അഞ്ജു അഷറഫ്-
കൊച്ചി:
കേരളത്തില് ആദ്യമായി പുതിയ 'ക്രിസ്റ്റി ആര്ജിബി ലേസര് സിനി ലൈഫ്' പ്രൊജക്ടര് സ്ക്രീനിംഗ് സ്ഥാപിച്ചു കൊണ്ട് ഇടപ്പള്ളി വനിതാ വിനീതാ തീയേറ്റര് വിസ്മയ കാഴ്ചയുടെ പുതിയ ലോകം തുറന്നിടുകയാണ്. ഹൈടെക് റിയല് ലേസര് ഇല്ല്യൂമിനേഷന് ടെക്നോളജി ഉപയോഗപ്പെടുത്തി മികച്ച വിഷ്വല് ക്വാളിറ്റിയോടെ 35അടി വീതിയില് 15 അടി നീളത്തില് എല്ലാവിധ നിറ ഭംഗിയോടെയും സിനിമ കാണാന് കഴിയുന്ന കേരളത്തിലെ ആദ്യ തിയേറ്ററായി മാറുകയാണ് വനിത വിനീത തീയേറ്റര്.
2020-21 വര്ഷത്തെ ഏറ്റവും മികച്ച അപ്ഡേറ്റഡ് വേര്ഷനാണ് തീയേറ്ററില് സ്ഥാപിച്ചിട്ടുള്ള ലേസര് പ്രോജെക്ഷന്. തിയേറ്ററിലെ 1, 2 സ്ക്രീനുകളാണ് ഇതിനായി സെറ്റ് ചെയ്തിരിക്കുന്നത്. ഏകദേശം 80 ലക്ഷത്തോളം രൂപയാണ് ഒരു പ്രൊജക്ടറിന്റെ വില. ഇത്തരം രണ്ട് പ്രൊജക്ടറുകളാണ് തിയേറ്ററില് ഒരുക്കിയിരിക്കുന്നത്.
നിരവധി സവിശേഷതകളുള്ള ലേസര് പ്രൊജക്ടറിന്റെ
ഉദ്ഘാടനം ചലച്ചിത്ര രംഗത്തെ പ്രമുഖരുടെ സാന്നിധ്യത്തില് ഇന്ന് വൈകിട്ട് ഇടപ്പള്ളി വനിതാ വിനീത തീയേറ്ററില് നടന്നു.
മാസങ്ങള്ക്കുശേഷം സിനിമ തിരിച്ചുവരികയാണ്. എന്ത് ചെയ്യണം എങ്ങനെ ചെയ്യണം എന്ന് ആശങ്കപ്പെട്ടിരുന്ന ഒരു അവസ്ഥയില് നിന്നാണ് ഇന്നത്തെ ഈ മാറ്റത്തിലേക്ക് എത്തിച്ചേരുന്നത്. നല്ല സിനിമ എടുത്തിട്ട് നല്ല രീതിയില് കാണാന് പറ്റാതെ പോയിരുന്ന ഒരു കാലമുണ്ടായിരുന്നു. അവിടെ നിന്നൊക്കെ നമ്മള് വളരെ ദൂരം മുന്നോട്ട് പൊയ്ക്കഴിഞ്ഞു. ഇന്നത്തെ ഈ നൂതനമായ ലേസര് പ്രൊജക്ഷന് സിനിമാ ഇന്ഡസ്ട്രിക്ക് വലിയ ഗുണം ചെയ്യുമെന്ന് പ്രൊഡ്യൂസേഴ്സ് അസോസിയേഷന് പ്രസിഡന്റ് എം. രഞ്ജിത്ത് പറഞ്ഞു. നിര്മാതാക്കളായ ജി സുരേഷ് കുമാര്, ബി രാകേഷ്, എം എം ഹംസ, മഹാ സുബൈര്, കിരീടം ഉണ്ണി, അനില് തോമസ്, യുവസംവിധായകന് ബേസില് എന്നിവര് ആശംസകള് നേര്ന്നു. ലെസ്ലി സ്വാഗതവും ലിന്റൊ നന്ദിയും രേഖപ്പെടുത്തി.