡയറക്ടര് മനേഷ് ബാല കൃഷ്ണന്, തിരക്കഥാകൃത്ത് സേവ്യര് അലക്സ്, എന്നിവരും ചേര്ന്നുള്ള മൊത്തം ആറംഗ സംഘമാണ് ഒരു മാസത്തോളം നേപ്പാളിലെ കാഠ്മണ്ഡുവിലും പൊക്രയിലുമായി ലൊക്കേഷന് കണ്ടെത്താനായി താമസിച്ചിരുന്നത്.
കൊച്ചിയില് നിന്നും ദില്ലി വഴി കാഠ്മണ്ഡുവിലിറങ്ങി അവിടെ നിന്നും ലോറന്സും നിഷാദും ഒത്തുചേര്ന്ന് പൊക്രയിലേക്കു പുറപ്പെടുകയായിരുന്നു. കാഠ്മണ്ഡുവില് നിന്നും അരമണിക്കൂറോളം ഫ്ളൈറ്റില് സഞ്ചരിച്ചാണ് പൊക്ര എന്ന സ്ഥലത്തെത്തിയത്.
ഒരാഴ്ച്ചയോളം പൊക്രയില് തങ്ങി ഓഫ് റോഡ് ലൊക്കേഷനുകളാണ് ഇവിടെ തേടിയത്. കുന്നുകളും മലനിരകളുമുള്ള ലൊക്കേഷനിലേക്ക് പലപ്പോഴും കാല്നട തന്നെയായിരുന്നു ശരണം. കാഠ്മണ്ഡു നഗരത്തില് നിന്നും തികച്ചും വിഭിന്ന മായ ഒരു ഭൂപ്രദേശമാണ് പൊക്ര നാഗരികതയല്ല ഈ നഗരത്തിന്റെ പ്രത്യേകത. ചിത്രത്തില് ഇത്തരം പ്രദേശങ്ങള്ക്ക് ഏറെ പ്രാധാന്യമുണ്ട്.
പൊക്രയിലെ ഒരു ലൊക്കേഷന്റെ പേരു് മനാംഗ് എന്നാണ്.
മഷ് താംഗ് എന്ന സ്ഥലമാണ് മറ്റൊരു പ്രധാന ലൊക്കേഷന്.
അതിനനുയോജ്യമായ ലൊക്കേഷനുകള് ഇവിടെ ലഭിച്ചുവെന്ന് സംവിധായകന് രാജീവ് ഷെട്ടിയും, ഛായാഗ്രാഹകന് വിനോദ് ഇല്ലമ്പള്ളിയും വ്യക്തമാക്കി.
പൊക്രയിലെ ഉദ്യമം പൂര്ത്തിയാക്കി ഒരാഴ്ച്ചക്കു ശേഷം കാഠ്മണ്ഡുവിലേക്കു തിരിച്ചു. നേപ്പാളിലെ ഏറിയ ഭാഗവും ചിത്രീകരിക്കുന്നത് കാഠ്മണ്ഡുവിലാണ്.
നേപ്പാളിലെ പ്രശസ്ത നിര്മ്മാതാവായ സരോജ് ന്യു പെയ്നിന്റെ ഉടമസ്ഥതയിലുള്ള അനന്യാ ഫിലിംസാണ് നേപ്പാളിലെ ചിത്രീകരണത്തിന്റെ മേല്നോട്ടം വഹിക്കുന്നത്.
നേപ്പാളിലെത്തുന്ന ബഹു ഭൂരിപക്ഷം ചിത്രങ്ങള്ക്കും ഇവിടുത്തെ മേല്നോട്ടം വഹിക്കുന്നത് ആനന്യ ഫിലിംസാണ്.
ഈ ചിത്രം നേപ്പാളില് പ്രദര്ശിപ്പിക്കുമെന്ന് സരോജ് ന്യു പെയ്ന് നിര്മ്മാതാവിന് ഉറപ്പു നല്കി.
