അഞ്ജു അഷറഫ്-
കൊച്ചി:
മലയാള നാടക വേദിയും ചലച്ചിത്രവേദിയും ഒരുപോലെ ആദരിച്ച പ്രതിഭാശാലിയായ കൊട്ടാരക്കര ശ്രീധരന് നായരുടെ കൊച്ചുമകള് വൈഷ്ണവിയും അഭിനയരംഗത്ത് എത്തിയിരിക്കുന്നു. നടന് സായികുമാറിന്റെയും പ്രസന്നകുമാരിയും മകളാണ് വൈഷ്ണവി.
ഒരു കാലഘട്ടം മുഴുവന് അഭിനയ വേദിയില് നിറഞ്ഞുനിന്ന കൊട്ടാരക്കര ശ്രീധരന് നായരുടെ മകന് സായികുമാര്, മകള് ശോഭ, ഭര്ത്താവ് മോഹന് അവരുടെ മക്കള് വിനു മോഹന്, അനു മോഹന്, വിനു മോഹന്റെ ഭാര്യ, പ്രസന്നകുമാരിയുടെ അനുജത്തി വിജയകുമാരി, സീമ ജി. നായര് തുടങ്ങി മക്കളും മരുമക്കളും കൊച്ചുമക്കളും അടുത്ത കുടുംബാംഗങ്ങളില് പലരും അഭിനയ വേദിയില് സജീവമാണ്.
ഗായികയായ പ്രസന്നകുമാരിയും നടന് സായികുമാറും പ്രണയിച്ച് വിവാഹിതരായവരാണ്. ഇവരുടെ ഏകമകളാണ് വിദ്യാസമ്പന്നയും കലാകാരിയുമായ വൈഷ്ണവി.
കുടുംബാംഗങ്ങള് കൂട്ടത്തോടെ അഭിനയത്തില് നില്ക്കുമ്പോഴും കലയോട് താല്പര്യം ഉണ്ടായിട്ടും പഠിച്ച് ജോലി നേടി സ്വന്തം കാലില് നില്ക്കാനുള്ള ഉറച്ച തീരുമാനത്തോടെ മുന്നോട്ടുപോവുകയും ലക്ഷ്യത്തില് എത്തിച്ചേരുകയും ചെയ്ത വൈഷ്ണവി ഇപ്പോള് പാരമ്പര്യത്തിന്റെ കരുത്തുമായി അഭിനയ വേദിയില് എത്തിയിരിക്കുന്നു. സി കേരളം ടെലികാസ്റ്റ് ചെയ്യുന്ന 'കൈയെത്തും ദൂരത്ത്' എന്ന സീരിയലില് കനകദുര്ഗ എന്ന കേന്ദ്ര കഥാപാത്രത്തെയാണ് വൈഷ്ണവി അവതരിപ്പിക്കുന്നത്. വൈഷ്ണവിയോടൊപ്പം സീരിയല് രംഗത്തെ പ്രമുഖരായ അഭിനേതാക്കളും അണിനിരക്കുന്നുണ്ട്. അഭിനയ വേദിയിലെ അരങ്ങേറ്റത്തെക്കുറിച്ച് വൈഷ്ണവി പറയുന്നത് കേള്ക്കാം.
'പഠിത്തം കഴിഞ്ഞപ്പോള് തന്നെ ജോലി കിട്ടി. പിന്നീട് ദുബായിലെ ഒരു കമ്പനിയില് നിന്ന് നല്ല ഓഫര് കിട്ടിയപ്പോള് അവിടെ ജോയിന് ചെയ്തു. 2018 ലായിരുന്നു വിവാഹം. ഭര്ത്താവ് സുജിത് കുമാറും ദുബായിലാണ് വര്ക്ക് ചെയ്യുന്നത്. ഞങ്ങള് രണ്ടാളും കൂടി കുടുംബത്തിലെ ഒരു ആവശ്യവുമായി ബന്ധപ്പെട്ട് മാര്ച്ചില് നാട്ടില് വന്നതാണ്. ഇവിടെ എത്തി ഏതാനും ദിവസങ്ങള് കഴിഞ്ഞപ്പോഴേക്കും ലോക്ക്ഡൗണ് പ്രഖ്യാപിച്ചു. തിരികെ പോകാന് കഴിഞ്ഞില്ല. അങ്ങനെയിരിക്കുമ്പോഴാണ് ഞങ്ങളുടെ കസിന് സീമ (സീമ ജി നായര്)ചേച്ചി ഈ സീരിയലിനെ കുറിച്ച് പറയുന്നത്. അഭിനയിക്കാന് എനിക്ക് താല്പര്യമായിരുന്നു. പഠിക്കുന്ന സമയത്ത് യൂത്ത് ഫെസ്റ്റിവലില് നൃത്ത മത്സരങ്ങളില് പങ്കെടുത്തിട്ടുണ്ട്. പാടാറുണ്ട്. അമ്മ അസ്സലായി പാടും. എന്റെ ഭര്ത്താവ് നല്ലൊരു കലാ ആസ്വാദകനാണ്. അഭിനയിക്കുന്നതിനെ കുറിച്ച് അദ്ദേഹം പലപ്പോഴും എന്നോട് പറഞ്ഞിട്ടുമുണ്ട്. അഭിനയിക്കുന്നതില് എനിക്ക് കുഴപ്പമില്ല. ഭര്ത്താവിന്റെ തീരുമാനമാണ് മുഖ്യം. സീരിയലില് അഭിനയിക്കുന്ന കാര്യം സീമ ചേച്ചി അറിയിച്ചപ്പോള് തന്നെ ഫുള് സപ്പോര്ട്ടു തന്നു പുള്ളിക്കാരന് കൂടെ നിന്നത് കൊണ്ടാണ് 'കൈയ്യെത്തുംദൂരത്ത്' അഭിനയിക്കാന് സാധിച്ചത്. നല്ല സീരിയലാണ്, നല്ല കഥാപാത്രമാണ്, ഫ്രണ്ട്സ് സര്ക്കിളില് നിന്ന് നല്ല റെസ്പോണ്സ് കിട്ടുന്നുണ്ട്...' പൊതുവേ 'കൈയ്യെത്തുംദൂരത്തിനെക്കുറിച്ച് നല്ല അഭിപ്രായമാണ് കേള്ക്കുന്നതെന്നും വൈഷ്ണവി പറയുന്നു.