CNA
ഹൈദരബാദ്:
'തൊളി പ്രേമ' എന്ന സൂപ്പര്‍ ഹിറ്റ് തെലുങ്ക് ചിത്രത്തിന്റെ സംവിധായകന്‍ വെങ്കി അറ്റ്‌ലൂരി, ധനുഷിനെ നായകനാക്കി സംവിധാനം ചെയ്യുന്ന ദ്വിഭാഷാ ചിത്രമാണ് 'വാത്തി'. 'വാത്തി'യില്‍ സംയുക്ത മേനോന്‍ ആണ് ധനുഷിന്റെ നായികയായി എത്തുന്നത്.
കഴിഞ്ഞ തിങ്കളാഴ്ചയാണ് ഹൈദരാബാദിലെ രാമനായിഡു സ്റ്റുഡിയോയില്‍ 'വാത്തി'യുടെ പൂജ ചടങ്ങുകള്‍ നടന്നത്. ജനുവരി 5 ന് ഹൈദരാബാദില്‍ 'വാത്തി'യുടെ പ്രധാന ഷൂട്ടിംഗ് ആരംഭിച്ചു.
ചിത്രം തമിഴിലും തെലുങ്കിലുമായാണ് ഒരുക്കുന്നത്. 'സര്‍' എന്നാണ് തെലുങ്കില്‍ എത്തുന്ന ചിത്രത്തിനിട്ടിരിക്കുന്ന പേര്.
സംവിധായകന്‍ ത്രിവിക്രം ഉള്‍പ്പെടെയുള്ള അഭിനേതാക്കളുടെയും അണിയറപ്രവര്‍ത്തകരുടെയും അതിഥികളുടെയും സാന്നിധ്യത്തില്‍ തീയറ്ററില്‍ പൂജ ചടങ്ങ് നടന്നു. നാരായണ, എം.എല്‍. കുമാര്‍ ചൗധരി, എസ്. രാധാകൃഷ്ണ എന്നിവരും ചടങ്ങില്‍ പങ്കെടുത്തു.
ഹരിക & ഹാസിനി ക്രിയേഷന്‍സിന്റെ എസ്. രാധാകൃഷ്ണ (ചൈനബാബു) തിരക്കഥ 'വാത്തി'യുടെ ടീമിന് കൈമാറിയപ്പോള്‍ ചിത്രത്തിന്റെ ആദ്യ ക്ലാപ്പ് ത്രിവിക്രം നല്‍കി. സുരേഷ് ചുക്കപ്പള്ളി ക്യാമറ സ്വിച്ച് ഓണ്‍ ചെയ്തു.
സിത്താര എന്റര്‍ടെയ്ന്‍മെന്റ്‌സിന്റെ നാഗവംശി എസും സായ് സൗജന്യയും ചേര്‍ന്നാണ് 'വാത്തി' നിര്‍മ്മിക്കുന്നത്.
സംഗീത സംവിധാനം ജി വി പ്രകാശ് കുമാര്‍, ഛായാഗ്രഹണം- ദിനേശ് കൃഷ്ണന്‍, എഡിറ്റര്‍- നവിന്‍ നൂലി. ധനുഷിന്റെ ആദ്യ തെലുങ്ക് ചിത്രം കൂടിയാണിത്. വെങ്കി അറ്റ്‌ലൂരി തന്നെയാണ് ചിത്രത്തിന്റെ തിരക്കഥ എഴുതുന്നത്.
ഒരു സാധാരണക്കാരന്റെ അതിമോഹമായ ഒരു യാത്രയാണ് ഈ ചിത്രം, ചിത്രത്തില്‍ ധനുഷ് കോളേജ് അധ്യാപകന്റെ വേഷത്തില്‍ അഭിനയിക്കുന്നു എന്നാണ് റിപ്പോര്‍ട്ട്.
വിദ്യാഭ്യാസ മാഫിയയെ ചുറ്റിപ്പറ്റിയും വിദ്യാഭ്യാസത്തിന്റെ സ്വകാര്യവല്‍ക്കരണത്തിനെതിരായ ഒരു യുവാവിന്റെ പോരാട്ടത്തെയും എടുത്തുകാണിക്കുന്ന ഒരു ഒരു ആക്ഷന്‍ ഡ്രാമയാണ് 'വാത്തി' എന്നാണ് സൂചന.
തെലുങ്ക് ചലച്ചിത്രമേഖലയില്‍ ധനുഷിന്റെ അരങ്ങേറ്റ ചിത്രമാണ് 'വാത്തി' എന്ന പ്രത്യേകതയും ഈ സിനിമയ്ക്കുണ്ട്.
വാര്‍ത്ത പ്രചരണം- എം.എം. കമ്മത്ത്
Online PR - CinemaNewsAgency.Com