ഇന്ഡ്യന് ചിത്രങ്ങളില് ഹിന്ദി ചിത്രങ്ങള്ക്കാണ് ഏറ്റവും വലിയ ഡിമാന്റ്. തമിഴ്, തെലുങ്കു ഭാഷകളിലെ വന്കിട ചിത്രങ്ങള്ക്കും ഇവിടെ നല്ല ഡിമാന്റ് ഉണ്ട്. ഇന്ത്യയോട് തൊട്ടടുത്ത് കിടക്കുന്ന ഈ രാജ്യത്ത് പല മേഖലകളിലായി ധാരാളം ഇന്ത്യാക്കാരുണ്ട്.
ഏറെയും ബിസിനസ്സുകാരാണ്.
ടൂറിസ്റ്റ് കേന്ദ്രം കൂടിയായ നേപ്പാളിനേയും കൊറോണ വലിയ നിലയിലാണ് ബാധിച്ചത്. സാവധാനത്തില് അതിനെ മറികടക്കുവാനുള്ള ശ്രമത്തിലാണ് ഈ നാട്.
യാക്യതി എന്ന പ്രശസ്തമായ ഹോട്ടലിലായിരുന്നു കാഠ്മണ്ഡുവിലെ താമസം. താമസത്തിനും യാത്രക്കുമൊക്കെയുള്ള ഏര്പ്പാടുകള് അനന്യാ ഫിലിംസാണ് ഏര്പ്പെടുത്തിയിരുന്നത്.
അവര് ഏര്പ്പെടുത്തിയ രണ്ടു പേരാണ് ലൊക്കേഷന് കാണിക്കാനായി എപ്പോഴും കൂടെയുണ്ടായിരുന്നത്.
ഈ ചിത്രത്തില് നേപ്പാള് കഥാപാത്രങ്ങളണ്ട് അത് നേപ്പാള് താരങ്ങള് തന്നെ അഭിനയിക്കണമെന്നത് സംവിധായകന് രാജീവ് ഷെട്ടിയുടേയും നിര്മ്മാതാവ് ലോറന്സിന്റേയും തീരുമാനമായിരുന്നു.
ഹിന്ദിയില് നിന്നോ മറ്റു ഭാഷകളില് നിന്നോ അഭിനേതാക്കളെ തെരഞ്ഞെടുക്കാം എന്ന ആലോചനയുണ്ടായി. എന്നാല് നേപ്പാളില് ചിത്രീകരിക്കുമ്പോള് ഇവിടെ നല്ല അഭിനേതാക്കള് ഉള്ള സാഹചര്യത്തില് ഇവിടന്നു തന്നെ അഭിനേതാക്കളെ പങ്കെടുപ്പിക്കുന്നതാണ് ഏറെ ഉചിതമെന്ന് ബോദ്ധ്യപ്പെട്ടു.
രണ്ടു പ്രശസ്ത നടന്മാരും ഒരു നേപ്പാള് നടിയുമാണ് ഈ ചിത്രത്തില് അഭിനയിക്കുന്നത്. ഇവര്ക്കൊപ്പം നിരവധി നേപ്പാളികളുടെ സാന്നിദ്ധ്യവും ഈ ചിത്രത്തിലുണ്ട്.
ഉമേഷ് തമാങ്, മാവോത് സേ ഗുരുങ് എന്നിവരാണ് നേപ്പാളിലെ നടന്മാര്.
ഹോളിവുഡ് സിനിമകളില് അഭിനയിക്കുന്ന നടനാണ് ഉമേഷ് തമാങ്.
സ്വസ്തി മഖഡ്ക എന്ന പ്രശസ്ത നടിയാണ് നേപ്പാളില് അഭിനയിക്കുന്നത്.
നേപ്പാളിലെ ലേഡി സൂപ്പര് താരമെന്നാണ് സ്വസ്തിമ ഖഡ്കയെ വിശേഷിപ്പിക്കുന്നത്.
ഇവരില് മാവോട്ട്സേ ഗുരുങ് ഈ ചിത്രത്തിന്റെ ഇവിടുത്തെ ചിത്രീകരണത്തിലും ഏറെ സഹായങ്ങള് നല്കുന്നുണ്ട്.
ഇവര്ക്കു പുറമേ നാല്പ്പതോളം നേപ്പാളി താരങ്ങളുമുണ്ട്.
നേപ്പാള് ഇന്ത്യയുമായി ചേര്ന്നു കിടക്കുന്ന രാജ്യമാണങ്കിലും വിദേശ വസ്തുക്കളുടെ സംഗമ സ്ഥലം കൂടിയാണിവിടം.
ഇവിടുത്തെ ജീവിതം എക്സ്പെന്സീവുമാണ്.
വിനോദ് ഇല്ലമ്പള്ളി അല്പം നേരത്തേ നാട്ടിലേക്കു മടങ്ങുകയുണ്ടായി.
അദ്ദേഹത്തിന് പ്രജേഷ് സെന് സംവിധാനം ചെയ്യുന്ന പുതിയ ചിത്രത്തില് ജോയിന് ചെയ്യേണ്ടിയിരുന്നു.
ഫെബ്രുവരി ഇരുപത്തിമൂന്നിനാണ് ബാക്കിയുള്ളവര് നാട്ടിലേക്കു മടങ്ങിയത്.
ഏപ്രില് പതിനാലിന് നേപ്പാളില് ഈ ചിത്രത്തിന്റെ ചിത്രീകരണമാരംഭിക്കും.
ഏതാണ്ട് ഇരുപത്തിയഞ്ചു ദിവസത്തോളം നീണ്ടു നില്ക്കുന്ന ചിത്രീകരണമാണ് നേപ്പാളില് പ്ലാന് ചെയ്തിരിക്കുന്നത്.
ഇരുപതു ദിവസത്തോളം കേരളത്തിലും ചിത്രീകരണമുണ്ട്.
കൊച്ചിയിലാണ് കേരള ഭാഗങ്ങള് ചിത്രീകരിക്കുന്നത്.
ബിബിന് ജോര്ജ്, ധര്മ്മജന് ബൊള്ഗാട്ടി ജോണി ആന്റണി എന്നിവര് കേന്ദ്ര കഥാപാത്രങ്ങളെ അവതരിപ്പിക്കുന്ന ഈ ചിത്രത്തില് അന്നാ രേഷ്മ രാജനാണ് നായിക.
ഇന്നസന്റ്, സലിം കുമാര്, ഹരീഷ് കണാരന്, ഇടവേള ബാബു, കൊച്ചുപ്രേമന്, തെസ്നി ഖാന്, സോഹന് സീനുലാല്, അസീസ് നെടുമങ്ങാട്, നസീര് സംക്രാന്തി, എന്നിവരും പ്രധാന വേഷങ്ങളിലെത്തുന്നു.
രാജീവ് ഷെട്ടിയും സേവ്യര് അലക്സുമാണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്.
ബിജിബാലിന്റെതാണ് സംഗീതം. ബോളിവുഡ്ഡിലെ പ്രശസ്ത ഗായിക സുനീഡി ചൗഹാന് ഈ ചിത്രത്തില് ഒരു ഗാനമാലപിക്കുന്നുണ്ട്.
'ലൂസിഫര്' എന്ന ചിത്രത്തിലെ ഹിന്ദി ഗാനമെഴുതിയ തനിഷ്ക്ക് നബാര് ആണ് ഈ ഗാനമെഴുതിയിരിക്കുന്നത്.
അജീഷ് ദാസന്റെതാണ് മറ്റു ഗാനങ്ങള്.
ദിനേശ് മാസ്റ്റര് കോറിയോഗ്രാഫി കൈകാര്യം ചെയ്യുന്നു.
ബാദ്ഷയാണ് പ്രൊജക്റ്റ് ഡിസൈനര്.
പ്രൊഡക്ഷന് കണ്ട്രോളര്- ശ്രീകുമാര് ചെന്നിത്തല, വി. സാജനാണ് എഡിറ്റര്, കലാസംവാധാനം- അഖില്രാജ്, മേക്കപ്പ്- റോണക്സ് സേവ്യര്, കോസ്റ്റ്യം- ഇര്ഷാദ് ചെറുകുന്ന്, അസ്സോസ്സിയേറ്റ് ഡയറക്ടേര്- മനേഷ് ബാലകൃഷ്ണന്, രതീഷ് മൈക്കിള്
- വാഴൂര് ജോസ്.
Online PR - CNA.